ዮናሳ 1

ዮናስ ጎዳፐ ባቃቱሳ

1. 1 መና ጎዳ ቃላይ አሚታያ ናኣ ዮናሳኮ ሀዋዳን ያጊደ ዬዳ፤✝1:1 2 ካታ. 14:25 2 "ደንዳ! ሄ ዎልቃማ ካታማ ነነዌ ባ፤ ባደ ሄ ካታማ አሳ ኢታተይ ታ ስን ጋኬዳ ግሻዉ፥ ኡንቱንቶ ማርካታ" ያጌዳ። 3 ሽን ዮናስ መና ጎዳ ስንፐ ባቃቲደ፥ ታርሴሰ ግያ ጋድያ ባናዉ ደንዴዳ፤ እ ዮጰ ካታማ ዎደ፥ ታርሴሰ ብያ ማርካብያ ደሜዳ። መና ጎዳ ስንፐ ባቃቲደ፥ ኡንቱንቱና ታርሴሰ ባናዉ ሚሻ ጭጊደ፥ ማርካብያን ገሌዳ።

4 ሽን ማርካቢ ቢሽን፥ መና ጎዳይ አባ ቦላ ዎልቃማ ጫርኩዋ ደንዳ፤ ደንና አባ ቤታይ ሎይ ዳሬዳ ግሻዉ፥ ማርካቢ መአና ሀኔዳ። 5 ያትና፥ ማርካብያ ላግያዋንቱ ያዪደ፥ ኡባይካ ባረንቱ ጾሳኮ ጾሳኮ ዋሴድኖ። ቃይ ማርካቢ ካዉሻና ማላ፥ አ ግዶን ደእያ ጫና ደንደ፥ አባን ኦሌድኖ። ሽን ዮናስ ማርካብያዉ ግዶ ክፍልያ ገሊደ፥ ያን ግሲደ፥ ገምእሹዋ ፓኑሬዳ።

6 ማርካብያ ካፑ ገምእሻድ ቢደ፥ "አያዉ ገምእሻዲ? ደንዳ፥ ነ ጾሳ ዎሳ! ኦን ኤሪ፥ እ ባረ ሎኦ አይፍያን ጼሊደ፥ ኑና አሻናዌንቶነ" ያጌዳ።

7 ማርካብያ ላግያዋንቱ እቱ እቶ ሀዋዳን ያጌድኖ፤ "ሃይተ፤ ሀ ኢታባይ ኑና ኦ ጋሱዋን ጋከደንቶነ ኤራናዉ ሳማ የጎይተ" ያጌድኖ። ሳማ የግና፥ ሳማይ ዮናሳ ቦላን ዎዳ። 8 ኡንቱንቱ ዮናሳ ሀዋዳን ያጊደ ኦቼድኖ፤ "ሀ ኢታባይ ኦ ጋሱዋን ኑ ቦላ ጋከደንቶነ፥ አነ ኑዉ ኦዳ። ነ ኪታይ አዬ? ሀቃፐ ያድ? ነ ጋዲ ሀቄ? ኔን ኦ ዛረ?" ያጌድኖ።

9 ዮናስ ዛሪደ፥ ሀዋዳን ያጌዳ፤ "ታን እብራዌ አሳ፤ አባነ ጋድያ መዳ መና ጎዳዉ፥ ሳሉዋ ጾሳዉ ጎይናይ" ያጌዳ።

10 መና ጎዳ ስንፐ እ ባቃትያዋ እ ኡንቱንቶ ኦዴዳባፐ አሳቱ ኤሬዳ ግሻዉ ያዬድኖ። አ፥ "ላ አይባ ፓላባ ኦዲ?" ያጌድኖ።

11 ቃይ አባ ቤታይ ካሰዋፐ ሃ ዳሬዳ ግሻዉ፥ አሳቱ ዮናሳ፥ "ኑዉ አባይ ዎፓና ማላ፥ ኔና ኑን ዋታነ?" ያጊደ ኦቼድኖ።

12 እ ኡንቱንቶ፥ "ሀ ዎልቃማ ቤታይ ህንተንቱ ቦላን ደንዲደ ታ ጋሱዋና ግድያዋ ታን ኤራይ። ሄዋ ግሻዉ፥ ታና ደንደ፥ አባን ኦልተ። ያቶፐ፥ አባይ ህንተንቶ ዎፑ ጋናዋ" ያጌዳ።

13 ሽን ማርካብያ ላግያዋንቱ ማርካብያ ጉየ አባ ዶናዉ ከሳናዉ ዎልቃፐ ባጸቴድኖ፤ ግዶፐነ፥ አባ ቤታይ ሎይ ዳሬዳ ግሻዉ፥ ከሳናዉ ዳንዳይበይክኖ። 14 ሄዋ ግሻዉ፥ ኡንቱንቱ ሀዋዳን ያጊደ፥ መና ጎዳኮ ዋሴድኖ፤ "አቤት መና ጎዳዉ፥ ሀ ብታንያ ሸምፑዋ ግሻዉ፥ ኔን ኑና ይሰናዳንነ ሀ ጌሻ ሱ አጩዋ ኔን ኑፐ አቼናዳን፥ ኑን ኔና ምንሲደ ዎሴቶ። አያዉ ጎፐ፥ መና ጎዳዉ፥ ኔን ነ ኮዮዋዳን ኦዳ" ያጌድኖ።

15 ሄዋፐ ጉየ፥ ዮናሳ ደንደ፥ አባን ኦሌድኖ፤ ኦልና አባ ቤታይ ዎፑ ጌዳ። 16 ያትና፥ አሳቱ መና ጎዳዉ ሎይ ያዬድኖ፤ መና ጎዳዉ ያርሹዋ ያርሼድኖ፤ ሺቁዋካ ሺቄድኖ።

17 ዮናሳ ምታና ማላ፥ እት ዎልቃማ ሞልያ መና ጎዳይ ጊግሴዳ፤ ሄ ሞልያ ኡሉዋን ዮናስ ሄዙ ጋላሳነ ሄዙ ቃማ ደኤዳ።✝1:17 ማቶሳ 12:40