1 ሀ ኡባ የዎቱዋባ አዱሳ ዎድያ ታን ቆፔዳዋፐ ጉይያን፥ አዳ ኤራንቻነ ጽሉዋ ግዴዳ አሳቱነ ኡንቱንቱ ኦሶቱ ጾሳ ኩሽያን ደኢኖ ጋደ ቃቻድ፤ ሽን ሲቁ ናግያ፥ እጹ ናግያ ኦንነ ባረና ናግያዋ ካሰቲደ ኤረና። 2 ዱማተይ ባይናን ደእሺና፥ ኡባ ጋክያ ካጫይ እቱዋ፤ ጽሉዋ ግድና ማካላንቻ ግድና፥ ሎአ ግድና ኢታ ግድና፥ ጌሻ ግድና ቱና ግድና፥ ያርሹዋ ያርሽያዋ ግድና ያርሸናዋ ግድና፥ ኡንቱንቱ ኡባ ካጫይ እቱዋ። ሎኦ አሳዉ ናጋራንቻዋፐ ኬክያ ካጭ ባዋ፤ ጫቁዋ ጫቃናዉ ያይያዌካ ጫቃናዉ ጻልያዋፐ ዱማተና።

3 አሳ ኡባ ካጫይ እቱዋ ግድያዌ፥ ሀ ሳኣን ደእያ ሀራ ኢታተካ ማላ ዳሮ ኢታ። አስ ደኡዋን ደኤዳ ላይን ኡባን አ ዎዛናይ ኢታተንነ ጎሻን ኩሚደ ደኤ፤ ዉርሰን ሀይቂ አጌ። 4 ሀይቂዳ ጋሙዋፐ ፓጻ ደእያ ካናይ ኬካ፤ አያዉ ጎፐ፥ ፓጻ ደእያዋንቱና ደእያ አሳዉ ህዶታይ ደኤ።

5 ፓጻ ደእያ አሳቱ እት ገደ ሀይቃናዉ ደእያዋ ኤሪኖ፤ ሽን ሀይቄዳዋንቱ አያነ ኤርክኖ። ኡንቱንቱ ሙለካ ዶገት ክቼዳዋንቱ ግድያ ድራዉ፥ አይነ ማድክኖ። 6 ኡንቱንቱ ሲቁ፥ እጹነ ቃናቲ ኡባይ ኡንቱንቱና እትፐ ይክቼዳ። ሄዋ ድራዉ፥ ሀዋፐ ህን ባጋን ሳሉዋ ጉፋንን ኦሰትያ የዉዋ ኡባን ኡንቱንቶ መናዉካ ካጭ ባዋ።

7 ባደ፥ ነ ቁማ ናሸቻን ማ፤ ነ ዎይንያ ኤሳካ ነ ዎዛናይ ፓሽክሽና ኡሻ። አያዉ ጎፐ፥ ጾሳይ ሄዋ ነዉ ካሰፐካ እም ዎዳ። 8 ኡባ ዎደ ነ ማዩ ቦ ግዶ፤ ነ ሁጲያንካ ዛይትያ ኦከታ። 9 ሳሉዋፐ ጋርሳ ባጋና ጾሳይ ነዉ እሜዳ ሀ መላ ደኡዋን፥ ነ መላ ደኦቱዋ ኡባን ኔን ሲቅያ ነ ማቻትና ናሸታደ ደአ፤ አያዉ ጎፐ፥ ኔን ሳሉዋፐ ጋርሳ ባጋና ዳቡራደ ኦዳዋ ኡባፐ ኔና ጋክያ ሳማይ ሄዋ። 10 ነ ኩሺ ኦናዉ ደሜዳዋ ኡባ ነ ኩመን ዎልቃን ኦ፤ አያዉ ጎፐ፥ ኔን ባናሳን ዱፉዋን ኦሱ፥ ዎይ ሀልቹ፥ ዎይ ኤራይ፥ ዎይ አዳ ኤራተ ባዋ።

11 ታን ሳሉዋፐ ጋርሳና ሀራባካ በኣድ፤ ሄዌካ፥ ኤሌልያ ዎንቻቱ ኡባ ዎደ ጾንክኖ፤ ዎይ ምኖ ኦላንቻቱካ ኡባ ዎደ ኦላን ጾንክኖ፤ ዎይ አዳ ኤራንቻቱ ኡባ ዎደ ቁማ ደምክኖ፤ ዎይ ጭንጫቱ ኡባ ዎደ ዱረትክኖ፤ ዎይ ታማሬዳ አሳቱ ኡባ ዎደ ሳበትክኖ። ሽን ኡባይካ ካጫይነ ዎዲ ኦዋዳን ሀኔ።

12 ሄዋ ቦላካ ቃይ፥ ስንፐ ያናዉ ደእያ መቶ ዎዲ አዉደ ጋካነንቶ፥ ኤራናዉ ዳንዳይያ አሳይ ባዋ፤ ካፉ ፓሊደ ጲርያን ገልያዋዳን፥ ዎይ ሞሊ ማጋን ኦይቀትያዋዳን፥ አሳይ ኡባይ ቆፐናን ጋክያ ኢታ ዎድያን ኦይቀቴ።

13 ሳሉዋ ጉፋንዋን ታን በኤዳባይ ሀራባይካ ደኤ፤ ሄዌካ አዳ ኤራተይ ዎልቃማ ሌምሶ ግድያዋ። 14 እት ቢታን እት ጉ አሳይ ደእያ ቄር ካታማታ ደአዉ፤ ሄ ካታማቶ እት ዎልቃማ ካቲ ኦላናዉ ደንዴ። እዞ ዶዴዳ። 15 ቃይ፥ እት ህዬሳ ሽን ጭንጫ ግዴዳ ብታኒ፥ ሄ ካታማትን ደኤ፤ እ ባረ አዳ ኤራተን ሄ ካታማ አሼዳ። ሽን፥ ሄ ህዬሳ ብታንያ ዛረደ ሀሳዬዳባይ ባዋ። 16 ታን፥ "አዳ ኤራተይ ዎልቃፐ ዳሬ" ያጋድ። ግዶ ሽን፥ አዳ ኤራንቻ ግዶፐነ፥ ህዬሳ አሳይ ካቴ፤ እ ሃሳይያዋካ ሀይዝያዌ ባዋ። 17 ሄዋ ግዶፐካ፥ ደርያ ሞድያዌ አዛላቱዋ ሺቁዋን ዋስያ ዋሱዋ ስስያዋፐ፥ ሌላን ኦደትያ አዳ ኤራንቻ ቃላ ስስያዌ ሎአ። 18 አዳ ኤራተይ ኦላ ሚሻፐ ሎአ፤ ሽን እት ናጋራንቻ አሳይ ዳሮ ሎኦባ ባይዜ።