ፕልሞና 1

1 ታን ጳዉሎስ፥ የሱስ ክርስቶሳ ድራዉ ቃሹዋን ደእያዌነ ኑ እሻ ጽሞቶስ፥ ኑናና ኦያ ኑን ሲቅያ ፕልሞናዉ፥ 2 ነ ጎለን ሺቅያ አማንያዋንቶ፥ ኑ ምቻት አፍብስነ ኑናና እትፐ ደእያ ክርስቶሳ ዎታዳራ አርክፖሳዉ ሀ ዳብዳቢያ ጻፌቶ።✝2 ቆል. 4:17

3 ጾሳ ኑ አዉዋፐነ ኑ ጎዳ የሱስ ክርስቶሳፐ አ ኬካተይነ ሳሮተይ ህንተንቶ ግዶ።

ፕልሞና ሲቁዋነ አማኑዋ

4,5 ኔን ጾሳ አሳቱዋ ሲቅያዋነ ጎዳ የሱሳ አማንያዋ ታን ስስያ ድራዉ፥ ጾሳ ዎሳደ ኔና ሀሳይያ ዎደ ኡባን፥ ታ ጾሳ ጋላታይ። 6 ኔን ነ አማኑዋ ሀራቱዋና ሻክያዌ ኑዉ ክርስቶስ የሱሳ ባጋና ይያ ሎኦባ ኡባ ኤርሳና ማላ፥ ታን ጾሳ ዎሳይ። 7 አያዉ ጎፐ፥ ጾሳ አሳቱዋ ዎዛናይ ነ ኪታን ምኔዳ ድራዉ፥ ታ እሻዉ፥ ታን ነ ሲቁዋን ዳሮ ናሸቻነ መንዋ ደማድ።

አናስሞስ ፕልሞናኮ ስሜዳ ስሙዋ

8 ሄዋ ድራዉ፥ ኔን ኦናዉ በስያዋ ኦና ማላ፥ ታን ኔና አዛዛናዉ ክርስቶሳ ባጋና ጻሎፐካ፥ 9 ታን ጳዉሎስ ጭሜዳዌ፥ ክርስቶስ የሱሳዉ ሀእካ ቃሹዋን ደእያዌ፥ ሲቁዋ ድራዉ፥ ኔና ዎሳይ። 10 ታን ቃሹዋን ደኣደ አዉ አዉዋ ግዴዳ ታ ናኣ አናስሞሳ*10 አናስሞሳ፦ ግያ ሱን ብለይ፥ ግሪክያ ቃላን ጎእያዋ ዎይ ማድያዋ ጉሳ። ድራዉ፥ ኔና ዎሳይ።✝10 ቆል. 4:9 11 እ ካሰ ኔና ጎኤና፤ ሽን ሀእ ኔናካ ታናካ ቱሙ ጎኤ።

12,13 ታን ዎዛናፐ ዶስያ አናስሞሳ ኔኮ የዶዌ ታ ዎዛና የዶዋ። ታን ዎንጋላ ድራዉ ቃሸታ ኡታ ደእሽን፥ ኔና ኮቺደ፥ ታና ማዳና ማላ፥ ታ ማታን አ አሻናዉ ኮያይ። 14 ሽን ኔን ነ ሸንያዳን ኦናዋ ኮያይፐ አትን፥ ኔናና ዞረተናን ዎልቃን አይነ ኦናዉ ኮይከ።

15 አናስሞስ ጉ ዎድያ ኔፐ ሻከቴዳዌ፥ ኦን ኤር ስሚደ፥ ኡባ ዎደካ ኔናና ደአናሰንቶነ። 16 ስም ሀዋፐ ስንዉ አናስሞስ አይልያ ግደና፤ ሽን አይልያፐ እ ሎይ አ፤ እ ታዉ አይ ኬና ሲቆ እሼ! ቃይ እ ነዉ አሳ ባጋናካ ጎዳ ባጋናካ አይ ኬና አዳ እሻ ግዳንዴሻ!

17 ስም ኔን ታና ነ ላገ ግያዋ ግዶፐ፥ ታና ሞክያዋዳን፥ አ ሞካ። 18 እ ነዉ ባይዜዳባይ ዎይ አ ቦላ ነዉ አጩ ደኦፐ፥ ታፐ ጭጋ አካ። 19 ሄ አጩዋ ታን ጭጋና ጋደ፥ ታን ጳዉሎስ ታ ኩሽያን ጻፋይ። ኔን ታዉ ነ ሸምፑዋ አጮታ ኡቴዳዋ ታን ኔና ሀሳይሳናዉ ኮሸና።

20 ኤ፥ ታ እሻዉ፥ ጎዳ ባጋና ኔፐ ማዱዋ ደማናዉ ኮያይ። ክርስቶሳ ባጋና ታና መን። 21 ታን ጌዳዋፐ ዳሩዋ ኔን ኦናዋ ኤራደ፥ ቃይ ነ ታዉ አዛዘታናዋካ አማናደ፥ ሀዋ ነዉ ጻፋይ።

22 ቃይ ህንተንቱ ኤለካ ታዉ እማይ ሸምፕያ ጎልያ ጊግስተ። አያዉ ጎፐ፥ ጾሳይ ህንተንቱ ዎሳን ታና ህንተንቶ ጉየ ዛሪደ እማና ጋደ ቆፓይ።

ዉርሰ ሳሮታ

23 ክርስቶስ የሱሳ ድራዉ፥ ታናና ቃሹዋን ደእያ ኤፓፍር ኔና ሳሮ ሳሮ ጌ። 24 ቃይ ታናና እትፐ ኦያ ማርቆስ፥ አርስጽሮኮስ፥ ዴማስነ ሉቃስ ኔና ሳሮ ሳሮ ጊኖ።

25 ጎዳ የሱስ ክርስቶሳ አ ኬካተይ ህንተንቱ አያናና ግዶ።