ኤራንቻ 8

1 አዳ ኤራንቻ አሳ ማላ አሳይ ኦኔ? የዎቱዋ ኡባ ብለ ኤርያዌ ኦኔ? አዳ ኤራተይ ፓሽክሲደ፥ ሜዳ ሶምኡዋ ፖእሴ።

ካትያዉ አዛዘትያዋ

2 ካትያዉ አዛዘታ፤ አያዉ ጎፐ፥ አዛዘታናዉ ኔን ካሰ ጾሳ ስንን ጫቃ ኡታዳ። 3 ኡባ ዎደ ኢታ ኦሱዋ ኦፓ፤ አያዉ ጎፐ፥ ካቲ ባረ ኮዬዳዋ ኦናዉ ዳንዳይያ ድራዉ፥ ኔን አ ስንፐ ኤለ ያና። 4 ኡባባ ኦናዉ ካትያዉ ማታይ ደኤ፤ ያትና፥ "አያዉ ሀዋ ኦዲ?" ያጊደ አ ኦቻናዉ ዳንዳይያዌ ኦኔ? 5 አ አዛዙዋ ፖልያ ኡራይ ሙረተና፤ አዳ ኤራንቻ አሳይ ልከ ግድያ ዎድያነ ኦያ ኦግያ ኤሬ። 6 እት አሳ ቦላን ዴጾ መቱ ጋክንቶነ፥ የዉዋ ኡባዉ አዉ አ ዎዲነ አ ኦጊ ኦጊ ደኤ። 7 ስንፐ ሀናና ትምቢትያ ኤርያዌ ባዋ፤ ሄዋ ድራዉ፥ "ሀዌ ሀናና" ጊደ ኦዳናዉ ዳንዳይያዌ ኦኔ? 8 ሸምፑ ሻከቲደ ብያ ጋላስ ኦይቂደ፥ ተአናዉ ዳንዳይያ አሳይ ባዋ፤ ዎይ ሀይቁ ባረ ጋላሳን ዬናዳን ድጋናዉ ዳንዳይያ አሳይካ ባዋ። ሄዌ ኦንነ ከስ አካናዉ ዳንዳየና ኦላ። ሄዋ ድራዉ፥ ሀይቁዋ ስንን ኢታተ ኢታ ኦያ ኡራ አሽ አከና።

ኢታ አሳቱዋነ ኬካ አሳቱዋ ሀኖታ

9 ሳሉዋ ጉፋንን ሀንያዋ ኡባ ታን አኬካደ ቆፕያ ዎደ፥ እት አሳይ ባረዉ ሞድያ ማታ ሀራ አሳ ቆሀናዉ ጎኤትያዋ በኣድ። 10 ቃይ ኢታ አሳቱ ቦንቹዋን ሞገትሽና በኣድ። ሄዋፐ አያዌካ ቃይ፥ ሞጉዋፐ ስምያ ዎደ፥ ኡንቱንቱ ሄ ኢታተ ኦዳ ካታማ አሳይ ሺቂደ፥ ኡንቱንታ ሳቢሽና ስሳድ። ሄዌ ኡባይካ መላ።

11 አስ ሀልቺደ ኢታባ ኦያ ጋሱ፥ ኢታባ ኦዳ አሳቱዋ ኤለካ ሙርያባይ ባይና ድራሳ። 12 ናጋራንቻይ ጼቱ ገደ ኢታባ ኦሽና፥ አ ላይይ አዱቆፐካ፥ ጾሳዉ ያይያዋንቶ ሳአይ ሎአናዋ ታን ኤራይ። 13 ኢታቱ ጾሳ ያየና ድራዉ፥ ሳሮተይ ኡንቱንቶ ባዋ፤ ጾሳዉ ኡንቱንቱ ያየና ድራዉ፥ ኡንቱንቱ ባረካ ኩዋዳን ቃማና። 14 ሀ ሳኣን ኦሰትያ እት ሀዳባይ ደኤ፤ ሄዌካ፥ ጌሻ አሳቱ ናጋራንቻቶ ይያ ሙሩዋ አክና፥ ናጋራንቻቱ ቃይ፥ ጌሻቶ ይያ ሎኦባ አኪኖ። ሀ ኡባይካ መላ።

15 ሄዋ ድራዉ፥ አሳይ ባረ ደኡዋን ናሸቶፐ ሎአ ጋደ ቆፋ እማይ፤ አያዉ ጎፐ፥ አሳይ ምያዋፐ፥ ኡሽያዋፐነ ባረና ናሸችያዋፐ አዳ ሎኦባይ አዉ ሳሉዋፐ ጋርሳ ባጋና ሀራይ ባዋ። ጾሳይ አዉ እሜዳ ላይን እ ዳቡሪደ ደሜዳዋን ሄዋዳን ኦፐ፥ ናሸታናዉ ዳንዳዬ።

16 ታን አዳ ኤራተይ አየንቶ ኤራናዉነ አሳይ ሀ ሳኣ ቦላን ዳቡርያ ዳቡራ አኬካናዉ ሀልቻድ፤ ዉርሰን አሳይ ገምእሹዋ ዪደ ኦያ ዱጸና ኦሱ ደእያዋ በኣድ። 17 ሄዋፐ ጉይያን፥ ጾሳይ ኦዳዋ ኡባ በኣድ። ቃይ ሳሉዋፐ ጋርሳ ባጋን ኦሰቴዳ ኦሱዋ አሳይ ፕልጊደ ኤራናዉ ዳንዳየናዋ ኤራድ። አስ አይ ኬሻ ዳቡሪደ ፕልግ ጼሎፐነ፥ አ ብለ ኤራናዉ ዳንዳየና። ቃይ አዳ ኤራንቻ አሳይ፥ "ታን ሀዋ ኤራይ" ጎፐነ፥ እ ኤራናዉ ዳንዳየና።