1 ታን ጳዉሎስ፥ የሱስ ክርስቶስነ ቃይ ሀይቁዋፐ አ ደንዳ ጾሳይ አዉ ኪቴዳዋፐ አትን፥ አሳፐ ዎይ አሳ ባጋና ኪተቴዳዋ ግድከ። 2 ሀ ታንነ ታናና ደእያ አማንያ እሻቱ ኡባይ፥ ጋላትያ ጋድያን ደእያ አማንያ አሳ ኡባዉ ሳሮታ ኪቴቶ።

3 ጾሳይ ኑ አዉነ ኑ ጎዳይ የሱስ ክርስቶስ ህንተንቶ አ ኬካተነ ሳሮተ እሞ።

4 ኑ ጾሳ፥ ኑ አዉዋ ሸንያን ክርስቶስ ሀ ኢታ ኦሱ ኦሰትያ ዎድያፐ ኑና አሻና ማላ፥ ኑ ናጋራ ድራዉ፥ ባረ ሁጲያ እሜዳ። 5 ጾሳዉ መፐ መና ጋካናዉ ቦንቹ ግዶ። አመንእ።

6 ክርስቶሳ አ ኬካተን ህንተንታ ጼሴዳ ጾሳ አጊደ፥ ሀራ ዎንጋላኮ፥ ህንተ ኤሌሊደ፥ ዎት ስሜድተንቶ ታዉ ኦራባ ግዴዳ። 7 ህንተንታ ቡልአክያዋንቱነ ክርስቶሳ ምሽራቹዋ ቃላ ጌላያናዉ ኮይያ አማሬዳ አሳቱ ደኢኖፐ አትን፥ ቱሙፐ ሀራ ምሽራቹዋ ቃላይ ባዋ። 8 ሽን ሀራይ አቶ ኑና ግድና፥ ዎይ ሳሉዋፐ ኪታንቻ ግድና፥ ኑን ህንተንቶ ካሰ ኦዴዳ ምሽራቹዋ ቃላፐ ዱማትያዋ ህንተንቶ ኦድያዋ ግዶፐ፥ እ መናዉ ሸቀቴዳዋ ግዶ። 9 ካሰ ኑን ጌዳዋዳን፥ ሀእካ ላኤንዋ ታን ኦዳይ፤ ህንተ አኬዳ ምሽራቹዋ ቃላፐ ዱማትያዋ ኦንነ ህንተንቶ ኦዶፐ፥ ሄ ኡራይ መናዉ ሸቀቴዳዋ ግዶ።

10 ሀዌ ታና አሳፐ ሳባ ኮይያዋ ማላትሲ? ማላትሰና! ታን ጾሳይ ሎአ ግያዋ ኮያይ። ዎይ ታን አሳ ናሸቻናዉ ኮያይታ? ታን ሀእካ አሳ ናሸቻናዉ ኮይያዋ ግዶፐ፥ ክርስቶሳ አይለ ግድከ።

11 ታ እሻቶ፥ ታን ህንተንቶ ኦዴዳ ምሽራቹዋ ቃላይ አሳፐ ግደናዋ ህንተንቶ ኦዳይ። 12 አያዉ ጎፐ፥ ታዉ የሱስ ክርስቶስ ቆንጭሴዳፐ አትን፥ ታን ምሽራቹዋ ቃላ አሳፐ አካበይከ፤ አሳይ ታና ታማርስቤና።

13 ካሰ ታን አይሁዳ አማኑዋን ደእያ ዎደ፥ ዋናደ ደኣድታንቶ፥ ህንተ ስሴድታ፤ ታን ክርስቶሳ አማንያዋንታ ቃረታይ ባይናን የደርሳድነ ይሳናዉ ባጸታድ። 14 ታ ዎደ ደኤዳ አሳቱዋፐ ጮራቱዋ አይሁዳ አማኑዋ ህግያ ናጉዋን አይ፤ ኑ አዎቱዋ ዎጋ ኦፐነ አአደ ሲቃድ።

15,16 ሽን ጾሳይ ባረ አ ኬካተን፥ ታን ብሮ ታ ዳይ ኡሉዋን ደእሽን፥ ባረዉ ኦናዉ ታና ጼሴዳ፤ አባ ኦድያ ምሽራቹዋ ቃላ አይሁዳ ግደና አሳዉ ታን ኦዳና ማላ፥ ጾሳይ ባረ ናኣ ታዉ ቆንጭሳናዉ ኮዬዳ ዎደ፥ ዞረታናዉ ኦኮነ ባበይከ። 17 ዎይ ታፐ ካሰ የሱስ ኪቴዳዋንቱና ጋከታናዉ የሩሳላመ ባበይከ፤ ሽን ታን ኤለካ አራብያ ጌተትያ ጋድያ ባድ። ሄዋፐ ዳማስቆ ግያ ካታማ ስማድ። 18 ሄዙ ላይፐ ጉይያን፥ ጰጽሮሳና*1:18 ጰጽሮሳ፦ ግሪከ ማጻፋይ ኬፋ ያጌ። ብለይካ አራማይከ ቃላን "ዛላ" ግያዋ። ጋከታናዉ የሩሳላመ ባደ፥ አናና ታማነ እቼሹ ጋላሳ ኡታድ። 19 ሽን የሱስ ኪቴዳዋንቱፐ ጎዳ እሻ ያቆባፐ አትን፥ ሀራቱዋና ጋከታበይክ።

20 ታን ህንተንቶ ጻፍያዋን ዎሪ ባዋ፤ ታን ህንተንቶ ዎርዱዋ ኦደናዋ ጾሳይ ማርካ!

21 ሄዋፐ ጉይያን፥ ሶርያ ጌተትያ ጋድያነ ክልቂያ ጌተትያ ጋድያ ባድ። 22 ይሁዳን ደእያ ክርስቶሳን አማንያዋንቱ ታናና ኤረታ ግድክኖ። 23 ሽን ሀራ አሳይ፥ "ኑና የደርስ ዩይያ ብታኒ ሀዋፐ ካሰ እ ይሳናዉ ኮይያ አማኑዋባ ሀእ ኦዴ" ግያዋ ኡንቱንቱ 24 ስሲደ ታባን ጾሳ ጋላቴድኖ።