13 ጵላጾስ ቄሳቱዋ ካፓቱዋ፥ አይስያዋንታነ ሀራ ጮራ አሳ እትፐ ጼሲደ፥ 14 ሀዋዳን ያጌዳ፥ " ‘ሀ ብታኒ አሳ ማካላተዉ ደን’፥ ያጊደ ታኮ አሄድታ፤ ታንካ ህንተንቱ ስንን ብዳ ጼላደ፥ ህንተንቱ ሺሼዳ ሞቱዋን እት ባላነ አ ቦላን ደማበይከ። 15 ቃይ ሄሮድሰካ አ ቦላን አይነ ደምቤና ድራዉ፥ ሃ ኑኮ ዛር የዴዳ፤ ህንተንቱ በእያዋዳንካ፥ ሀ ብታኒ አ ሀይቆ ጋያባ አይነ ኦቤና። 16 ሀዋ ድራዉ ታን አ ሙራደ ብላና" ያጌዳ። 17 23:17 ሀ ፓይዱ፦ "ጵላጾሳዉ ፓስጋ ባላ ቦንቹዋ ጋላሳን እት ኡራ ቃሹዋፐ ብልያ ዶያይ ደኤ" ያጌ። ሽን፥ ዳዉሮዋ ጌሻ ማጻፋ ኦራ ጫቁዋ ግዱዋን ሀ ፓይዱ ጻፈትቤና ጋሱ፥ ሀራ ጌሻ ማጻፋቱዋ ብለቱዋን ኡባቱዋንካ ጻፈትቤና ድራሳ።
18 አሳይ ኡባይ እትፐ ግዲደ፥ "ሀ ብታንያ ያ ድጋ! ባርባና ግያ የሱሳ ኑዉ ብላ!" ያጊደ ጫቦቴድኖ። 19 ባርባን ካታማን ዋላሳ ደንደ፥ አሳ ዎዳ ድራዉ፥ ቃሸቴዳዋ።
20 ጵላጾስ የሱሳ ብላናዉ ኮዪደ፥ አሳዉ ላኤንዋ ጉጂደ ሃሳዬዳ። 21 ሽን ኡንቱንቱ፥ "ማስቃልያ ቦላ ምስማርያን ሻደ ካቃ! ካቃ!" ያግ ዋሴድኖ።
22 ጵላጾስካ ሄዘንዋ ኡንቱንታ፥ "አያዉ? ሀ ብታኒ ኦዳ ኢታ ኦሱ አዬ? ታን አ ሀይቆ ጋያ ናቁዋ አይነ አፐ ደማበይከ፤ ሀዋ ድራዉ፥ አ ሙራደ ብላ የዳና" ያጌዳ። 23 ሽን ኡንቱንቱ ባረንቱ ኮሻ ቁ ኦደ፥ ካቀታናዳን ዳሪ ዋሴድኖ። ኡንቱንቱ ዋሱካ ጵላጾሳ ቆፋ ላሜዳ። 24 ሀዋ ድራዉ፥ ጵላጾስካ ኡንቱንቱ ኦሻይ ስማናዳን የሱሳ ቦላን ፕርዴዳ። 25 አሳ ማካላዉ ደንደነ ሸምፑዋ ዎደ፥ ቃሸቴዳ ብታንያ ብለታናዳን ኡንቱንቱ ዎሶ ድራዉ፥ ሄ ብታንያ ብሌዳ። ሽን የሱሳ ባረንቱ ሸንያዳን ኮዮዋ ኦና ማላ፥ አ እሜዳ።
የሱስ ማስቃልያን ካቀቴዳ
(ማቶሳ 27:31-44፤ ማር. 15:21-32፤ ዮሃ. 19:17-27)