ክርስቶሳ ዎናዉ ማቀቴድኖ
(ማቶሳ 26:1-5፤ ማር. 14:1-2፤ ዮሃ. 11:45-53)
1 ፓስጋ ጌተትያ ማጋገ ኡክ ምያ ባላይ ማቴዳ።22:1 ከሳ 12:1-27 2 ቄሳቱዋ ካፓቱነ ሙሴ ህግያ ጻፍያዋንቱ የሱሳ ዎት ዎነንቶ፥ ዎያ ኦግያ ጌማን ኮዪኖ፤ ሽን አሳዉ ያዪኖ። 3 ጻላሂካ ታማነ ላኡ ካልያዋንቱፐ እቱዋ ግዴዳ አስቆሮቱ ይሁዳን ገሌዳ። 4 እካ ቢደ፥ የሱሳ ዎት አ እማነንቶ ቄሳቱዋ ካፓቱዋናነ ጌሻ ጎልያ ናግያዋንቱ ካፓቱዋና እትፐ ሃሳዬዳ። 5 ኡንቱንቱካ ናሸቲደ፥ ሚሻካ ይሁዳዉ እማናዉ ዉለቴድኖ። 6 እካ ኤኖ ጌዳ፤ አሳይ ባይና ሳን የሱሳ አ እማናዉ እንጀትያ ዎድያ ኮዬ።
የሱስ አይሁዳቱዋ ፓስጋ ማናዉ ጊገቴዳ
(ማቶሳ 26:17-25፤ ማር. 14:12-21፤ ዮሃ. 13:21-30)
7 ማጋገ ኡክ ምያ ባላ ቦንችያ ዎዲ ጋኬዳ፤ ሄ ዎዲካ ፓስጋዉ ዶርሳ ሹካናዉ በስያ ዎድያ። 8 የሱስ ጰጽሮሳነ ዮሃንሳ፥ "ፓስጋ ቁማ ኑን ማናዳን ቢደ ጊግስተ" ጊደ ኪቴዳ።
9 ኡንቱንቱካ ዛሪደ፥ "ሀቃን ጊግሳናዳን ኮያይ?" ያግ ኦቼድኖ። 10 እካ፥ "ህንተንቱ፥ ካታማ ገልያ ዎደ ኦቱዋና ሃ ቶኬዳ ብታኒ22:10 ሃ ቶኬዳ ብታኒ፦ ሄ ዎደ ሄ ጋደን አሳ ጎለን ኪተትያ አቱማ ቆማይ ሃ ቶኮፐ፥ ሄ ጎሊ ዱረ ግድያዋ በሴ። ህንተንቱና ጋከታናዋ፤ እ ገልያ ጎልያ አ ካሊደ ገልተ፤ 11 ሄ ጎልያዋካ፥ ‘ታማርስያዌ ኔና፥ "ታን፥ ታና ካልያዋንቱና እትፐ ፓስጋ ቁማ ምያ እማ ክፍሊ ሀቃ ባጋና ደኢ?" ያጌ’ ጊተ። 12 ሄ ብታኒካ ፖቅያ ቦላን ደእያ ሂጸት ኡቴዳ አኮ ክፍልያ ህንተንታ በሳናዋ፤ ሄዋንካ ሳኣ ጊግስተ" ያጌዳ።
13 ኡንቱንቱ ቢደ፥ የሱስ ጎዋዳንካ ብታንያ ደሚደ ፓስጋ ቁማ ጊግሴድኖ። 14 ፓስጋ ቁማይ ሜተትያ ሳቲ ጋኮ ዎደ፥ ታማነ ላኡ ኪተቶዋንቱና እትፐ ቁማ ማናዉ ኡቴዳ። 15 እካ፥ "ታና መቱ ጋካናፐ ካስያን ህንተንቱና ሀ ፓስጋ ቁማ ማናዉ ዳሮ አሞታደ ደአይ። 16 አያዉ ጎፐ፥ ታ ህንተዉ ኦድያዌ፥ ሀዌ ጾሳ ካዉተን ፖለታና ጋካናዉ፥ ታን ላኤንዋ ሀዋፐ ሚከ" ያጌዳ።
17 ጹኣ አኪደ፥ ጾሳ ጋላቲደ፥ "ሀዋ ሄይተ፥ ህንተንቱ ግዱዋን ግሸት ኡሽተ። 18 አያዉ ጎፐ፥ ታ ህንተንቶ ያጋይ፥ ጾሳ ካዉተይ ያና ጋካናዉ፥ ሀቼፐ ዶማደ ዎይንያ ኤሳ ኡሽከ" ያጌዳ።
19 ቃይ ማጋገ ኡክ አኪደ፥ ጾሳ ጋላቴዳ፤ ሄ ኡክ መን ኡንቱንቶ እሚደ፥ "ሀዌ ህንተንቶ እመትያዌ ታ አሹዋ፤ ሀዋን ታና ቆፓና ማላ ሀዋ ሚተ" ያጌዳ። 20 ካዉዋ ሞዋፐ ጉይያን፥ ካሰዋዳን ጹኣ ደን ኡንቱንቶ እሚደ፥ ሀዋዳን ያጌዳ: "ሀ ጹአይ፥ ታ ህንተንቱ ድራዉ ጉስያ ታ ሱ ቆፈያ ኦራ ጫቁዋ።22:20 ማቶሳ 26:26-28፤ ማር. 14:22-24፤ 1 ቆሮ. 11:23-25 21 ሽን በእተ፥ ታና አ እማናዉ ደእያ ብታኒ ጋይታን ታናና እትፐ ሜ። 22 አያዉ ጎፐ፥ ታን አሳ ናአይ ጾሳይ ጎዋዳን ባይ፤ ሽን ታና አደ እምያ ኡራዉ አዉ አየ" ያጌዳ። 23 ኡንቱንቱ ግዶፐ ሄዋ ኦናዉ ደእያዌ ኦና ግዳነንቶ፥ ባረንቱ ግዶን ኦሻ ዶሜድኖ።
ኡባፐ አያዌ ኦኔ? ያግያ ኦሻ
24 ቃይ ባረንቱ ግዶፐ ኦን አንቶ ያገትያ ፓሉማይ ኡንቱንቱ ግዶን ከሴዳ። 25 የሱስ ኡንቱንታ ያጌዳ: "ሀ አላምያ ሞድያዋንቱ ባረንቱ አሳ ቦላ ጎዳቲኖ፤ ኡንቱንታ ሞድያዋንቱ ኬካቱዋ ጌተቲኖ። 26 ሽን ህንተንቱ ሀዋዳን ሀኖፕተ፤ የዉዋን ቃይ ህንተንቱፐ ቃ ግዴዳዌ ህንተ ኡባፐ ጉጽያዋ፤ ህንተንታ ሞድያዌካ፥ ህንተንቶ ቆማዳን ሀኖ።22:26 ማቶሳ 23:11፤ ማር. 9:35
27 "ቁማ ማናዉ ኡቴዳዋፐነ ቁማ አሳዉ አያዋፐነ ኦን ቦንቼቲ? ቁማ ማናዉ ኡቴዳዋ ግደኔ? ታን ቃይ ህንተንቱ ግዶን ቁማ አያ ቆማ ማላ። 28 ቃይ ታን ፓጨትያ ዎድያን ህንተንቱ ታናና እትፐ ምን ኤቄዳዋንታ። 29,30 አ ካዉተ ኦይድያን ኡታና ማላ ታ አቡ ታና ሱንዋዳን፥ ታን ቃይ ታ ካዉተን ታ ጋይታፐ ማናዳንነ ኡሻናዳን፥ ታማነ ላኡ እስራኤልያ ያራቱዋ ቦላ ፕርዲደ፥ ካዉተ ኦይድያን ኡታና ማላ ህንተንታ ሱንድ" ያጌዳ።
ጰጽሮስ ካዳናዋ የሱስ ካሰቲደ ኦዴዳ
(ማቶሳ 26:31-35፤ ማር. 14:27-31፤ ዮሃ. 13:36-38)
31 ጎዳይ፥ "ስሞና፥ ስሞና፥ ታን ኦድያዋ ስሳ፤ ጻላሂ ህንተንታ አሳይ ዛርጋ ሀልእያዋዳን፥ ሀልአናዉ ጾሳ ዎሴዳ። 32 ሽን ታን ነ አማኑ ባየናዳን ነ ድራዉ ጋናታድ። ኔን ታኮ ስምያ ዎደ ነ እሻቱዋ ምንሳ" ያጌዳ። 33 ስሞን ዛሪደ፥ "ጎዳዉ፥ ታን ኔናና ቃሸታናዉነ ኔናና እትፐ ሀይቃናዉ ጊጋ ኡታድ" ያጌዳ።
34 የሱስ ቃይ፥ "ጰጽሮሳ፥ ታን ነዉ ያጋይ፤ ሀቼ ብላህያን፥ ኩቱ ዋሳናዉ ሄዙ ገደ ታና ኔን፥ ‘አ ታን ኤርከ’ ጋደ ካዳናሳ" ያጌዳ። 35 የሱስ ባረና ካልያዋንቶ፥ "ኮሮጁ፥ ቃርጪቲነ ጫማይ ባንታን ታን ህንተንታ ኪቶ ዎደ፥ ህንተንቶ እትባይ ፓጮዌ ደኢ?" ያጌዳ።
ኡንቱንቱካ፥ "እትባይነ ኑዉ ፓጭቤና" ያጌድኖ።22:35 ማቶሳ 10:9፣ 10፤ ማር. 6:8፣ 9፤ ሉቃሳ 9:3፤ 10:4
36 እካ ዛሪደ፥ "ሀእ ቃይ ኮሮጁኡ ደእያዌ አክ ቦ፤ ቃርጪት ደእያዌካ ሄዋዳን ኦ፤ ባይናዌ ቃይ ባረ ማዩዋ ዛልኢደ ማሻ ሻሞ። 37 አያዉ ጎፐ ታ ህንተዉ ያጋይ፥ ‘ሀዌ ማካላንቻቱና እትፐ ፓይደቴዳ’ ያገት ጾሳ ማጻፋን ጻፈቴዳዌ፥ ታናን ፖለተናን አተና። ኤ፥ ታዉ ጌተቴዳዌ ሀእ ፖለታናዋ" ያጌዳ።22:37 ኢሳ. 53:12
38 አ ካልያዋንቱ፥ "ጎዳዉ፥ ሀዋን ላኡ ማሻይ ደኤ" ያግና እካ፥ "ሄዌ ግዳናዋ" ያጌዳ።
የሱስ ደብረ ዛይተ ደርያን ዎሴዳ
(ማቶሳ 26:36-40፤ ማር. 14:32-42)
39 የሱስ ካታማፐ ከሲደ፥ ሀራ ጋላስ ብያዋዳንካ ደብረ ዛይተ ቤዳ። ቃይ አ ካልያዋንቱካ አ ጌዱዋ ቤድኖ። 40 ሄ ሳኣ ጋኪደ፥ "ፓጭያን ህንተንቱ ገለናን አታና ማላ፥ ዎስተ" ያጌዳ። 41 ሹቻ ኦልና ጋክያሳ ኬና ኡንቱንቱፐ ሃክ ቤዳ። ጉልባቲደ፥ 42 "ታ አቦ፥ ኔን ኮይያዋ ግዶፐ፥ ሀ መቱዋ ጹኣ ታፐ ድጋ፤ ሽን ታ ሸነ ግዶፖ፤ ነ ሸነ ግዶፐ አትን" ያጊደ ዎሴዳ። 43 ሳሉዋፐ ዪደ ምንስያ ኪታንቻይ አዉ ቤቴዳ። 44 ባረ ዎዛና ግዶን ሴለቲደ፥ ዳሪ ዎሴዳ። እ ጫዎትያ ጫዉካ ሳኣ ቦላን ጾክያ ሱ ማላቴዳ።
45 ዎሳፐ ደንዲደ፥ ባረና ካልያዋንቱኮ ጉየ ቢደ፥ ኡንቱንቱ ዳሮፐ ቃረቴዳ ድራዉ፥ ዳቡሪደ ገምእሾዋንታ ጼሊደ፥ 46 "አያዉ ገምእሺቴ? ፓጭያን ገለናዳን ደንድ ዎስተ" ያጌዳ።
የሱስ ባረ ሞርከቱዋ ኩሽያን ኦይቀቴዳ
(ማቶሳ 26:47-56፤ ማር. 14:43-50፤ ዮሃ. 18:3-11)
47 የሱስ ሄዋ ሃሳይ ደእሽን፥ ጮራ አሳይ ዬድኖ። ታማነ ላኡ አ ካልያዋንቱፐ እቱዋ ግዴዳ ይሁዳ ጌተትያዌ ሄ አሳ ካለደ የራናዉ የሱሳኮ ሺቄዳ። 48 የሱስ ቃይ፥ "ይሁዳዉ፥ ኔን ታና አሳ ናኣ የራደ አ እማይ?" ያጌዳ።
49 አ ዩሹዋን ደእያ አ ካልያዋንቱ ሀነትያ የዉዋ በኦ ዎደ አ፥ "ጎዳዉ፥ ሀ አሳ ኑን ማሻን ቃንጻኔ?" ያጌድኖ። 50 ኡንቱንቱፐ እቱ፥ ቄሳቱዋ ኡባቱዋ ካፑዋ ቆማ ሾጪደ፥ አ ኡሸቻ ሀይ ቃንጽ ኦሌዳ።
51 የሱስ ቃይ ዛሪደ፥ "አግተ፥ ባሽተ" ያጌዳ። ብታንያ ሀይካ ቦቺደ ፓዳ። 52 የሱስካ ባረኮ ዬዳ ቄሳቱዋ ካፓቶ፥ ጌሻ ጎልያ ናግያዋንቶ፥ ሱንቶነ ጋድያ ጭማቶ፥ "ፓኑዋ ኦይቂያዋዳን ማሻነ ጻምኣ ኦይቂደ ዪቴ? 53 ጌሻ ጎልያን ታን ጋላሳን፥ ጋላሳን ህንተንቱና ደእያ ዎደ፥ ታና ኦይቂበይክታ፤ ሽን ሀእ ሀዌ ህንተንቱ ዎደነ ማ ዎልቃ ዎደ" ያጌዳ።
ጰጽሮስ የሱሳ ካዴዳ
(ማቶሳ 26:57-58፣ 69-72፤ ማር. 14:53-54፣ 66-72፤ ዮሃ. 18:12-18፣ 25-27)
54 የሱሳ ኦይቂ ቃቺደ፥ ቄሳቱዋ ኡባ ካፑዋ ጎለ አፊደ ገልሴድኖ። ጰጽሮስካ ኡንቱንቱፐ ጉየ ሃኩዋን ኡንቱንቱ ጌዱዋ ካሌ። 55 ድርሳ ግዶን ታማ ኤደ፥ እትፐ ኡት ደእሽን፥ ጰጽሮስ ኡንቱንቱ ግዶን ዪደ ኡት አጌዳ። 56 ታማይ ፖእያ ባጋና ጰጽሮስ ኡቲደ ደእሽን፥ እት ቆማታ ሎይ ጼላደ፥ "ሀዌካ አናና እትፐ ደኤ" ያጋዱ።
57 ጰጽሮስ ቃይ፥ "ሀነ ምሽራቴ፥ ታን አ ኤርከ" ያግ ካዴዳ። 58 ጉ ዎድያፐ ጉይያን፥ ሀራ ብታኒ ጰጽሮሳ በኢደ፥ "ኔን ኡንቱንቱና ጋ ደኣ" ያግና፦
ጰጽሮስ ቃይ፥ "ሀዎ ብታነዉ፥ ታን አናና ጋ ደእከ" ያጌዳ።
59 እት ሳተ ግድያዋ ጋምኢደ ሀራ ብታኒ ቆንጭሲደ፥ "እ ጋሊላ ጋደ አሳ ግድያ ድራዉ፥ ሀ ብታኒ አናና እትፐ ደእያዌ ቱማ" ያጌዳ። 60 ጰጽሮስ ቃይ፥ "ሀ ብታነዉ፥ ኔን ግያዌ አየንቶ ታን ኤርከ" ያጌዳ። ሄ ዎድያን እ ብሮካ ሃሳይ ደእሽን፥ ኤለካ ኩቱ ዋስ አጌዳ። 61 ጎዳይ ጉየ ስሚደ፥ ጰጽሮሳ ጼሌዳ። ጰጽሮስ ጎዳይ ባረና፥ "ሀቼ ኩቱ ዋሳና ጋካናዉ፥ ሄዙ ገደ ታና ካዳናሳ" ጌዳ ጎዳ ቃላይ አዉ ቆፈት አጌዳ። 62 ጰጽሮስ ድርሳፐ ካረ ከሲደ፥ ሴለቲደ ዬኬዳ።
63 የሱሳ ኦይቄዳ አሳይ ቅሊጪኖነ ሾጪኖ። 64 አ አይፍያ ጎዝ ባቂደ፥ "ኔና ባቄዳዌ ኦኔ? ናብያ ግዶፐ ኔና ደቻዋ አነ ኦዳ" ያጊደ አ ኦቼድኖ። 65 ቃይ አ ሀራ ጮራ ቦርያ ቦሬድኖ።
የሱሳ ፕርዳዉ አፌድኖ
(ማቶሳ 26:59-66፤ ማር. 14:55-64፤ ዮሃ. 18:19-24)
66 ሳአይ ዎንትና ጋድያ ጭማ አሳቱ፥ ቄሳቱዋ ካፓቱነ ሙሴ ህግያ ታማርስያዋንቱ፥ የሱሳ ባረንቱ ሺቄዳሳ አፊደ፥ 67 "ክርስቶስ ኔኔ? አነ ኑ ኦዳ" ያጌድኖ።
ሽን እ፥ "ታን ህንተንቶ ኦዶፐ ታና አማንክታ፤ 68 ቃይ ህንተንታ ታን ኦቾፐ ኦድክታ፤ ዎይ ቃሹዋፐ ታና ብልክታ። 69 ሽን ሀ ሳትያፐ ዶምና ታን አሳ ናአይ፥ ሀእፐ ዶማደ፥ ዎልቃማ ጾሳ ኡሸቻ ባጋና ኡታና" ያጌዳ።
70 ኡንቱንቱ ኡባይ የሱሳ፥ "ያትና ኔን ጾሳ ናኤ?" ያጌድኖ።
እካ ዛሪደ፥ "ታን ጾሳ ናኣ ግዶዋ ህንተንቱ ሃሳዬድታ" ያጌዳ። 71 ኡንቱንቱካ፥ "ኑን ኑ ሁጰዉ አ ዶናፐ ስሴዶ፤ ሀዋፐ ስንዉ አይ ማርካ ኮሺ?" ያጌድኖ።