ኤርማሳ ሴላ 2

ጾሳይ የሩሳላመ ቦላ አሄዳ ሙሩዋ

1 ጎዳይ ባረ ሀንቁዋን ሻርያፐ ጋርሳና ጽዮኖ ዎት ዎዴ! እ እስራኤልያ ፑላ ሳሉዋፐ ዱገ ሳኣ ኦሌዳ። እ ባረ ሀንቁዋ ጋላሳን ባረ ጌሻ ጎልያካ ቆፕቤና። 2 ጎዳይ ይሁዳን ደእያ ኬቱዋ ኡባ ቃረተናን ይሴዳ። ቃይ ባረ ሀንቁዋን ሄ ቢታ ጌሱዋ ኡባ ኮሌዳ። ሄ ካዉተነ አ ካፖቱዋ ሳኣን ዱገ ዎደ ካዉሽሴዳ። 3 ባረ ሱልያ ሀንቁዋን እስራኤልያ ዎልቃ ኡባ መንሬዳ። ሞርኪ አ ኦላናዉ ይያ ዎደ፥ ጎዳይ ባረ ኡሸቻ ኩሽያ ኡንቱንቱ ቦላፐ ድጌዳ። ባረ ዩሹዋን ደእያዋ ኡባ ምያ ላጮትያ ታማዳን፥ ያቆባ ቦላ ኤጽ ከሴዳ። 4 ሞርክያዳን እ ባረ ዎንዳፍያ ኡንቱንቱ ቦላ ዳፌዳ። ኡቁንያዋንቱዋዳን እ ባረ ኡሸቻ ኩሽያ ምንሲደ፥ ጼልና ሎእያ አሳ ኡባ ዎዳ። ጽዮነ ጎለቱዋ ቦላ ባረ ሀንቁዋ ሱሉዋ ታማዳን ጉሴዳ። 5 ጎዳይ ሞርክያዳን ሀኒደ፥ እስራኤልያ ይሴዳ። እ ካትያ ጎለቱዋነ ጌሶቱዋ ኡባ ኮሌዳ። ይሁዳ አሳ ቦላን ካዩዋነ ዬኩዋ ጉጄዳ።

6 እ ባረ ጌሻ ጎልያ አታክልትያ ግዶን ደእያ ዳስያዳን፥ ሾድ ኦሌዳ። ላይ ግዶን ቦንችያ ባላቱነ ሳምባታቱ ሙለ ዶገታናዳን፥ መና ጎዳይ ኦዳ። ባረ ዎልቃማ ሀንቁዋን ካትያነ ቄስያ ካዳ። 7 ጎዳይ ባረዉ ያርሹዋ ያርሽያ ሳኣ እጼዳ፤ ባረ ጌሻ ጎልያካ ባሼዳ። ካትያ ጎለቱዋ ግምቢያ ሞርከቱዋ ኩሽያን አደ እሜዳ። አሳይ ላይ ባላ ቦንቺደ ዋስያዋዳን፥ ሞርከቱ መና ጎዳ ጎልያን ዋሴድኖ። 8 መና ጎዳይ ጽዮን ግምቢያ ኮላናዉ ቃቼዳ፤ እዞ ልክያ ዎዶሩዋ ምጬዳ፤ እዞ ይሰናን ደኢድ፥ ባረ ኩሽያ ዛረና። ሄዋ ድራዉ፥ ግምቢነ ጌሱ እትፐ ኩንዳናዳን ኦዳ። 9 የሩሳላመ ፐንግያ ሳንቃቱ ቢታን ዱገ ሞገቴድኖ፤ ኡንቱንቱ ኩልቦቱዋካ እ መንሬደ ይሴዳ። እ ካቲነ ካፓቱ ኦሞደቲደ፥ ካዉተቱዋ ግዶ ቤድኖ። ህግያ ታማርስያዌካ ባዋ፤ እዝ ትምቢትያ ኦድያዋንቶካ መና ጎዳፐ ሳጻይ ይያዋ አጌዳ። 10 ጽዮን ጭማቱ ጮኡ ጊደ፥ ቢታን ኡት አጌድኖ፤ ባረንቱ ሁጲያን ባና ቆሊደ፥ ማቃካ ማዬድኖ። የሩሳላመ ዎዶሮቱ ሳአዉ ዱገ ሆኬድኖ።

11 ታ አይፊ አፎጽ አፎጺደ ጆሌዳ፤ ታ ዎዛናይካ ካዩዋን ሻቢረቴዳ። አያዉ ጎፐ፥ ታ አሳይ ዬዳ፤ ጉ ናናቱነ ዪኦ ናናቱ ካታማ ኦግያን ላባኒደ ኩንዴድኖ። 12 ኡንቱንቱ ባረንቱ አየቱዋ፥ "ቁማ እማ! ዎይንያ ኤሳ እማ!" ያጊደ ዋሲኖ። ካታማ ኦግያን ደሸቲደ ላባንያ አሳቱዋዳን ኡንቱንቱ ላባንና፥ ኡንቱንቱ አየቱዋ ክዉዋን ኡንቱንቱ ሸምፑ ከሴ።

13 ኔኖ፥ የሩሳላመ፥ ታን ነባ አይ ጋናዉ ዳንዳያይታ? ዎይ ቃይ ነ ቆሁዋ ታን አያና ልካናዉ ዳንዳያይታ? ኔኖ፥ ዶሰቴዳ ጽዮኔ፥ ቃይ ታን ኔና ዎታ ምንናዉ ዳንዳያይታ? ነ ማዱይ አባ ኬሻ ጪማ። ያትና፥ ኔና ኦን ፓናዉ ዳንዳዪ? 14 ነ ትምቢትያ ኦድያዋንቱ ነዉ ዎርዶነ ፓና ሳፃ በኤድኖ፤ ኡንቱንቱ ኔን ኦሞዶ ቤና ማላ፥ ነ ናጋራ ቆንጭሲደ ኦድበይክኖ። ኡንቱንቱ ባለያ ዎርዶ ሳፃ ነዉ በኤድኖ።

15 ነ ማታና አያ ኡባይ ባረ ብራያ ነ ቦላን ዱኬ። ቃይ፥ "ቢታን ሳኣን ኡባፐ አአደ ሎእያ ካታማታ ሀኒ? ኩመን ቢታዉ ናሸቻ ጌተቴዳ ካታማታ ሀኒ?" ያጊደ ኔና ቅሊጬድኖ፤ ባረንቱ ሁጲያካ ቃኖ። 16 ነ ሞርከቱ ኡባይ ባረንቱ ዶና ነ ቦላ ዶዬድኖ፤ ቅሊጪድነ ይሉዋን ባረንቱ አቻ ጋርጪደ፥ "ኑን እዞ ይሴዶ! ኑን ናጌዳ ጋላሳይካ ሀዋ፤ ሀእ ጋኪደ በኤዳ!" ያጊኖ። 17 መና ጎዳይ ባረ ሀልቼዳዋ ኦዳ፤ በን ዎደ እ አዋዬዳ ባረ ቃላካ ፖሌዳ። የሩሳላምዉ ቃረተናን እዞ ኮሌዳ። እ ሞርከቱዋካ ናሸቼዳ፤ እዞ ኡቁኔዳዋንቱ ዎልቃካ ቁ ቁ ኦዳ።

18 ኔኖ፥ ጽዮኔ፥ ጎዳኮ ነ ድርሳ ግምቢ ዋሶ! ነ አፎይካ ቃማነ ጋላስ ሻፋዳን ጎጎ! ኔን ኔና ሸምፕሶፓ፤ ነ አይፍያዉካ ሸምፑዋ እሞፓ! 19 ደንዳ፤ ቃማ ደንዳደ ዋሳ። ጎዳ ስንን ነ ዎዛና ሃዳን ጉሳ። ኦግያ ዶናን ኡባን ኮሻቲደ፥ ላባኔዳ ነ ናናቱዋ ሸምፖ ነ ኩሽያ አኮ ፑደ ደንደ ዎሳ!

20 አቤት መና ጎዳዉ፥ በአ! ኔን ኦ ቦላ ካሰ ሀዋዳን ኦድንቶ፥ አነ ቆፓ። አየቱ ባረንቱ ክዉዋን እሻልሲደ ድቼዳ ባረንቱ ናናቱዋ ሚኖ ጋይ? ቃይ ቄሳቱ ነ ናበቱ ጎዳ ጌሻ ጎልያ ግዶን ሀይቂኖ ጋይ?

21 ጭማይነ ናናይ ካታማ ግዶ ኦግያ ባናን ግሴዳ፤ ታ ዎዶሮቱነ ታ ዎዳላቱ ማሻን ዉሬድኖ። ኔን ነ ሀንቁዋ ጋላስ ኡንቱንታ ዎዳ፤ ኡንቱንቶ ቃረተናን ኡንቱንታ ሲፋዳ።

22 ግብራ ጋላሳዉ አሳ ጼስያዋዳን፥ ኔን ታና ዳጋንያዋንታ ኡባ ሳፐ ጼሳዳ። መና ጎዳ ሀንቁዋ ጋላሳን ከስ አክ ፓጻ አቴዳዌ እቱነ ባዋ። ታን ታ ክዉዋን እሻልሳደ ድቼዳ ናናቱዋ ኡባ ሞርኪ ዎ ይሴዳ።