1 የሱስ ሀዋፐ ስሚደ፥ ሳባኪድነ ጾሳ ካዉተ ምሽራቹዋ ቃላ ካታማንነ ሄራን ኦዲደ አዳ። ታማነ ላኡ የሱሳ ካልያዋንቱካ አናና እትፐ ደኢኖ። 2 ኢታ አያናፐነ ዎልቃማ ሀርግያፐ ፓጼዳዋንቱ እት እት ማጫዋንቱካ ደኢኖ። ሄዋንቱካ: ላፑ ጻላሂ ከሴዳ ማግዳላ ጌተትያ ካታማፐ ዬዳ ማይራሞነ፥ 3 ሄሮድሳ ጎልያን ሱን ግዴዳ ኩዛ ማቻት ዮሃኖ፥ ሶስና ጌተተዉናነ ሀራ ጮራቱዋና እትፐ ግዲደ፥ የሱሳነ አ ካልያዋንታ ሚሻን ማዴድኖ።

4 ጮራ አሳይ ዳሮ ካታማቱዋፐ ሺቂደ፥ የሱሳኮ ዬዳ ዎድያን ሌምሱዋን፥ 5 "ዘርያዌ ዘረ ዘራናዉ ከሴዳ። ዘርያ ዎደ እት እት ዘረይ፥ ኦግያ ዶናን ዎደ የቴዳ። ያትና ሳሉዋ ካፉ ሄዋ ሜዳ። 6 ሀራይ ቃይ ዛላ ቦላ ዎደ ዶሌዳ ዎደ ኮሽያ ሃ ደመና ድራዉ መሌዳ። 7 ሀራ ዘረይ አጉን ጋርሳን ዎዳ። አጉንይ እትፐ ድጪደ ምቴዳ። 8 ሀራይ ሎእያ ቱኤ ቢታን ዎዳ። ዶሎዋፐ ጉይያን፥ ዘረቶዋፐ ጼቱ ኩሽያ ዳኩዋ ሞኬዳ" ያጌዳ።

የሱስ ሀዋ ሃሳዪደ፥ "ሀይይ ደእያ ኡባይ ስሶ" ያግ ቃላ ቁ ኦደ ዋሴዳ።

9 አ ካልያዋንቱ፥ "ሀ ሌምሱ አያ ጉሴ?" ያግ አ ኦቼድኖ። 10 እካ ዛሪደ፥✝8:10 ኢሳ. 6:9

"ህንተንቶ ጾሳ ካዉተ ጹራ ኤራይ እመቴዳ፤ ሽን ሀራቶ፥ ጼሊድካ ኤረና ማላ፥ ስሲድካ አኬከና ማላ ሌምሱዋን ኦዳይ" ያጌዳ።

11 የሱስ፥ "ዘረ ሌምሱ ሀዋ: ዘረይ ጾሳ ቃላ። 12 ኦግያ ጋጻን ዎዳ ዘረይ፥ ጉ ዎደዉ ቃላ ስስያ አሳ፤ ኤለካ ጻላሂ ዪነ፥ ኡንቱንቱ ስሶዋን አማን አተና ማላነ ቃላይ ዎዛናፐ ዶገታና ማላ ኦ። 13 ዛላ ቦላን ዎዳ ዘረይ፥ ኮይሮ ቃላ ናሸቻን ስስያዋንታ። ሄዋንቱካ ጉ ዎድያ አማንኔ ፓጪ ጋክያ ዎድያን ጻጱ ባንታ ድራዉ ኤለካ አማኑዋ ካዲኖ። 14 አጉን ጋርሳን ዎዳ ዘረይ፥ ቃላ ስስያዋንታ፤ ሽን ደኡዋ ህርጋይነ ዱረተ እሻሉ ጩሌዳዋንታ። ሄዋንቱ ሎኦ አይፍያ እማናዉ ዳንዳይክኖ። 15 ሎኦ ቱኤ ቢታን ዎዳ ዘረይ በስያዌ፥ ሎአነ ጽሎ ዎዛናን ቃላ ስሲደ ናግያ አሳነ ሄ ቃላን ምን ኤቂደ ሎኦ አይፍያ አይፍያዋንታ።

16 "ጾምፕያ ሳደ እትባን ቁምእ አግያዌ ዎይ አርሳፐ ጋርሳና ዎያዌ ኦንነ ባዋ።✝8:16 ማቶሳ 5:15፤ ሉቃሳ 11:33 17 ቆንጨናን ቆሱዋን አትያባይ እት የዉነ ባዋ። ኤረተናንነ ቤትያሳ ከሰናን አታናባይ አይነ ባዋ።✝8:17 ማቶሳ 10:26፤ ሉቃሳ 12:2 18 ሄዋ ግድያ ድራዉ ሎይ አኬካን ስስተ። ዎዛናፐ ስስያዎ ኡባዉ ጉጅ አኬካይ እመታና፤ አኬከናዋፐ ሄ አዉ ደእያዋ ማላትያ አኬካይካ አከታናዋ" ያጌዳ።✝8:18 ማቶሳ 25:29፤ ሉቃሳ 19:26

19 ሄ ዎድያን አታነ እሻቱ የሱሳና ጋከታናዉ አኮ ዬድኖ፤ ሽን አሳ ጮራተፐ ደንዶ ጋሱዋን አ ደማናዉ ዳንዳይበይክኖ። 20 እት ብታኒ፥ "ነ ዳያነ ነ እሻቱ ኔናና ጋከታናዉ ኮዮ ድራዉ ካረን ዪደ ኤቄድኖ" ያግ ኦዴዳ።

21 እካ፥ "ታ ዳያነ ታ እሻቱ፥ ጾሳ ቃላ ስሲደ ኦሱዋ ቦላን ፔሽያዋንታ" ያግ ዛሬዳ።

22 እት ጋላስ የሱስ ባረና ካልያዋንቱና እትፐ ዎንግርያ ገሊደ፥ "አባፐ ሄፍን ቦይተ" ጌዳ። ኡንቱንቱካ ደንዲደ ሀመታ ዶሜድኖ። 23 ፕን ደእያ ዎደ፥ የሱስ ገምእሼዳ። አባን ጎቱዋ ጫርኩ ደንዶ ድራዉ፥ ዎንግርያ ጋርሳን ሃይ ኩምና ዳሮ መቶቴድኖ። 24 ኡንቱንቱ የሱሳኮ ሺቂደ፥ "ጎዳዉ፥ ጎዳዉ! ኑን ባዮይተቴ!" ያጊደ አ ቤጎድኖ።

እካ ቤጎቲደ ጎቱዋነ ሃ ቤታ ሴርና፥ ጎቱነ ሃ ቤታይ ኤቄዳ፤ ኡባባይካ ጮኡ ጌዳ። 25 እካ፥ "ህንተንቶ አማኑ ሀቃን ደኢ?" ያጌዳ።

ኡንቱንቱካ ያይ ማላለቲደ እቱ እቱዋ፥ "ሀዋዳን ጫርኩነ ሃይ ጮኡ ጊተ ጊና አዛዘትያዌ ሀዌ ኦኔ?" ያገቴድኖ።

26 ጋሊላ አባፐ ሄፍንና ደእያ ገርገሰኖና ጌተትያ ጋድያ፥ የሱስነ አ ካልያዋንቱ፥ ዎንግርያን ፕኒደ ጋኬድኖ። 27 ሄ ሃፐ ፕን ሳኣ ዎ ዎደ፥ ኢታ አያናን ኦይቀቴዳ እት ብታኒ፥ ካታማፐ ከሲደ አናና ጋከቴዳ። ዳሮ ዎድያፐ ዶሚደ ማዩዋ ማየናን ካሎ ጎልያ አጊደ ዱፉዋን ደኤ።

28 የሱሳ ደሞዋፐ ጉይያን፥ ዋስ አ ስንን ጉፋኒደ ዎልቃማ ኮሻን፥ "ዎልቃማ ጾሳ ናኣ የሱሳ፥ ታዉነ ነዉ አይበ እትፐተይ ደኢ? ታና ዋይሶፓርኪ፤ ታ ኔና ዎሳይ" ያጌዳ። 29 እ ሄዋ አያዉ ጌዴ ጎፐ፥ ብታንያ የግ ከሳና ማላ የሱስ አ አዛዞ ድራሳ።

ኢታ አያናይ ብታንያ ኦይቆደፐ ዳሮ ዎደ ግዶ ድራዉ፥ ብራታ ሳንላታን ገድያነ ኩሽያ ቃሸቲደ ናገቴ። ሳንላታ ዱ አኪደ ኢታ አያናይ ካለና ባዙዋ ቤ።

30 የሱስካ፥ "ነ ሱንይ ኦኔ?" ያግ ኦቼዳ። እካ ጮራ ኢታ አያናይ ገል ኡቶ ድራዉ፥ "ሌግዮና"*8:30 ሌግዮና፦ ሀ ሱንይ ግሪከ ጌተትያ ቃላፐ አከቴዳ። ሱን ብለይ "ጮራ" ጉሳ። ያጌዳ። 31 ባረንታ የሱስ፥ "ህን ጪሞ ኦላ ቢተ" ያገና ማላ ዎሴድኖ።

32 ሄዋን ደእያ ዞዝያ ጋጻን ሄመትያ ጮራ ጉዱንቱ ደኢኖ። ጮራ ቱና አያናቱ፥ ሄ ጉዱንቱዋ ጋርሳ፥ "ገልተ" ጋና ማላ የሱሳ ዎሴድኖ። እካ፥ "ቢደ ገልተ" ጌዳ። 33 ኢታ አያናቱካ ብታንያፐ ከሲደ ጉዱንቱዋ ጋርሳ ገሌድኖ። ጉዱን ዉዲካ ላንቂያፐ ካጆቲደ ኤለካ አባን ምተቴድኖ።

34 ጉዱን ሄምያዋንቱ ሀኖዋ ኡባ በኦ ዎደ ሀራሳ ቢደ፥ ሄ ካታማንነ ዩሹዋን ሀኖዋ ኦዴድኖ። 35 አዬ ሀኔደንቶ በአናዉ ከሲደ፥ አሳይ የሱሳኮ ዬድኖ። ኢታ አያናይ ከሴዳ ብታኒ፥ አ ዎዛናይ ስምና ማዩዋ ማዪደ የሱሳ ገድያ ማታን ኡቶዋ በኢደ ያዬድኖ።

36 ኢታ አያናን ኦይቀቴዳ ብታኒ ዎት ፓጼደንቶ በኤዳ አሳይ፥ ሀራ አሳዉ ኦዴድኖ። 37 ገርገሰኖና ጋድያንነ ሄ ሄራን ደእያ አሳይ ኡባይ ዳሪ ያዬዳ ድራዉ፥ የሱስ ባረንቱ ማታፐ ባና ማላ ዎሴድኖ። እካ ዎንግርያን ገሊደ ቤዳ። 38 ኢታ አያናይ ከሴዳ ብታኒካ የሱሳና ባና ጊደ፥ አ ዎሴዳ፤ ሽን የሱስ፥ 39 "ነ ጎለ ስማደ ጾሳይ ነዉ ኦ ዎልቃማባይ አየንቶ ማርካታ" ያግ የዴዳ።

40 የሱስ ስሜዳ ዎደ አሳይ ኡባይ ናግ ደእያ ድራዉ፥ አ ሞክ አኬድኖ። 41 ሄ ዎደ፥ አይሁደ አሳ ዎሳ ጎለዉ ሱን ግዴዳ ያእሮሳ ያገትያ ብታኒ አኮ ዬዳ። እካ የሱሳ ገድያ ስንን ኩንዲደ፥ ባረ ጎለ ገላና ማላ ዎሴዳ። 42 ጋሶተይካ ታማነ ላኡ ላይይ ኩሜዳ አዉ ደእያ እት ናታ ሀይቃናዉ ማታ ኡቶ ድራሳ።

የሱስ ብያ ዎደ ጮራ አሳይ አ ዩሹዋን ሱገቲደ መቶድኖ። 43 ሄ አሳ ግዶን ሄ ዎድያን ታማነ ላኡ ላይ ኡባ ሱይ ጎግያ ምሽራታ ደአዉ። ባረ ደእያ ሻሉዋ ኡባ ልያ ኤርያዋንቶ ዉርስናካ ፓናዉ ዳንዳዮዌ ኦንነ ባዋ።

44 ጉየና ያደ አ ማዩዋ ማጫራ ቦቻዱ፤ ሄ ማንእያን ኢፐ ጎግያ ሱይ ኤቂ አጌዳ። 45 የሱስ፥ "ኦኔ ታና ቦቾዌ?" ያጌዳ።

ኡባይ ካድና ጰጽሮስ፥ "ጎዳዉ፥ አሳይ ሱገቲደ መቶትያ ዎደ፥ ‘ኦኔ ታና ቦቾዌ’ ያጋይ?" ጌዳ።

46 ሽን የሱስ፥ "እት አሳይ ታና ቦቼዳ፤ ዎልቃይካ ታፐ ከሶዋ ታን ኤራይ" ያጌዳ። 47 ምሽራታካ፥ የሱሳ እዛ ቦቾዌ ኤረተናን አትቤናዋ ኤራደ፥ ኮኮራደ ዮና የሱሳ ስንን ኩንዳ አጋዱ። አያ ጋሱዋን የሱሳ ቦቻደንቶ እዛ ፓጾዋ ኡባ አሳ ስንን ኦዳዱ።

48 እካ እዝዉ፥ "ሀ ምሽራቴ! ነ አማኑ ኔና ፓዳ፤ ሳሮ ባ" ያጌዳ።

49 የሱስ ሃሳይ ደእሽን፥ አይሁዳ አሳ አማንያዋንቱ ሱን ሶይፐ እት ብታኒ ዬዳዌ፥ "ነ ናታ ሀያዱ፤ ስም ታማርስያዋ መቶፓ" ያጌዳ።

50 የሱስ ሀዋ ስሲደ፥ "ያእሮሳ፥ አማናፐ አትን፥ ያዮፓ! እዛ ፓጻናዉኑ" ያግ ዛሬዳ።

51 ሶይ ገሊደ: ጰጽሮሳፐ፥ ያቆባፐ፥ ዮሃንሳፐ፥ ናት አቡፐነ ናት ዳይፐ አትን፥ ኦንነ ገላናዳን ኤኖ ግቤና። 52 ኡባይ ሄ ናትዉ ዬኪደነ ካዮቲድ ደኢኖ። ሽን የሱስ፥ "ዬኮፕተ፥ ግሳዱፐ አትን ሀያበይኩ" ያጌዳ።

53 እዛ ሀይቄዳዋ ኤሪደ አ ቦላ ሚጬድኖ። 54 ግዶፐ አትን የሱስ እዝ ኩሽያ ኦይቂደ፥ "ሀ ናቴ፥ ቤጎታ!" ያጌዳ። 55 እዝ ሸምፑካ ስምና ኤለካ ደንዳ ኤቂና ማናባ እማና ማላ፥ የሱስ አዛዜዳ። 56 እዝ አቡነ እዝ ዳያ ማላለቴድኖ፤ ሽን የሱስ ኡንቱንታ፥ ሀኖ የዉዋ ኦስነ ኦደና ማላ አዛዜዳ።