1 የሱስ ጌሻ አያናን ኩሚደ ዮርዳኖሳ ሻፋፐ ስሜዳ፤ አያናን መላ ሳኣ ካለሰቲደ ቤዳ። 2 ሄዋን ኦይታሙ ጋላሳ ዳብሎሳን ፓጨቴዳ። ሄ ጋላሳቱዋን አያነ ምቤና ድራዉ ዉርሰ ፖሉዋ ሄራን እ ኮሻቴዳ።

3 ዳብሎስካ፥ "ኔን ጾሳ ናኣ ግዶፐ ሀ ሹቻ፥ ‘ኡክ ግዳ’ ጋደ አዛዛ" ያጌዳ።

4 የሱስካ፥ " ‘አሳይ ጾሳ ቃላ ኡባፐ አትን ኡክ ጻላላን ደኤና’ ጌተት ጾሳ ቃላን ጻፈቴዳ" ያግ ዛሬዳ።✝

5 ዳብሎስካ ቃ ግዴዳ ደርያ የሱሳ ከሲደ አላምያ ካዉተ ኡባ ልጶ አይፊ ስማናዉ በሴዳ። 6 ዳብሎስካ፥ "ሀ ካዉተ ማታይነ ቦንቹ ኡባይ ታዉ እመቴዳ። ታን ታ ዶስያ ኦስነ እማና፤ ነዉካ እማና። 7 ሄዋ ግድያ ድራዉ፥ ነ ታ ስንን ታዉ ጎይኖፐ ሀ ኡባይ ኔሳ ግዳናዋ" ያጌዳ።

8 የሱስካ ዛሪደ፥ " ‘ጎዳ ጾሳዉ ጎይና፥ አ ጻላላ ጎዳያ’ ጌተት ጾሳ ቃላን ጻፈቴዳ" ያጌዳ።

9-11 ዳብሎስካ የሱሳ የሩሳላመ አፊደ ጌሻ ጎልያ ሁጲያ ከሲደ፥

" ‘ጾሳይ ኔና ናጋና ማላ፥

ኪታንቻቱዋ ኪታናዋ፥

ኡንቱንቱካ ነ ገዲ ሹቻን በተና ማላ፥

ባረንቱ ኩሽያን ኔና ደንናዋንታ’ ያገቲደ፥

ጌሻ ማጻፋን ጻፈቴዳ፤

አነ ኔን ጾሳ ናኣ ግዶፐ፥

ሀዋፐ ዱገ ኔና ኦላ"✝

ያጌዳ።

12 የሱስካ ዛሪደ፥ " ‘ነ ጎዳ ጾሳ ፓጮፓ’ ጌተቴዳ" ያጌዳ።

13 ዳብሎስካ ፓጭያ ኡባ ዉርሶዋፐ ጉየ ጉ ዎደዉ የሱሳፐ ሻከቴዳ።

14 የሱስካ አያና ዎልቃን ጋሊላ ጋድያ ስሜዳ። አ ዋሪካ ዩሹዋን ደእያ ኡባ ጋኬዳ። 15 የሱስካ አይሁዳቱዋ ዎሳ ጎልያን ታማርሲደ አሳን ኡባን ጋላተቴዳ።

16 እ ባረ ድጮ ካታማ ናዝሬተ ዬዳ፤ ካሰ ኦያዋዳንካ ሳምባታ ጋላስ አይሁዳቱዋ ዎሳ ጎለ ገሊደ ናባባናዉ ደንዲደ ኤቄዳ። 17-19 ናብያ ኢስያሳ ን ጻፈቲደ ጻጸቴዳ ማጻፋ አዉ እሜድኖ። ሄ ማጻፋ ብሊደ:

"ታን ህየሳቶ ምሽራቹዋ ኦዳናዉ

ኦከቴዳ ድራዉ ጎዳ አያናይ ታ ቦላን ደኤ።

ቃሸቴዳዋንቶ ብለ፥

ቆቃቶ ጼላና ማላ ኦዳናዉ፥

ቃይካ ናቀቴዳዋንታ ናቁዋፐ

ከሳና ማላ ዶሰቴዳ ጎዳ ላይ

ኦዳና ማላ፥ ታና ኪቴዳ"

ጌተት ጻፈቴዳሳ ደሜዳ።✝

20 ማጻፋካ ጻጺደ አይሁዳቱዋ ዎሳ ጎልያን ኦያዎ እሚደ ኡቴዳ። አይሁዳቱዋ ዎሳ ጎልያን ደእያ አሳይ ኡባይ አ ጫድ ጼሌዳ። 21 የሱስካ፥ "ሀቼ ህንተዉ ናባበትና ህንተንቱ ስሴዳ ቃላይ ፖለቴዳ" ያጌዳ።

22 ኡባይ አዉ ማርካቴድኖ። አ ዶናፐ ከስያ አ ኬካተ ቃላፐ ደንዴዳዋን ማላለቲደ፥ "ሀዌ ዮሴፎ ናኣ ግደኔ?" ጌድኖ።

23 የሱስካ ስ ባንታን ሀ ሌምሱዋን፥ "ህንተንቱ ታዉ ‘ልያ ጎዳዉ፥ ነ ሁጲያ ፓ፥ ኔን ቅፍርናሆማን ኦና ኑ ስሶዋ ኡባ ሀ ነ ካታማንካ ቃይ ኦ’ ያጊደ ኦዲታ" ያጌዳ። 24 ቃይካ፥ "ቱሙዋ ያጋይ፥ ናቢ ባረ የለቶ ጋድያን ጋማካ ቦንቼተና።✝

25 "የዉዋን ቃይ ቱሙዋ ኦዳይ: ኤላሳ ዎድያን ሄዙ ላይነ ኡሱፑን አገና እራይ ቡከናን እጽና ሳኣ ኡባን ዎልቃማ ኮሻይ ገሌዳ ዎደ፥ እስራኤለን ጮራ አምአቱ ደኢኖ።✝ 26 ኤላስካ ሲዶና ጋድያን ደእያ ሰራፍታ ሄራ እት አምአትኮ ኪተቴዳፐ አትን ኦኮነ ኪተትቤና።✝ 27 ናብያ ኤልሳአ ዎድያንካ እስራኤልያን ጮራ ኦሉዋ ሀርግያን* ኦይቀቴዳዋንቱ ደኢኖ፤ ሶርያ ቢታን ደእያ ንእማነፐ አትን ኡንቱንቱፐ ኦንነ ፓጽ ቤና" ያጌዳ።✝

28 አይሁዳቱዋ ዎሳ ጎልያን ደእያዋንቱ ኡባቱ ሀዋ ስሲደ ዳርሲደ ሀንቀቴድኖ። 29 ኡንቱንቱ ደንዲደ የሱሳ ካታማፐ ጋጻ ከሲደ ዱገ ኦላናዉ ካታማይ ኬጸቴዳ ደርያ ሁጲያ አፌድኖ። 30 ሽን የሱስ ኡንቱንቱ ግዱዋና አደ ቤዳ።

31 ሄዋፐ ጉይያን የሱስ ጋሊላ ጋድያን ደእያ ቅፍርናሆማ ካታማ ቤዳ። ሳምባታ ጋላሳንካ አሳ ታማርሴዳ። 32 እ ታማርስያ ትምርቲ ማታን ግድያ ድራዉ ስሴዳ አሳይ ኡባይ ማላለቴድኖ።✝

33 አይሁዳቱዋ ዎሳ ጎልያን ኢታ አያናይ ኦይቄዳ ብታኒ ደኤ፤ ባረ ኮሻ ቁ ኦ ዋሲደ፥ 34 "ሀያ ጎዶ አጋርኪ ናዝሬትያ የሱሳ፤ ኑዉ ኔናና አይ እትፐተይ ደኢ? ኑና ባይዛናዉ ያድ? ኔን ኦነንቶ ኤራድ፤ ኔን ጾሳ አዉ ኪቴዳ ጌሻ ግድኪ!" ያጌዳ።

35 የሱስካ፥ "ጮኡ ጋ፥ አፐካ ከሳ" ያግ ሴሬዳ። ኢታ አያናይ ብታንያ ኡንቱንቱ ግዱዋን ኩንድሲደ አይነ ቆሄናን አፐ ከሴዳ።

36 አሳይ ኡባይ ማላለቲደ እቱ እቶ፥ "ሀዌ አያ ቃሌ? ባረዉ ደእያ ማታንነ ዎልቃን ኢታ አያናቱዋ ሴሬ፤ ቃይ ኢታ አያናይካ ከሴ" ያጊደ ሃሳዬድኖ። 37 አ ዋሪካ ሄ ዩሹዋን ደእያ ጋድያ ኡባ ጋኬዳ።

38 የሱስ አይሁዳቱዋ ዎሳ ጎልያፐ ደንዲደ ስሞና ጎልያ ገሌዳ፥ ስሞና ቦሎታታ ዎልቃማ ቆጹዋ ሀርግያን ሀርገታደ ግሴዳዉንዉ የሱስ እዞ ፓናዳን አሳይ አ ዎሴዳ። 39 እ ማታን ኤቂደ ቆጹዋ ሀርግያ ሴርና፥ ሀርጊ የዲሼዳ፤ ሄ ዎድያንካ ደንዳደ ኡንቱንቶ ኪተታዱ።

40 አዋይ ዉሎ ዎድያን ዱማ ዱማ ሀርግያን ኦይቀቴዳ ሀርጋንቻቱዋ ኡባ አኮ አሄድኖ፤ እካ እቱዋ እቱዋ ቦላ ባረ ኩሽያ ዎደ ፓዳ። 41 ኢታ አያናቱካ፥ "ኔን ክርስቶሳ ጾሳ ናኣ" ያግ ዋሲደ ጮራ አሳፐ ከሴድኖ። እ ክርስቶሳ ግዶዋ ኡንቱንቱ ኤሬዳ ድራዉ ሃሳየና ማላ ድጌዳ።

42 ሳአይ ዎንቶ ዎደ አሳይ ባይናሳ ቤዳ፤ አሳይ ኡባይ አ ኮዪደ እ ደኢያሳ ዬድኖ። ባረንቱፐ ሻከት ቤናዳን ድጋናዉ ኮዬድኖ። 43 እ ቃይ፥ "ህን ሀራ ካታማቶ ባደ ጾሳ ካዉተ ምሽራቹዋ ቃላ ኦዳናዉ ኮሼ፤ ታን ኪተቴዳዌ ሀዋ ድራሳ" ያጌዳ።

44 ጋሊላን ደእያ አይሁዳቱዋ ዎሳ ጎለን ቃላ ታማርሲደ ጋምኤዳ።