ናጋራፐ ስመና ኡባይ ያና
1 ሄ ዎድያን እት እት አሳቱ የሱሳኮ ዪደ ጵላጾስ ጋሊላ አሳ ዎደ ኡንቱንቱ ሱ ያርሹዋና እትፐ ዋላኬዳዋ አዉ ኦዴድኖ። 2 የሱስካ ዛሪደ፥ "ሀዋንቱ ጋሊላ አሳቱ ሀይቄዳ ድራዉ፥ ያትና ኡንቱንቶ ሀራ ጋሊላ አሳ ኡባፐካ አደ ናጋራንቻቱዋ ግዶዋንታ ማላቲኖ? 3 ታን ያጋይ፥ ሀዋዳን ግደና፤ የዉዋን ቃይ ህንተ ናጋራ ፓጺደ ናጋራፐ ስመናን እጾፐ፥ ህንተንቱ ኡባቱካ ሄዋዳን ሀይቂታ። 4 ዎይ ሳልሆማ ግምቢ ኡንቱንቱ ቦላ ኩንዲደ፥ ዎዳ ታማነ ሆስፑን አሳቱዋ የሩሳላመን ደእያዋንቱ ኡባፐ አደ ናቆዋንታ ማላቲኖ? 5 ሀዋዳን ግደና ያጋይ፤ የዉዋን ቃይ ናጋራ ፓጻና ዮፐ ኡባቱካ ሀዋዳን ባያንታ" ያጌዳ።
6 የሱስካ ሀዋዳን ያግ ሌምሱዋ ኦዴዳ፥ "እት ብታነዉ ዎይንያ ቱራ ጎሻ ጋደን ቶከቴዳ ባላስያ ጌተትያ አይፊ ሜተትያ ምታ ደአዉ፤ ሄ ብታኒካ ምታ አይፋደንቶነ ጊደ ዬዳዌ፥ አይኔካ አይፍያ ደምቤና። 7 ዎይንያ ቱራ ናግያዋ እ፥ ‘ታን ሀ ባላስያ ጌተትያ ምትፐ አይፍያ ደማናዉ ሄዙ ላይ ስመረታደ አያነ ደማበይከ። ሄዋ ድራዉ ደካ ደን ድጋ፤ አያዉ ቢታ ጮ መልሳይ?’ ያጌዳ። 8 ናግያዌካ ዛሪደ፥ ‘ጎዳዉ፥ ታን እ ዩሹዋ ሀሩማናዉነ ፕቱዋ ኦላናዉ፥ ሀ ላይ ጻላላዉ ባሻ። 9 ስንዉ አይፎፐ ሎአ፤ ሽን አይፈናን እጾፐ ደከቱ’ ጌዳ" ያጌዳ።
የሱስ ቁና ምሽራቶ ሳምባታ ጋላሳ ፓዳ
10 የሱስካ እት ሳምባታ ጋላስ አይሁዳ ዎሳ ጎላቱዋፐ እቱዋን ታማርስ ደኤ። 11 ሄዋንካ ታማነ ሆስፑን ላይ ኩመን ቱና አያናይ ቁንሴዳ ምሽራታ ደአዉ። እዛካ ሱራደ ኤቃናዉ አይነ ዳንዳያበይኩ። 12 የሱስካ እዞ በኤዳ ዎደ ጼሲደ፥ "ሀ ምሽራቴ፥ ነ ሀርግያፐ ፓጻዳ" ያጌዳ። 13 የሱስ ባረ ኩሽያ እዝ ቦላ ዎና፥ ሄ ዎደ ሱራ ስት ጋ ኤቃደ ባረ ጾሳ ጋላታዱ።
14 ሽን አይሁዳ ዎሳ ጎለ ካፑ ቃይ የሱስ ሳምባታን ፓዳዋ ድራዉ ሀንቀት ዛሮዋሽን አሳቱዋ፥ "ኪተታናዉ በስያ ኡሱፑን ጋላሳቱ ደኢኖ፤ ሄ ጋላሳቱን ዪደ ፓጽተፐ አትን ሳምባታን ግደና" ያጌዳ።13:14 ከሳ 20:9፣ 10፤ ዛረ. 5:13፣ 14
15 ጎዳይካ ዛሪደ፥ "ሀ ሎአ ማላትያ ኢታ አሳቶ፥ ህንተንቱፐ እቱካ ሳምባታ ጋላስ ቦራ ማጋዱዋፐ ዎይ ሀርያ ጋጻታፐ ብሊደ ሃ ኡሻናዉ አፈኔ? 16 ሀና አብራሃሞ ያራ ግዴዳዉና፥ ታማነ ሆስፑን ላይ ኩመን ጻላሂ ቃቼዳዉና ሳምባታ ጋላስ ሄ ቃሹዋፐ ብለታናዉ በሰኬ?" ያጌዳ። 17 ሀዋ ኦዴዳ ዎደ ኤቀትያዋንቱ ኡባይ ዬላቴድኖ፤ አሳይ ኡባይ ቃይ እ ኦዳ ማላልስያ ኦሱዋን ኡባን ናሸቴድኖ።
ሳናፍጭያ አይፍያ ዘረ ሌምሱዋ
18 የሱስካ፥ "ጾሳ ካዉተይ አያ ማላቲ? እ አያ ማላትንቶ፥ ታን ህንተንታ ዎታ በሶ? 19 ጾሳ ካዉተይ ሳናፍጭያ ጌተትያ ቄር ምት አይፍያ ማላቴ። ሄ ምት አይፍያ አሳይ አኪደ ጎሻ ጋርሳን ዘሬዳ፤ ዘረቶና ድጫደ ዎጋ ም ግዳዱ፤ ያትና ሳሉዋ ካፋቱካ እዝ አጫ ቦላ ባረንቶ ጎልያ ኬጼድኖ" ያጌዳ።
እርሹዋ ሌምሱዋ
(ማቶሳ 13:33)
20 የሱስካ ዛሪደ፥ "ጾሳ ካዉተይ አያ ማላትንቶ፥ ታን ህንተንታ ዎታ በሶ? 21 እት ምሽራታ ሄዙ ከርያ ልያ አካደ፥ ሙናቄዳ ሙናቃይ ኡባይ ደንዳና ጋካናዉ፥ አን ትጌዳ እርሹዋ ማላቴ" ያጌዳ።
ኡንአ ፐንግያባ
(ማቶሳ 7:13፣ 14፣ 21፣ 22)
22 ሄዋፐ ካላ የሱስ የሩሳላመ ቢደ፥ ዎጋ ካታማንነ ቄር ካታማን ደእያ አሳ ታማርሲደ አዳ። 23 ሄ ዎደ እት ብታኒ ሺቂደ አ፥ "ጎዳዉ፥ ጾሳ ፕርዳፐ አትያዋንቱ ጉ አሳ ጻላሌ?" ያጌዳ።
ሄዋፐ ጉየ የሱስ ኡንቱንታ፥
24 "ታን ህንተንቶ ኦዳይ፤ ኡንአ ፐንግያና ገላናዉ ባጸትተ። ጮራ አሳይ ገላናዉ ኮዪኖ፤ ሽን ዳንዳይበይክኖ። 25 ጎልያዉ ደንዲደ፥ እፍ ቃቾዋፐ ጉየ ህንተንቱ ካረን ኤቂደ፥ ‘ጎዳዉ፥ ጎዳዉ፥ ኑዉ ዶያርኪ’ ያጊደ ጼሳ ዶምያ ዎደ፥ እካ ዛሪደ፥ ‘ሀቃፐ ዬድተንቶ፥ ታን ህንተንታ ኤርከ’ ያጋናዋ።
26 "ሄ ዎደ ህንተንቱ፥ ‘ኑን ኔናና እትፐ ሜዶ፤ ኡሼዶ፤ ኔን ኑ ሄራንካ ታማርሳዳ’ ያጋናዋንታ።
27 "የሱስ ቃይ፥ ‘ታን ህንተንቶ ኦዳይ፤ ህንተንቱ ሀቃፐ ዬድተንቶ፥ ታን ህንተንታ ኤርከ፤ ኡባቱካ ማካላንቻቱ ታ ማታፐ ሃክተ’ ያጋናዋ።13:27 ማዝ. 6:8
28 "አብራሃሞ፥ ይሳቅ፥ ያቆብነ ናባቱ ኡባይ ህንተንቱ ካረን ኤቂሽን፥ ጾሳ ካዉተን ደእያዋንታ ህንተንቱ በእያ ዎደ፥ ህንተንቶ ዬኮነ አቻ ቁዋ ግዳናዋ።13:28 ማቶሳ 22:13፤ 25:30፤ 13:28፣ 29፤ ማቶሳ 8:11፣ 12
29 "አሳይ አዋይ ዶልያሳፐነ ዉልያሳፐ፥ ቃይ ክልባጋፐነ ህርክባጋፐ ዪደ፥ ጾሳ ካዉተ ጋይታን ኡቲኖ። 30 በእተ፤ ጉየቴዳዋንቱ፥ ስንታናዋንታ፤ ስንቴዳዋንቱ ቃይ ጉየታናዋንታ" ያጌዳ።13:30 ማቶሳ 19:30፤ 20:16፤ ማር. 10:31
የሱስ የሩሳላመን ኦዳባ
(ማቶሳ 23:37-39)
31 ሄ ዎደ ፓርሳዋቱዋፐ እቱ እቱ የሱሳኮ ዪደ፥ "ሄሮድሰ ኔና ዎናዉ ኮይያ ድራዉ፥ ሀዋፐ ባ ድጋ" ያጌድኖ።
32 የሱስ ዛሪደ፥ "ቢደ ሄ ዎራካናዉ፥ ‘ሀቼነ ዎንት ኢታ አያናቱዋ ከሳና፤ ሀርጋንቻቱዋካ ፓና፤ ሄዘን ጋላስ ታ ኦሱዋ ዉርሳና’ ያግተ። 33 ሀኖፐ አትን ናቢ የሩሳላመፐ ሀራሳን ሀይቃናዉ በሰና ድራዉ፥ ታን ሀቼ፥ ዎንትነ ዎንትፔሽ ኦግያ ቦላ ደአናዉ በሴ።
34 "የሩሳላመ ካታማ አሳዉ፥ የሩሳላመ ካታማ አሳዉ፥ ናባቱዋ ዎያዋንቶ፥ ህንተንቱኮ ኪተቶዋንታ ሹቻን ጫድያዋንቶ፥ ኩታታ ባረ ማራቱዋ ባረ ቀፍያፐ ጋርሳና ሺሻ ሀጵያዋዳን፥ ታን ህንተንቱ ናና እት ጋድያ ሺሻናዉ አፑ ገደ ኮያድታ! ሽን ታና ድጌድታ። 35 በእተ፤ ጾሳይ ህንተንቱ ጎልያ አይነ ኦልቤና፤ ታን ህንተንቶ ያጋይ፤ ህንተንቱ፥ ‘ጎዳ ሱንን ይያዌ አንጀቴዳዋ’ ጋና ጋካናዉ፥ ታና በእክታ" ያጌዳ።