1 እት ጋላስ፥ ቃራጻ ሺሽያዋንቱነ ናጋራንቻቱ ኡባይ የሱሳ ስሳናዉ አኮ ሺቄድኖ። 2 ፓርሳዋቱነ ሙሴ ህግያ ታማርስያዋንቱ፥ "ሀ ብታኒ፥ ናጋራንቻቱዋ ሺሽያዋነ ኡንቱንቱና ቁማ ምያዋ" ያጊደ ዙዙሜድኖ።✝15:2 ሉቃሳ 5:29-30 3 የሱስካ ሌምሱዋን ዛሩዋ ሀዋዳን ያግ ኦዴዳ:

4 "ጼቱ ዶርሳይ ደእያ ኡራይ ህንተንቱ ግዶፐ ደእንቶ ሄዋፐ እቱ ባይንቶ ኡዱፑ ታማነ ኡዱፑኑዋ ደንባን አጊደ ባዬዳዋ ቤታና ጋካናዉ ኮየናዌ ኦኔ? 5 ደሜዳ ዎደ ናሸቻን ባረ ሀሽያ ቦላን ዶርሳ ቶክ፥ 6 ባረ ጎለ ስሚደ፥ ባረ ዶስያዋንታነ ሾራቱዋ እትፐ ጼሲደ፥ ‘ባዬዳ ታ ዶርሳ ደሞ ድራዉ፥ ታናና እትፐ ናሸትተ’ ያጊደ ኦዴ። 7 ሄዋዳንካ ናጋራ ፓጸ ኮሸና ኡዱፑ ታማነ ኡዱፑ ጽላቱዋፐ አደ ናጋራ ፓጽያ እት ናጋራንቻን ሳሉዋን ዳሮ ናሸቻይ ግዳናዋ።

8 "ቃይካ ታሙ ናሃስያ ሳንትሚ*15:8ናሃስያ ሳንትሚ፦ ግሪከ ቃላ ብለን እትና፥ እት ጋላሳ ሙምያ ኦ ፔሼዳ ዎልቃ ኦሳንቻዉ ጭገትያ ሚሻ ኬና ግድያዋ ኦዴ። ደእያ ምሽራታ ታሙዋፐ እቱ ባይንቶ ደማና ጋካናዉ ጾምፕያ ጾምፓደ፥ ጎልያ ፕታደ ሎይ ኮየናዉና እዛ ኦኔ? 9 እዛካ ደሜዳ ዎድያን ባረ ዶስያዋንታነ ባረ ሾራቱዋ እትፐ ጼሳደ፥ ‘ታፐ ባዬዳ ሳንትምያ ደሜዳ ድራዉ፥ ታናና እትፐ ናሸትተ’ ያጋደ ኦዳዉ። 10 ሄዋዳንካ ናጋራ ፓጽያ እት ናጋራንቻ ጋሶተን ጾሳ ኪታንቻቱዋ ስንን ናሸቻይ ሀናናዋ" ያጌዳ።

11 ጉጂደ የሱስ፥ "ላኡ ናናይ ደእያ እት ብታኒ ደኤ፤ 12 ኡንቱንቱፐካ ቴፋ ናአይ፥ ‘ነ ማጹዋፐ ታና ጋክያዋ እማ’ ጌዳ። አዉካ ባረ ማጹዋፐ ናናቶ ግሼዳ። 13 ጉ ዎድያፐ ጉይያን ቴፋ ናአይ ባረና ጋኬዳዋ ኡባ ሺሽ አኪደ ህን ሃኮ ጋደ ቤዳ፤ ሄዋን ባረ አኬዳ ሚሻ ኡባ ላል ዉርስ አጌዳ። 14 እካ ደእያዋ ኡባ ዉርሴዳዋፐ ጉይያን ሄ ጋደን ዎልቃማ ኮሻይ ገሌዳ፤ እካ መቱዋን ኡንኤቱሳ ዶሜዳ። 15 ሀዋ ድራዉ ሄ ጋደን ደእያዋንቱፐ እቱዋኮ ሺቂደ፥ ‘ታና ነዉ ቆማ ኦርኪ?’ ያግና፥ ብታኒካ ባረ ጉዱን ዉድያ ሄማና ማላ አ ደምባ የዴዳ። 16 ጉዱን ዉዲ ምያ ሀልኡዋ ማናዉ አሞቴዳ፤ ሽን ሄዌንቶካ አዉ እምያዌ ቤትቤና።

17 "ባረ ባይዙዋ ኤሮ ዎደ፥ ‘ቁማይ ጾኒደ ሳኣን አትያ ታ አቦ ኦያዋንቱ አፑኔ፤ ሽን ታን ሀዋን ኮሻን ሀይቃና ማታይታ? 18 ደንዳደ ታ አቡኮ ባኔ’ ሀዋዳን ያጋና፤ ‘ታ አቦ፥ ጾሳካ ኔናካ ናቃድ፤ 19 ሀንፐ ጉየ ነ ናኣ ያገታደ ጼሰታናዉ በስከ፤ ነዉ ኪተትያዋንቱፐ እቱዋዳን ታና ዎርኪ ጋና’ ጌዳ። 20 ሄ ማንእያን ደንዲደ ባረ አቡኮ ዬዳ።

"እ ብሮ ሃኩዋን ደእሽን፥ አዉ በኢደ፥ አዉ ቃረቴዳ፤ አኮ ዎጽ ቢደ፥ አ እድም የሬዳ።

21 "ናአይካ፥ ‘ታ አቦ፥ ታን ጾሳካ ኔናካ ናቃድ፤ ሀንፐ ጉየ ነ ናኣ ጌተታደ ጼሰታናዉ በስከ’ ያጌዳ።

22 "ሽን አዉ ባረ ኦሳንቻቱዋ፥ ‘ኤሌል ቢደ፥ ኡባፐ ዶረቴዳ ሎኦ ማዩዋ አሂደ፥ አ ማይዝተ፤ አ ብራያን ምግዱዋ፥ አ ገድያንካ ጫማ*15:22 ምግዱዋ፥ ጫማ፦ ሀ ቃላቱ ናኣ አቡ፥ አ ፖሎ ዎዛናፐ አኮዋ በስያዋንታ። ምግዱ፥ ሄ ናአይ ጎለን ደእያ አሳቱዋ ኡባፐ ሎኦ ጼለቴዳዋ በሴ። ጫማይ ቃይ፥ እ ባረ አቦ አይለ ግደናዳን ናኣ ግድያዋ በሴ። አይላቱ ሄ ዎደ ጫማ ዎክኖ። ዎተ። 23 ሞዳ ኮሩማ አሂደ ሹክተ፤ ሞይተ፥ ናሸቶይተ። 24 አያዉ ጎፐ፥ ሀዌ ታ ናአይ ሀይቄዳ፤ ሽን ሀእ ፓጼዳ፤ ባዬዳ፤ ሽን ሀእ ቤቴዳ’ ያግና፥ ናሸቻ ዶሜድኖ።

25 "ሄ ዎድያን፥ ባይራ ናአይ ጋደን ደእያዌ ዪደ ጎለኮ ማትያ ዎደ፥ የነ ዱሩዋ ኮሹንቻ ስሴዳ። 26 እካ የዉ አየንቶ ኤራናዉ ኮዪደ፥ ቆማቱዋፐ እቱዋ ጼሲደ፥ ‘ሀዌ አዬ?’ ጊደ ኦቼዳ። 27 ቆማቱካ፥ ‘ነ እሻይ ሳሮ ዬዳ ድራዉ፥ ነ አቡ ሞ ኮሩማ አዉ ሹኬዳ’ ያግ ኦዴድኖ።

28 "ባይራ ናአይ ሀንቀቲደ ጎለ ገልከ ያግ እጽና፥ አዉ ካረዉ ከሲደ፥ ገላናዳ ዎሴዳ። 29 ሽን እ ዛሪደ ባረ አባ፥ ‘ሄኮ ሀዋ ኬና ዎድያ ቆማዳን ነዉ ኪተታድ፤ ነ አዛዞዋፐ እቱዋነካ ፓጭሳ በይከ፤ ታ ላገቱዋና እትፐ ናሸታና ማላ ሀራይ አቶ እት ዴሻ ቡልኡዋነ ታዉ እማ በይካ፤ 30 ሽን ሀዌ ነ ናአይ ነ ሚሻ ጫራቱዋና እትፐ ዲፍሲደ ዪና፥ ኮ ቦራ ሹካዳ’ ያጌዳ።

31 "አዉካ አ፥ ‘ታ ናአዉ፥ ኔን ኡባ ጋላሳ ታናና እትፐ ደኣ፤ ታሳ ግዴዳባይ ኡባይካ ነዋ። 32 ሽን ሀዌ ነ እሻይ፥ ሀይቄዳዌ ፓጾ ድራዉነ ባዬዳዌ ቤቶ ድራዉ፥ ኑን ሚድነ ኡሺደ ናሸታናዉ በሴ’ ያጌዳ" ጊደ ኦዴዳ።