1 ሳምባታ ጋላስ ፓርሳዋቱዋ ሱንቱዋፐ እቱዋ ጎለ የሱስ ቁማ ማናዉ ገሌዳ ዎደ፥ አያ ኪተትንቶ በአናዉ አሳቱ ናግ ደኢኖ። 2 ቦላይ ጋፍና መቶትያ እት ብታኒ የሱሳፐ ስንና ደኤ። 3 የሱስ ህግያ ታማርስያዋንታነ ፓርሳዋቱዋ፥ "ሳምባታን ፓናዉ ዳንዳየት ዳንዳየተኔ?" ጊደ ኦቼዳ።

4 ኡንቱንቱካ ጮኡ ጌድኖ። እ ሄ ብታንያ ቦላ ቦች ፓደ አ ሞይዜዳ። 5 የሱስ ኡንቱንታ፥ "ህንተንቱፐ ሀሪ ዎይ ቦራይ ኦላን ኩንድንቶ፥ ሳምባታ ጊደ ኤሌል ከሰናዌ ኦኔ?" ጌዳ።✝

6 ኡንቱንቱካ ሀ የዎ እት ዛሩዋነ እማናዉ ዳንዳይበይክኖ።

7 የሱስ ሾበቶዋንቱ ቦንቾሳ ዶርያ ዎደ ጼሊደ፥ 8 "ኦንነ ቡላቻ ጼሶፐ፥ ቦንቼቴዳሳን ኡቶፓ፤ ኦን ኤር ኔፐ አደ ቦንቼቶዌ ጼሰቴዳዋ ግዳናዋ።✝ 9 ኔናነ አነ ጼሳዌ ዪደ፥ ‘ሀዎ፥ ኡቱዋ አዉ ዬዳ’ ያግና፤ ሄ ዎድያን ዬላታደ ጻደና ደእያ ሳን ኡቱዋ ዶማሳ፤ 10 የዉዋን ቃይ ኔን ጼሴቶ ዎደ ኔና ጼሶዌ ዪደ፥ ‘ታ ላገዉ፥ ክል ቃሳን ኡታ’ ጋና ማላ፥ ባደ ኡባፐ ሆካሳን ኡታ፤ ሄ ዎደ ኔናና እትፐ ኡቴዳዋንቱ ኡባቱዋ ስንን ነዉ ቦንቹ እመታናዋ፤ 11 ባረ ሁጲያ ቁ ኦያ ኡባይ ቶሸታናዋ፤ ባረ ሁጲያ ቶችያዋንቱ ቁ ጊኖ" ያግ ሌምሱዋ ኡንቱንቶ ኦዴዳ።✝

12 የሱስ ባረና ጼሴዳዋ ዛሪደ፥ "ኔን ላጻ ዎይ ካዉዋ ጊግሴዳ ዎደ፥ ነ ላገቱዋ ዎይ ነ እሻቱዋ ዎይ ዱረ ነ ሾራቱዋ ጼሶፓ፤ አያዉ ጎፐ፥ ኡንቱንቱ ኔና ባረንቱ ታራን ጼሲደ ኩሽያ ጭጋና ዳንዳዪኖ። 13 ሽን አታልያባ ጊግሴዳ ዎደ፥ ህዬሳቱዋ፥ ጉንዳቱዋ፥ ዶማቱዋነ ቆቃቱዋ ጼሳ። 14 ኡንቱንቱ ነዉ ኩሽያ ዛራናዉ ዳንዳየናዋንታ ግድያ ድራዉ፥ ኔን አንጀታናሳ። ጽላቱ ሀይቁዋፐ ደንድያ ዎደ ጾሳይ ነዉ ኩሽያ ዛራናዋ" ያጌዳ።

15 የሱስ ሃሳያ ዉርስያ ዎደ፥ ቁማ ማናዉ ኡቶ አሳፐ እቱ ሀዋ ስሲደ፥ "ጾሳ ካዉተ ጋይታን ኡትያዌ አንጀቴዳዋ" ጌዳ።

16 የሱስካ ሀዋዳን ጌዳ፤ "እት ብታኒ ዳሮ ሎኦ ካዉዋ ጊግሲደ፥ ጮራ አሳቱዋ ጼሴዳ። 17 ካዉዋ ዎዲ ጋክና፥ ካሰ ጼሰቶዋንታ፥ ‘ሀእ ካዉ ጊጌዳ፥ ሃይተ’ ጊደ ጼሳና ማላ ባረ ጎለን ኪተትያ ቆማ ኡንቱንቱኮ ኪቴዳ። 18 ሽን ኡባቱካ እትፐ፥ ቤናዳን አጋና ማላ ዎሴድኖ፤ ኮይሮ ብታኒ ቆማዉ ኦዲደ፥ ‘ታን ቢታ ሻሜዳ ድራዉ ባደ በአናዉ ኮሼ፤ ሄዋ ድራዉ ሀያ ጎዶ ታዉ ሀንቀቶፓርክ’ ጌዳ።

19 "ላኤንያዌ ቃይ፥ ‘ታን እቼሹ ዋ ቦራቱዋ ሻሜዳዋንታ ዋጻ በአናዉ ብያ ድራዉ፥ ሀያ ጎዶ ታዉ ሀንቀቶፓርክ’ ጌዳ።

20 "ሀራይ ቃይ፥ ‘ታን ማቻቶ አኬዳ ድራዉ፥ ያናዉ ዳንዳያበይከ’ ጌዳ።

21 "ቆማይካ ዪደ ባረ ጎዳዉ፥ ሀኖዋ ኡባ ኦዴዳ። ሄ ዎደ ጎዳይ ዳሮ ሀንቀቲደ፥ ባረ ጎልያን ኪተትያ ቆማ፥ ‘ህን ካታማ ኦግያነ ሎሶ ኦግያ ኤሌላደ ከሳ፤ ማንቃቱዋነ ጉንዳቱዋ፥ ዶማቱዋነ ቆቃቱዋ ሃ አካደ ያ’ ጌዳ።

22 "አ ቆማይካ፥ ‘ጎዳዉ፥ ኔን ታና አዛዞዋዳን ኦድ፤ ሽን ሀእካ ሀራ አሳ አክያ ሳአይ ደኤ’ ጌዳ። 23 ጎዳይካ ባረ ቆማ፥ ‘ታ ጎሊ ኩማናዳን ህን ኦግያፐ ካረ ባጋነ ድርሳ ጋጻ ኡባ ከሳደ፥ አሳ ታ ጎለ አካደ ያ። 24 አያዉ ጎፐ፥ ኮይሮ ታ ጎለ ሾበቴዳዋንቱፐ እት አሳይነ ታ ቁማ ሜና’ ጌዳ" ያጌዳ።

25 ጮራ አሳይ የሱሳና እትፐ ብደእያ ዎደ፥ እካ አሳኮ ጉየ ስሚደ፥ 26 "ኦንነ ታኮ ይያዌ ደኦፐ ባረ አባነ አቶ፥ ባረ ማቻቶነ ባረ ናና፥ ባረ እሻቱዋነ ምቻቱዋ፥ ባረ ደኡዋ አሸናን ታፐ አ ዶሶፐ፥ ታና ካልያዋ ጌተታናዉ ዳንዳየና።✝ 27 ኦንነ ባረ ማስቃልያ ቶኪደ፥ ታ ጌዱዋ ካለናን ዮፐ፥ ታና ካልያዋ ግዳናዉ ዳንዳየና።✝

28 "ህንተንቱፐ እቱ ሹቻ ጎልያ ኬጻናዉ ኮዮፐ፥ ኪታ ዉርሳናዉ ግድያ ሻሉዋ ካሰቲደ ኡት ሄተናዌ ኦኔ? 29 ሄዌ ዮፐ፥ ጎልያ ዶሚደ፥ ኪታ ዉርሳናዉ ዎልቃይ እጾፐ፥ 30 በኤዳዋንቱ ኡባይ፥ ‘ሀ ብታኒ ኬጻናዉ ዶሜዳ፤ ሽን ኪታ ዉርሳናዉ ዳንዳይቤና’ ጊደ ቅሊጪኖ።

31 "ዎይ ታሙ ሻአ ኦላንቻቱዋ ኦይቄዳ እት ካቲ፥ ሀራ ላታሙ ሻአ ኦላንቻቱዋ ኦይቄዳዋንቱና ኦለታናዉ ዳንዳዮፐነ ኮይሮና፥ ታን ጾናኔ ጾንክታሻ ጊደ ኡት ቆፐኔ? 32 ባረዉ ዳንዳየተናን ዮፐ፥ ኦላዉ ይያ የኮ ካቲ ሃኩዋን ደእሽን ኪቲደ ስገታናዉ ዎሴ። 33 ስም ሀዋዳንካ ህንተንቱፐ ኦንነ ባረዉ ደእያዋ ኡባ አገናዌ፥ ታና ካልያዋ ግዳናዉ ዳንዳየና።

34 "ማጽኒ ሎአ፤ ሽን ሎቅሎቀናን ዮፐ፥ ላኤን አ ዎት ሎቅሎቅሳናዉ ዳንዳየቲ? 35 ቢታዉካ ሎኤና፤ ቱኤያናዉካ ማደናዋ ግዶ ድራዉ፥ አሳይ አ ኦል አጌ። ስስያ ሀይይ ደእያዌ ሀዋ ስሶ" ያጌዳ።