1 ታናዳን አማንያዋንቶ፥ ህንተናን ጌሻ አያናን ደእያዋንቱ እት ኡራይ አይ ባይዙዋ ኦደ፥ ቤቶፐካ፥ አሽከተ አያናን አ ሱርስተ፤ ቃይ ህንተ ፓጨተና ማላ፥ ህንተ ሁጲያ ናግተ። 2 እቱ እቱዋ ቶኩዋ ቶክተ፤ ሄዋ ኦያዋን ክርስቶሳ ህገዉ አዛዘቲታ። 3 አያዉ ጎፐ፥ እት ኡራይ አይነ ሀነናን ደኢደ፥ እትባ እ ሀኔዳዋ አዉ ማላቶፐ፥ ባረ ሁጲያ ጭሜ። 4 ሽን አሳይ ኡባይ ሁጲያን ሁጲያን ባረ ኦሱዋ ፓጮ፤ ሄዋፐ ጉይያን፥ ሀራ አሳዋና ልከናን፥ ባረ ሁጰ ኦሱዋ ጻላላን አማነትያዋ ደማና። 5 አያዉ ጎፐ፥ አሳይ ኡባይ ሁጲያን ሁጲያን ባረፐ ናገትያዋ ኦና በሴ።

6 ሽን ጾሳ ቃላ ታማርያዌ ባረዉ ደእያ ሎኦባ ኡባ ባረና ታማርስያዋና ሻኮ።

7 ህንተንታ ህንተረካ ጭሞፕተ። ኦንነ ጾሳ ቦላ ቅሊጫናዉ ዳንዳየና፤ አያዉ ጎፐ፥ አሳይ ባረ ዘርያዋ ዛረደ ቆይጫና። 8 ባረ አሹዋ አሙዋን ዘርያዋ ግዶፐ፥ አሹዋ አሙዋፐ ሀይቁዋ ቆይጫና። ሽን ጾሳ አያናን ዘርያዋ ግዶፐ፥ ጾሳ አያናፐ መና ደኡዋ ቆይጫና። 9 አነ ሎኦ ኦሱዋ ኦናዉ ምኖይተ። አያዉ ጎፐ፥ ኑን ምን ኦፐ፥ ቆይጭያ ዎዲ ስንፐ ያናዋ። 10 ሄዋ ግዶፐ ሀ ኦናዉ ኑን ዳንዳይያዋን፥ አሳ ኡባዉ ሎኦባ ኦይተ፤ ሽን ኡባፐ አደ፥ ኑናና አማኑዋን ደእያዋንቶ ሎኦባ ኦይተ።

11 ታን ታ ኩሽያን፥ አይ ማላ ዎልቃማ ፕዶላቱዋን፥ ሀዋ ህንተንቶ ጻፋድታንቶ በእተ። 12 አሳ ስንን ሎኢደ ቤታናዉ ኮይያ ኡባቱ፥ ህንተ ቃጻረታና ማላ ኮዪኖ፤ ሽን ሄዋ ኡንቱንቱ ኦያዌ ባረንቶ ክርስቶሳ ማስቃልያ ድራዉ የደርሰተናን አታና ጻላላሳ። 13 አያዉ ጎፐ፥ ኡንቱንቱ ህንተ ቃጻረቴዳዋን ጬቀታናዉ ህንተንታ ቃጻረትኖ ጊኖፐ አትን፥ ሀራይ አቶ ቃጻረቴዳዋንቱካ ባረንቱ ሁጰዉ ሙሴ ህግያ ናግክኖ።

14 ሽን አላሚ ታዉ ካቀትና፥ ታንካ አላመዉ ካቀቴዳ የሱስ ክርስቶሳ ማስቃልያፐ አትን፥ ታን ጬቀትያባይ ሀራባይ ታፐ ሃኮ። 15 አያዉ ጎፐ፥ ክርስቶስ የሱሳን ኦራ መታ ግድያዌ ማዴፐ አትን፥ ቃጻረትናካ ቃጻረተናን አግናካ አይነ ማደና። 16 ሀ ዎጋን ሀመትያ ኡባቱዋ ቦላንነ ጾሳ አሳ ኡባ ቦላ፥ ሳሮተይነ ማሮተይ ግዶ።

17 ታን የሱሳዉ ማይቴዳ ማላ ታ ቦላን ቶኬዳ ድራዉ፥ ሀዋፐ ስንዉ እት አሳይካ ታና መቶፖ።

18 ታናዳን አማንያዋንቶ፥ ኑ ጎዳ የሱስ ክርስቶሳ አ ኬካተይ ህንተንቱና ግዶ። አመንእ።