ክርስቶሳን አይለተፐ ከሱሳ
1 ኑን አይለተይ ባይናን፥ ደአና ማላ፥ ክርስቶስ ኑና አይለተፐ ከሴዳ፤ ስም ምኒደ ኤቂተ፤ ላኤንዋ አይለተ ሞርገ ምን ዋጸቶፕተ።
2 ስስተ፥ ታን ጳዉሎስ፥ ህንተንታ ያጋይ፤ ህንተ ቃጻረትያዋ ግዶፐ፥ ክርስቶስ ህንተንታ አይነ ማደና። 3 ቃጻረትያ ኡባቱ ህጊ ግያዋ ኡባ ፖሊደ ናጋናዉ በስያዋ ጉጃደ ቆፈይ። 4 ህግያ ናጊደ ጽላናዉ ኮይያዋንቶ፥ ክርስቶሳፐ ሻከቴድታ፤ ጾሳ አ ኬካተፐካ ኩንዴድታ። 5 ኑና ግዶፐ፥ ኑን ጾሳ አያና ባጋና አማኑዋን ጽላናዉ ናሸቻን ናጌቶ። 6 አያዉ ጎፐ፥ ኑን ክርስቶስ የሱሳና እትፐ ደኦፐ፥ ሲቁዋን ኦያ አማኑዋፐ አትን፥ ቃጻረትናካ፥ ቃጻረተናን አግናካ ኑና አይነ ማደና።
7 ካሰ ሎኦ ዎጺታ፤ ሽን ቱማተዉ ህንተ ኤኖ ጌና ማላ፥ ኦኔ ህንተንታ ድጌዳዌ? 8 ሀ ጭሙ ህንተንታ ጼሴዳ ጾሳፐ ይቤና። 9 አሳይ ግያዋዳን፥ ጉ እርሹ ሙናቃ ኡባ ደን። 10 ህንተንቱ ሀራባ ቆፐናዋ ታን ጾሳን አማነታይ፤ ሽን ህንተንታ መትያ ኡራይ ኦና ግዶፐነ፥ ጾሳፐ ባረ ፕርዳ አካናዋ።
11 ሽን ታናዳን አማንያዋንቶ፥ ታን ሀዋ ጋካናዉ ቃጻራይ ኮሽያዋ ኦድያዋ ግዶፐ፥ ታና አያዉ የደርሲኖ? ሄዌ ቱማ ግዶፐ፥ ታን ክርስቶሳ ማስቃልያባ ታማርስና አይነ መትያባይ ባዋ። 12 ህንተንታ መቶያዋንቱ ባረንታ ባረንቶካ ጎይሬርክኖሻ!
13 ህንተንታ ግዶፐ፥ ታናዳን አማንያዋንቶ፥ አይለተፐ ከሳናዉ ጼሰቴድታ። ግዶፐነካ አይለተፐ ህንተ ከሴዳዋን፥ ህንተ አሳተ አሙ ህንተንታ ሞዶፖ። ሄዋ ድራ ሲቁዋን እቱ እቶ ሞደትተ። 14 አያዉ ጎፐ፥ ህጊ ኡባይ እት ሃሳያን ቃሸቴዳ፤ እካ፥ "ነ ሾሩዋ ነ ሁጲያዳን ሲቃ" ያግያዋ።5:14 ዎጋ 19:18 15 ሽን ህንተ እቱ እቱዋና ሳኤትያዋነ ሜተትያዋ ግዶፐ፥ ህንተ ህንተ ግዶን ዉረና ማላ ናገትተ።
አያናነ አሹዋ
16 ሽን ስስተ፤ ጾሳ አያናይ ህንተንታ ካለያዋ ግዶፐ፥ ህንተ አሹዋ አሙዋ ሙለካ ፖልክታ። 17 አያዉ ጎፐ፥ ኑ አሹ አሞትያዋ ጌሻ አያናይ እጼ፤ ቃይ ጌሻ አያናይ አሞትያዋ ኑ አሹ እጼ፤ ሀዋንቱ እቱ እቱዋና እጸቲኖ። ሄዋ ድራዉ፥ ህንተ ዶስያዋ ኦናዉ ዳንዳይክታ። 18 ሽን ጾሳ አያናይ ህንተንታ ካለያዋ ግዶፐ፥ ሙሴ ህጊ ህንተንታ ሞደና።
19 አሹዋ ኦሱ ኤረቴዳዋ፤ እካ አዬ ጎፐ፥ ዎሹምያዋ፥ ቱናተ፥ አዳ ቱናተ ኦሱዋ፥ 20 ኤቃዉ ጎይንያዋ፥ ብትያዋ፥ ሞርከተ፥ ፓሉማ፥ ቃናትያዋ፥ ሀንቁዋ፥ ባረና ዶስያዋ፥ ዋላቀትያዋ፥ እቱ እቱዋፐ ሻከትያዋ፥ 21 አሳዋ አሞትያዋ፥ ማትያዋ፥ የንቻ ግድያዋነ ሀዋንታ ማላትያዋንታ። ካሰካ ታን ህንተንቶ ኦዴዳዋዳን፥ ሀዋንታ ማላትያዋንታ ኦያዋንቶ ጾሳ ካዉተን ገልያሳይ ባዋ።
22 ሽን ጌሻ አያና አይፊ፥ ሲቁዋ፥ ናሸቻ፥ ሳሮተ፥ ዳንዳያ፥ ኬካተ፥ ሎኦተ፥ አማነትያዋ፥ 23 አሽከተ፥ ባረ ሁጲያ ናግያዋ። ሄዋንታ ማላትያዋንታ ድግያ ህጊ ባዋ።
24 ክርስቶሳ የሱሳባ ግድያዋንቱ ባረንቱ አሳተ አ ኢታ ቆፋናነ አ አሙዋና እትፐ ማስቃልያ ቦላን ምስማርያን ሺደ ካቄድኖ። 25 ኑዉ ጌሻ አያናይ ደኡዋ እሞዋፐ ጉይያን፥ ኑና ቃይ እ ካለ። 26 አነ ኦቶረትያዋ፥ ዎይ እቱ እቱዋ ሀንቀያዋ፥ ዎይ እቱ እቱዋ ቃናትያዋ አጎይተ።