ጋላትያ 2

ጳዉሎስ ኪቴቶዋ ግድያዌ ሀራቱዋ ማታን ኤረቴዳ

1 ሄዋፐ ስማደ ታን ታማነ ኦይዱ ላይፐ ጉይያን፥ ባርናባሳና ላኤንዋ የሩሳላመ ባደ፥ ቲታካ ታናና አካደ ባድ። 2 ጾሳይ ታዉ ሳጻን ቆንጭሴዳ ድራዉ ባደ ታን ሀእ ኦያ ኦሱ ዎይ ካሰ ኦዳዌ መላ አተና ማላ፥ ክርስቶሳን አማንያዋንታ ካለያዋንታ ዱማ ሺሻደ፥ አይሁዳ ግደና አሳዉ ታን ኦድያ ምሽራቹዋ ቃላይ አይ ማለንቶ ኡንቱንቶ ኦዳድ። 3 ሽን ሀራይ አቶ ታናና ደእያ ቲታ እ ግሪከ ጋድያ አሳ ግድሽን፥ ቃጻረቶ ጊደ ጎደትበይክኖ። 4 ግዶፐነካ፥ ዎርዱዋን ኑዉ እሻቱዋ ማላት ዪደ፥ ኑናና ዋላከቴዳ ጮራ አሳቱ አ ቃጻራናዉ ኮዬድኖ። ሄ አሳቱ ክርስቶሳ የሱሳን ኑዉ ደእያ ኑን ኮዬዳዋዳን ሀናና ዳንዳይያ ላአተ ዎቺደ ሻናዉ፥ ዉኤቲደ ኑ ግዶ ገሊደ ኑና አይለ ኦናዉ ኮዬድኖ። 5 ሽን ምሽራቹዋ ቃላ ቱማተይ ህንተንቱና ምን ደአና ማላ፥ ኑን ሀራይ አቶ ጉ ዎድያካ ኡንቱንቶ ሞደትበይኮ።

6 ሽን ካፓቱዋ ማላትያዋንቱ ታዉ አይነ ኦራ ቆፋ እምበይክኖ፤ ሀዋ አያዉ ጋይታ ጎፐ፥ ሀዋፐ ካሰ ኡንቱንቱ ኦና ግድናካ ታና መትያባ ግደና፤ ጾሳይ አሳ ሶምእያ ጼሊደ ፕርደና።✝2:6 ዛረ. 10:17 7 ሽን ጉየፐ ጾሳይ ጰጽሮሳዉ፥ አይሁዳቶ ምሽራቹዋ ቃላ ኦድያ ሀዳራ እሜዳዋዳን፥ ታዉካ አይሁዳ ግደና አሳዉ ምሽራቹዋ ቃላ ኦድያ ሀዳራ እሜዳዋ ኡንቱንቱ በኤድኖ። 8 አያዉ ጎፐ፥ ጰጽሮስ አይሁዳቶ የሱስ ኪቴዳዋ ግዴዳዋዳን፥ ታንካ ጾሳ ዎልቃን አይሁዳ ግደና አሳዉ የሱስ ኪቴዳዋ ግዳድ። 9 ቃይ ካለያዋንታ ማላቲደ ቤትያዋንቱ፥ ያቆብ፥ ጰጽሮስነ ዮሃንስ፥ ታዉ እመቴዳ አ ኬካተ ኤሪደ፥ ታናነ ባርናባሳ ኑ ኩሽያ ኦይቂደ ሳሮቴድኖ። ታንነ ባርናባስ አይሁዳ ግደና አሳ ግዶን ኦናዳን፥ ቃይ ኡንቱንቱ አይሁዳቱዋ ግዶን ኦናዳን ቃቺደ ደንዴዶ። 10 ኡንቱንቱ ኑና ካሰፐካ ታን ኦናዉ ቆፓደ ደእያ ህዬሳቱዋ ማዳናዋ ጻላላ ቆፍሴድኖ።

ጳዉሎስ አንጾክያን ጰጽሮሳ ትምርትያ ጳልቄዳ

11 ሽን ጰጽሮስ አንጾክያ ግያ ካታማ ዬዳ ዎደ፥ እ ባይዜዳ ድራዉ፥ ቆንጭያን ታን አ፥ "ኔን ባይዛንቻ" ያጋድ። 12 አያዉ ጎፐ፥ ያቆባ ማታፐ ኪተቴዳ አማሬዳ አሳይ ያናፐ ካሰ አይሁዳ ግደና አሳቱዋና ቁማ ሜ፤ ሽን ኡንቱንቱ ዬዳዋፐ ጉይያን፥ አይሁዳ ግደናዋንቱ አማንያዋንታ ግዳናዉ ቃጻረታናዉ ኮሼ ግያዋንቶ ያዬዳ ድራዉ፥ ምያዋ ኤሲደ፥ አይሁዳ ግደናዋንቱፐ ሻከቴዳ። 13 ቃይ የኮ አማኔዳ አይሁዳቱ ጰጽሮሳና ያሻ ዶሜድኖ፤ ሀራይ አቶ ባርናባስካ ኡንቱንቱና ያሻንቻ ግዴዳ።

14 ሽን ኡንቱንቱ ምሽራቹዋ ቃላ ቱማተዳን፥ ሱረ ሀመተናዋ በኣደ፥ ጰጽሮሳ ሄ ኡባ አሳ ስንን፥ "ኔን ጾሳ አሳ አይሁዳ ግዳደ፥ ኡንቱንቱዳን ግደናን ጾሳ አሳ ግደና አይሁዳ ግደናዋንቱዳን ደኣ፤ ሽን ያትና፥ ዎታደ አይሁዳ ግደናዋንታ፥ ‘አይሁዳቱዋዳን ደእተ’ ጋደ ግዳይ?" ያጋድ።

አይሁዳቱካ አይሁዳ ግደናዋንቱካ አትያዌ አማኑዋና

15 ኑን የለታን አይሁዳ፤ "ናጋራንቻ ግዴዳ አይሁዳ ግደና አሳቱዋ" ግዶኮ። 16 ሄዋ ግዶፐካ፥ አሳይ የሱስ ክርስቶሳ አማኒደ ጾሳ ስንን ጽላናፐ አትን፥ ሙሴ ህግያ ናጉዋን ጽለናዋ ኤሬዶ፤ አሹዋ ማዬዳ አሳይ ኡባይ ሙሴ ህግያ ናጉዋን ጽለና ድራዉ፥ ኑን ኑ ሁጰዉካ ሙሴ ህግያ ናጉዋን ግደናን፥ ክርስቶሳን አማኒደ ጽላና ማላ፥ ክርስቶስ የሱሳን አማኔዶ።✝2:16 ማዝ. 143:2፤ ሮመ 3:20፣ 22

17 ሽን ኑዉ ክርስቶሳን ደእያ እትፐተን ጽላናዉ ኮይያዋንታ ግዲደ፥ ኑ ሁጰዉ ናጋራንቻ ግዲደ ቤቶፐ፥ ያትና ክርስቶስ ናጋራ ታማርስያዌ? ሄዌ ሙለካ ዎርዶ! 18 አያዉ ጎፐ፥ እት ካላካ አጋ ድጌዳዋ ታን ላኤንዋ ኦያዋ ግዶፐ፥ ታን ታ ሁጰዉ ህግያ መንያዋ ግድያዋ ኤርሳይ። 19 ታን ጾሳዉ ፓጻ ደአና ማላ፥ ህግያ ባጋና ህገዉ ሀይቃድ። 20 ታን ክርስቶሳና አ ማስቃልያ ቦላ ምስማርያን ሸታደ ካቀታድ፤ ስም፥ ሀእ ፓጻ ደእያዌ ታና ግድከ። ሽን ክርስቶስ ታ ግዶን ደኤ፤ ታን ሀእ ደእያ ደኡ፥ ታና ሲቂደ፥ ታ ድራዉ፥ ባረ ሁጲያ እሜዳ ጾሳ ናኣን ደእያ አማኑዋና። 21 ታን ጾሳ አ ኬካተ እጽከ፤ አሳይ ህግያ ባጋና ጽሎተ ደምያዋ ግዶፐ፥ ክርስቶስ ጮ መላ ሀይቄዳ ጉሳ።