1 ትምቢትያ ኦድያ እምባቆም ማዝሙርያዳን የጺደ፥ ዎሴዳ ዎሳይ ሀዋ፦

2 አቤት መና ጎዳዉ፥ ኔን ካሰ ኦዳዋ ታን ስሳደ ያያድ። አቤት መና ጎዳዉ፥ ኑ ዎድያንካ ሄ ኦሶቱዋ ዛረደ ኦ፤ ኡንቱንቱ ኑ ዎድያንካ ኤረትኖ። ኔን ሀንቀያ ዎደ ነ ማሮታ ቆፓ።

3 ጾሳይ ተማና ግያ ሳኣፐ ዬ፤ ሄ ጌሻይ ፓራና ደርያፐ ዬ። አ ቦንቹ ሳሉዋ ካሜዳ፤ አ ጋላታይካ ሳኣ ኩሜዳ። 4 አ ጶለይካ አዋ ፖኡዋ ማላ፤ አ ዎልቃይ ቆሰት ኡቴዳ አ ኩሽያፐ ፖዡ ግያ ፖኡ ከሴ። 5 ጾሳይ ኢታ ሀርግያ ባረፐ ስንዉ ኪቴ፤ ሀይቁዋካ ባረ ጌዱዋ ካለ። 6 እ ኤቂደ ቢታ ቃዳ። ቃይ እ ጼሊደ ካዉተቱዋ ኮኮርሴዳ። መናደፐ ደኤዳ ደረቱ መኤረቴድኖ፤ ቃይ እ ኡንቱንቱ ቦላን ሀመትያ በኒደፐ ደኤዳ ደረቱካ ላለቴድኖ። 7 ታን ቶጵያ አሳይ ቱጋትሽን በኣድ፤ ምድያማ ቢታ አሳይካ ኮኮርሺና በኣድ።

8 አቤት መና ጎዳዉ፥ ኔን አያዉ ሀንቀታዲ? ሻፋቱ ኔና ሀንቀሴድኖ? ዎይ አባ ቦላ ሀንቁዋ ኤጻ ከሳዲ? ቱይት፥ ኔን ነ ፓራቱዋነ ነ ፓራ ጋረቱዋ ቶጌዳዌ ነ አሳዉ ጾኑዋ እማናሳ። 9 ኔን ነ ዎንዳፍያ ጊግሳዳ፤ ፖቱዋ ዱካናዉ ዳፋዳ። ቢታ ጳልቃደ ሃ ከሳዳ። 10 ደረቱ ኔና በኢደ፥ ያሻዉ ኮኮሬድኖ፤ ሃ ክጻይካ አዳ። ቃይ ሃ ጪማቱካ ዋሲኖ፤ ዋሲደ ባረንቱ ዳምባላ ሃ ሃ ዳርሴድኖ። 11 እ ጾንጊደ የዴዳ ፖቱ ፖኡዋንነ ነ ቶራቱዋ ጶለን አዋይነ አግናይ ባረንቱ ደእያ ሳን ደእያ ሳን ኤቄድኖ።

12 ኔን ሀንቀታደ ቢታ ኡባን ዩያዳ፤ ካዉተቱዋካ ሀንቁዋን የዳ። 13 ኔን ነ አሳ አሻናዉነ ነ ኦከቴዳዋ አሻናዉ ከሳዳ፤ ኢታቱዋ ካፑዋ ሾጫዳ፤ አ ማዩዋ ቃራደ አ ካሎ ጺራ አሻዳ። 14 አ ኦላንቻቱዋ ጋዳዋ ኔን አ ቶራን አ ጫዳዳ። ኡንቱንቱ ኑና ላላናዉ ጎትያዳን ዪኖ፤ መቶታንቻካ ጌማን ምታናዉ ዶሲኖ። 15 ኔን ነ ፓራቱዋን አባ የደ አያ ዎደ፥ ዳሮ ሃይ ሆሙዋ ጎፑ ጌ።

16 ታን ሀዋ ኡባ ስስና፥ ታ ቦላይ ጋጅ ጋጄዳ፤ ታ መተርሻይ ኮኮሬዳ፤ ታ መቀይካ ዎቄዳ፤ ታ ገደቱካ ቃይ ጉንዴድኖ። ኑና ቱጋይያዋንታ ጾሳይ ሙራና ጋካናዉ፥ መቱዋ ጋላሳ ታን ዳንዳያን ናጋና።

17 ባላስያ ግያ ምይ አይፋና ዮፐካ፥ ዎይንያ ቱራን አይፊ ዮፐካ፥ ዎጋራይ አይፈናን እጾፐካ፥ ጋዲ ካ ሞከናን እጾፐካ፥ ስኩዋን ዶርስ ዮፐካ፥ ቃይ አቁዋን መሂ ዮፐካ፥ 18 ሄዌ ኡባይ ዮፐካ፥ ታን መና ጎዳን ናሸታና፤ ታና አሽያ መና ጎዳን ታን ናሸቻ ፖጩ ጋና። 19 ኡባ ሞድያ መና ጎዳይ ታዉ ዎልቃ፤✝ ታ ገድያ ጋራ ገድያዳን ምንሴ፤ ታን ቃ ሳአቱዋን ሄመታናዉ ታና ዳንዳይሴ።

(የጽያዋንታ ካለያዋ ሀሳይስያዋ: ሀ ማዛሙሪ ዲጽያዋ ዲጺደ የጽያ ማዝሙርያ።)