1 አኬካይ ባይና ጋላትያ አሳቶ፥ ታን ህንተና ክርስቶስ ማስቃልያ ቦላን ምስማርያን ሸቲደ ካቀቴዳዋ ቆንጭሳደ ታማርሳድ። ያትና፥ ቱሞ ህንተ ኤኖ ጌና ማላ፥ ህንተንታ ብቴዳዌ ኦኔ? 2 አነ ታዉ ሀ እት የዉዋ ጻላላ ኦድተ: ጾሳ አያና፥ ህጊ ግያዋ ናጊደ አኬድቴ ዎይ አማኑዋን ስሲደ አኬድቴ? 3 ህንተንቱ ሄዋ ኬና ኤዬ? ጾሳ አያናን ደኡዋ ዶሚደ፥ ሀእ ህንተ ዎልቃን ፖሊቴ? 4 ህንተንቱ ዳቡራ ኡባዉ አይነ ማዱ ባዌ? ቱማ ማዱ ደኤ። 5 ያትና፥ ጾሳይ ህንተንቶ ጌሻ አያና እምያዌነ ህንተ ግዶን ማላታ ኦያዌ፥ ሙሴ ህግያ ህንተ ኦዳ ድራሴ? ዎይ ምሽራቹዋ ቃላ ስሲደ፥ ህንተ አማኔዳ ድራሴ?

6 ሀዋዳንካ፥ አብራሃሞ ጾሳ አማኔዳ ድራዉ፥ ጾሳይ አ ጽሉዋዳን ጼሌዳ። 7 ሄዋ ድራዉ፥ አማንያዋንቱ አብራሃመ ዛረ* ግድያዋ ኤርተ።✝ 8 ጾሳይ አይሁዳ ግደና አሳ አማኑዋን ጽልሳናዋ ጾሳ ማጻፋይ ካሰት በኢደ፥ "ሀ አላምያን ደእያ አሳይ ኡባይ ኔናን አንጀታና" ያጊደ፥ ምሽራቹዋ ቃላ አብራሃሞ ካሰቲደ ኦዴዳ።✝ 9 ሄዋ ድራዉ፥ አብራሃሞ አማኒደ አንጀቴዳዋዳን፥ አማንያዋንቱ አዋዳካ አንጀታና።

10 ህግያ ኦሱዋን አማነቲደ ደእያዋንቱ ኡባይ ሸቃ ግዶን ደኢኖ፤ አያዉ ጎፐ፥ ጾሳ ማጻፋይ፥ "ህግያ ማጻፋን ጻፈቴዳ ኡባባን ደኤናዌነ ፖለናዌ ኦንነ ሸቀቴዳዋ" ያጌ። 11 ጾሳ ማጻፋይ፥ "ጾሳ ስንን ጽላቱ አን አማነቲደ ደኡዋን ደአና"* ግያ ድራዉ፥ ኦንነ ጾሳ ስንን ህግያ ናግያዋን ጽለናዌ ኤረቴዳዋ። 12 ህጊ አማኑዋን ባሰት ኤቂቤና፤ ሽን ጾሳ ማጻፋይ፥ "ህጊ ግያዋ ፖልያዌ አን ደኡዋን ደአና" ያጌ።✝

13 ጾሳ ማጻፋን፥ "ም ቦላ ካቀት ሀይቂያ ኦንነ ሸቀቴዳዋ" ጌተት ጻፈቴዳ ድራዉ፥ ክርስቶስ ኑ ድራዉ ሸቀቴዳዋ ግዲደ፥ ኑና ህግያ ሸቃፐ ዎዝ አኬዳ።✝ 14 ክርስቶስ ሄዋ አያዉ ኦዴ ጎፐ፥ ጾሳይ እማና ጎፐ፥ ጌሻ አያና ኑን አማኑዋን አካናዳንነ አብራሃመ አንጁ ባረ ባጋና አይሁዳ ግደና አሳ ጋካና ማላ ጊደ ኦዳ።

15 ታናዳን አማንያዋንቶ፥ ታን አሳይ ግያዋዳን ህንተንቶ ጋይ፤ ሀራይ አቶ ላኡ አሳቱ እት የዉዋ ሃሳዪደ፥ ጫቁዋ ዎዳዋፐ ህን ባጋን፥ ኦንነ ሄ ጫቁዋ ብላናዉ ዎይ ሀራባ ሄ ጫቁዋ ቦላ ጉጃናዉ ዳንዳየና። 16 አብራሃሞነ አ ዛሪ ጾሳይ ስንፐ እማና ጊደ ሃሳዬዳዋ ስሴድኖ። ጾሳ ማጻፋይ ጮራ አሳዉ ሃሳይያዋዳን፥ "ነ ዘረቶ" ጌና፤ ዋጊ ጎፐ፥ "ነ ዛረዉ" ያጌ። ሄዌነ፥ እት አሳ ጻላላ ጌ፤ እካ ክርስቶሳ።✝

17 ታን ግያዌ ሀዋ፤ ጾሳይ አብራሃሞ ጫቂደ፥ ሀ ጫቁዋ ታን ናጋና ያጌዳ። ኦይዱ ጼታነ ሀታሙ ላይፐ ጉይያን ዬዳ ሙሴ ህጊ ጾሳይ ዎዳ ሀ ጫቁዋ ይሳናዉነ ስንፐ እማና ጊደ ሃሳዬዳዋ ድጋናዉ ዳንዳየና።✝ 18 አያዉ ጎፐ፥ ጾሳይ እምያ ላታይ ህግያን ቤትያዋ ግዶፐ፥ ያትና ጾሳይ ስንፐ እማና ጊደ፥ ቃላ ገሌዳዋና ግደና ግያዋ፤ ሽን ጾሳይ እማና ጊደ ቃላ ገሌዳዋን ላታ አብራሃሞ እሜዳ።

19 ያትና፥ ህጊ አያዉ ደኢ? ህጊ ባይዞ ኦሱዋ ግድያባይ አየንቶ በሳናዉ ጾሳይ እማና ጊደ ሃሳዬዳ አብራሃመ ዛሪ ያና ጋካናዉ ጉጀቴዳ፤ ኪታንቻ ባጋና ሙሴ ጋናትያዋን እመቴዳ። 20 ጋናይ እት ኡራ ጻላላሳ ግደና፤ ሽን ጾሳይ እቱዋ።

21 ያትና፥ ጾሳይ ስንፐ እማና ጊደ ሃሳዬዳዋ፥ እት ህጊ፥ "ሀነና" ያጊ? አአ! ሄዋ ጌና። አያዉ ጎፐ፥ ህጊ አሳዉ ደኡዋ እማናዉ ዳንዳይያባ ግዶፐ፥ ጽሎተይካ ቱሙ ህግያ አዛዘትያዋፐ ቤቴ ግያዋ። 22 ሽን የሱስ ክርስቶሳ አማንና፥ ጾሳይ ስንፐ እማና ጊደ ቃላ ገሌዳ ላአተይ፥ አማንያዋንቶ እመታና ማላ፥ አሳይ ኡባይ ናጋራዉ ሞደቲደ ደእያዋ፥ ጾሳ ማጻፋይ ኦዴ።

23 ሽን ካሰ ሀ አማኑ ያናዉ፥ ስንፐ ቆንጫና አማኖ ህጊ ኑና ቃሸቴዳ አሳዳን ጎርድ ዎዳ። 24 ሄዋ ድራዉ፥ ኑን አማኑዋን ጽላና ማላ፥ ክርስቶስ ያና ጋካናዉ ህጊ ኑና ናግያዋ ግዴዳ። 25 ሽን ሀእ ስም አማኑ ዬዳ ድራዉ፥ ህጊ ሀዋፐ ስንዉ ኑና ናግያዋ ግደና።

26 ህንተንቱ ኡባይ አማኑዋ ባጋና ክርስቶሳ የሱሳን እቱዋ ግዴዳ ጾሳ ናና። 27 አያዉ ጎፐ፥ ህንተ ክርስቶሳና እቱዋ ግዳና ማላ ጻማቀቴዳ ኡባቱ ክርስቶሳ ማዬድታ። 28 ሄዋ ድራዉ፥ አይሁዳ አሳ ግዶንነ ግሪከ አሳ ግዶን ዱማተይ ባዋ፤ አይልያ ዎይ ዎማኑዋ ግዶን ዱማተይ ባዋ፤ አቱማዋ ዎይ ማጫ አሳ ግዶን ዱማተይ ባዋ። አያዉ ጎፐ፥ ህንተንቱ ኡባይካ ክርስቶሳ የሱሳን እት አሳ። 29 ህንተንቱ ክርስቶሳዋ ግዶፐ፥ ስም ህንተንቱ አብራሃመ ዛረ፤* ቃይ ጾሳይ ስንፐ እማና ጊደ ቃላ ገሌዳዋ ላትያዋንታ።