ጋርሳና ሱንተ አኬዳ ጭንጫ ብታንያ
1 የሱስ ባረና ካልያዋንቶ ኦዲደ፥ "እት ዱረ ብታኒ፥ ባረ ጎልያ ኡባ ቦላ ሱንዳ እት ብታኒ ደኤ፤ ሽን ሀ ብታኒ አ ሚሻ ባይዜ ያግያ ዝግርሳይ አ ጋኬዳ፤ 2 ሄዋ ድራዉ ባረ ሱንዳ ብታንያ ጼሲደ፥ ‘ሀዌ ታን ስስያ የዉ አዬ? ሀንፐ ጉየ ኔን ታ ጎልያንነ ታ ሚሻ ቦላ ታፐ ጋርሳና ሱንታደ ኪተታናዉ ዳንዳያቤና ድራዉ፥ ሀቼ ጋካናዉ ኪተቴዳዋ ሄታደ ሼ’ ያጌዳ።
3 "ሱንቴዳዌ ባረ ዎዛናን፥ ‘ታ ጎዳይ ታና ሱንተፐ ኮላና ሀኔ፤ ሽን ታ ዋኖሻ? ጎሻናዉ ዎልቃይ ታዉ ባዋ፤ ዎሳናዉ ቃይ ታዉ ፖኬ። 4 ታ ኦናባ ታ ኤራይ፤ እ ታና ሱንተፐ ከሶፐ፥ ባረንቱ ጎለ ቢና፥ ታና ሞክያ ላገቱዋ ታን ደማና’ ያጌዳ።
5 "ባረ ጎዳፐ ሻሉዋ ታልኤዳ አሳቱዋ ሁጲያን ሁጲያን ጼሲደ፥ ኮይሮ ብታንያ፥ ‘ኔን ታ ጎዳፐ ዎይሳ ኬና ሻሉዋ ታልኣዲ?’ ያጌዳ።
6 "እካ፥ ‘ታን ጼቱ ባሬታ ኩሜዳ ዛይትያ ታልኣድ’ ያጌዳ።
"ሱንቴዳ ብታኒካ፥ ኔን ፓራማና ዋራቃታ ሄይ፤ ኡታደ ኤለካ ‘እሻታማ’ ጋደ ጻፋ ያጌዳ።
7 "ሄዋፐ ሀራ ብታንያ፥ ‘ኔን አፑኑዋ ታልኣዲ?’ ያጌዳ።
" ‘ጼቱ ቁንኣ ዛርጋ’ ያጌዳ።
"ሱንይካ፥ ‘ዋራቃታ ሄይ፤ ሆስፑን ታማ ጋደ ጻፋ’ ያጌዳ።
8 "ሄ ሱንይ ጭንጫተን ኦዳ ድራዉ፥ አ ጎዳይ አ ጋላቴዳ፤ አያዉ ጎፐ፥ ሀ አላምያ አሳይ ባረንቱዎ ፖኡዋ አሳፐ አዳ ጭንጫቱዋ።
9 "ታን ህንተንቶ ያጋይ፥ ‘ሀ አላምያ ሻሉ ዉርያ ዎደ፥ መናዉ ዉረና ጎልያን ህንተንታ ሞካና ማላ፥ ሀ ሚሻን ህንተንቶ ላግያ ደምተ። 10 ላፋ የዉዋን አማነቴዳዌ፥ ዎጋባንካ አማነቴ። ሽን ላፋ የዉዋን አማነትቤናዌ፥ ዎጋባንካ አማነተና። 11 ስም ህንተንቱ ሀ አላምያ ሻሉዋን አማነተናዋ ግዶፐ፥ ቱማተ ሻሉዋ ህንተንቶ ኦኔ ሀዳራ ጊደ እማናዌ? 12 ህንተንቱ ሀራ አሳ ሻሉዋን አማነተናዋ ግዶፐ፥ ህንተንቱ ሚሻ ኦኔ ህንተንቶ እማናዌ?’ ጌዳ።
13 "እት ካላ ላኡ ጎዳቶ ቆማታናዉ ዳንዳይያዌ አይ ቆማይካ ባዋ፤ አያዉ ጎፐ፥ እቱዋ እጺደ፥ ሀራ ዶሴ፤ ዎይ እቱዋ ቦንቺደ፥ ሀራ ካ፤ ጾሳዉነ ሻሎ ሞደታናዉ ዳንዳይክታ" ያጌዳ።