1 ጾሳ ናኣ* የሱስ ክርስቶሳ ዎንጋላ ምሽራቹዋ ዶመ።

2 ናብያ እስያስ ጻፌዳ ማጻፋን ጾሳይ፥

"በአ፤ ታ ኪትያዋ ታን ኔፐ ስንዉ የዳና።

እ ነዉ ኦግያ ከሳናዋ።✝

3 እት ብታኒ ቢታ ባዙዋን ባረ ኮሻ ቁ ኦደ፥

‘ጎዳ ኦግያ ጊግስተ።

እ ሀመታና ሎሱዋካ፥

አዉ ሱርስተ’ ጌዳዋዳን"

ሀኔዳ።

4 ጻማቅያ ዮሃንስ አሳ ጻማቂድነ፥ "ጾሳይ ህንተ ናጋራ አቶ ጋና ማላ፥ ህንተንቱ ናጋራፐ ስሚደ ጻማቀትተ" ያግ ቃላ ኦዲደ ቢታ ባዙዋን ከስ ዎዳ። 5 ይሁዳ ጋድያን ደእያ አሳይ ኡባይነ የሩሳላመ ካታማ አሳይ ኡባይ ዮሃንሳኮ ዬድኖ። ባረንቱ ናጋራካ ፓጽና፥ ዮሃንስ ሄ አሳ ዮርዳኖሳ ሻፋን ጻማቄዳ።

6 ዮሃንስ ጋሉዋ እስክያፐ ዳደቴዳ ማዩዋ ማዪደ፥ ባረ ጼሳን ዳፉዋ ዳንጬዳ፤ ቃይ ቦልያነ ዎራ ኤሳ ሜዳ።✝ 7 ዮሃንስ ቃላ ኦዲደ፥ "ታፐ ጉየና ዳሮ ምንያዌ ዬ፤ ሀራይ አቶ፥ አ ጫማካ ገድያፐ ከሳ ቶካናዉ ታን በስከ። 8 ታን ህንተንታ ሃን ጻማቃይ፤ ሽን እ ህንተንታ ጌሻ አያናን ጻማቃናዋ" ያጌዳ።

9 የሱስ ሄ ዎደ ጋሊላ ጋድያን ደእያ ናዝሬተ ካታማፐ ዪና፥ ዮሃንስ ዮርዳኖሳ ሻፋን አ ጻማቄዳ። 10 የሱስ ሃፐ ከሶሳና ሳሉ ዶየትሺናነ ጌሻ አያናይ ባረ ቦላ ሀራጵያዳን ዎሽን በኤዳ። 11 ቃይ ሳሉዋፐ፥ "ታን ሲቅያ ታ ናአይ ኔና፤ ታና ነባይ ናሸቼ" ያግያ ቃላይ ስሰቴዳ።✝

12 ኤለካ ጌሻ አያናይ አሳይ ባይና መላ ሳ አ የዴዳ። 13 የሱስ አሳይ ባይና ሳን ባረና ሴጻናይ ፓጭሽን፥ ኦይታሙ ጋላሳ ጋዳ፤ ዱኣናካ ደኤዳ፤ ኪታንቻቱካ ዪደ፥ አዉ ኦድኖ።

14 ዮሃንስ ቃሸቶዋፐ ጉይያን፥ የሱስ ጾሳ ካዉተ ዎንጋላ ምሽራቹዋ ኦዲደ፥ ጋሊላ ጋድያ ቢደ፥ 15 "ዎዲ ጋኬዳ፤ ጾሳ ካዉተይካ ማታቴዳ። ህንተንቱ ናጋራፐ ስሚደ፥ ዎንጋላ ምሽራቹዋ አማንተ" ያጌዳ።

16 የሱስ ጋሊላ አባ ላንቂያና አደ፥ ሞልያ ኦይቂያዋንታ፥ ስሞናነ አ እሻ እንድራሳ፥ ባረንቱ ዳባ አባን የግያዋንታ በኤዳ። 17 ያቲደ ኡንቱንታ፥ "ታና ካልተ፤ ታን ህንተንታ ሞልያ ኦይቂያዋዳን አሳ ታኮ አህያ ኦግያ ታማርሳና" ያጌዳ። 18 ሄዋፐ ጉይያን ኡንቱንቱ ኤለካ ባረንቱ ዳባ አጊደ፥ የሱሳ ካሌድኖ።

19 የሱስ ጉ ስንዉኮ ቢደ፥ ዛብድዮሳ ናና ላኡ እሻቱዋ፥ ያቆባነ ዮሃንሳ ዎንግርያ ግዶን ባረንቱ ዳባ ጊግስያዋንታ በኤዳ። 20 እ በኦሳንካ ኡንቱንታ ጼስና፥ ባረንቱ አዉዋ፥ ዛብድዮሳ፥ አ ኦሳንቻቱዋና ዎንግርያ ግዶን አጊደ፥ የሱሳ ካሊደ ቤድኖ።

21 ኡንቱንቱ ቅፍርናሆማ ጌተትያ ካታማ ዪደ ገሌድኖ፤ የሱስ ሳምባታ ጋላሳይ ጋኮ ዎደ፥ አይሁዳ ዎሳ ጎለ ገሊደ፥ ታማርሱዋ ዶም አጌዳ። 22 ባረዉ ማታይ ደእያ አሳዳን፥ አሳ እ ታማርስያዋፐ አትን፥ ህግያ ታማርስያዋንቱዳን ታማርሰና ድራዉ፥ አሳይ አ ትምርትያን ማላለቴዳ።

23 ሄ ዎደ ኢታ አያናይ ደእያ እት ብታኒ አይሁዳ ዎሳ ጎለ ገሎሳናካ ባረ ኮሻ ቁ ኦደ፥ 24 "ናዝሬትያ የሱሳ፥ ኔን ኑፐ አያ ኮያይ? ኑና ይሳናዉ ያድ? ኔን ኦነንቶ ኤራይ፤ ኔን ጾሳፐ ኪተቴዳ ጌሻ ግድኪ!" ያጌዳ።

25 የሱስ ሄ ኢታ አያና፥ "ሀይዛ፤ ብታንያፐ ከሳ" ያጊደ አዛዜዳ።

26 ኢታ አያናይ ብታንያ ቡጨሬ፥ ዳሪ ዋስሲደ፥ አፐ ከስ አጌዳ። 27 አሳይ ኡባይ ማላለቲደ፥ "ሀዌ አዬ? ሀ ብታኒ ባረ ማታን ሀራይ አቶ፥ ኢታ አያናቱዋካ አዛዜዳ፤ ኡንቱንቱካ ቃይ አዉ አዛዘቲኖ፤ ሀዌ አይበ ኦራ ትምርቴ?" ያጊደ፥ ባረ ግዶን እቱ እቱዋ ኦቼዳ።

28 ጋሊላ ጋድያን ደእያ ሄራይ ኡባይ ኤለካ የሱሳ ዋርያ ሲሴድኖ።

29 የሱስ አይሁዳ ዎሳ ጎልያፐ ከሶሳን፥ ያቆባናነ ዮሃንሳና እትፐ ስሞናነ እንድራሳ ሶይ ብ አጌዳ። 30 ስሞና ቦሎታታ ቆጹዋ ሀርጋደ ግሴዳዉንባ እ ያ ጋኮሳናካ አዉ ኦድ አጌድኖ። 31 እ እዝኮ ሺቂደ፥ እዝ ኩሽያ ኦይቂደ፥ እዞ ደን ኤሴዳ፤ ቆጹ እዞ አግና፥ እዛ ኡንቱንቶ ኦዱ።

32 ሀርጌዳ አሳ ኡባነ ኢታ አያናቱ ኦይቄዳ አሳ ኡባ ኦማርስ አዋይ ዉሌዳዋፐ ጉይያን፥ አሳይ አኮ አሄድኖ። 33 ካታማን ደእያ አሳይ ኡባይ ሄ ካርያ ሺቄዳ። 34 የሱስ ዱማ ዱማ ሀርግያን ኦይቀቴዳ ጮራ አሳ ፓደ፥ ጮራ ጻላሀቱዋካ ከሴዳ። እ ክርስቶሳ ግድያዋ ኢታ አያናቱ ኤሬዳ ድራዉ፥ ኡንቱንታ ሃሳይሰናን ድጌዳ።

35 የሱስ ጉራ ዎንቱማን ደንዲደ፥ ሶይፐ ከሲደ፥ አሳይ ባይናሳ ቢደ ያን ጾሳ ዎሴዳ። 36 ስሞንነ አናና ደእያዋንቱ አ ኮዪደ ቤድኖ። 37 ኡንቱንቱ አ ደሚደ፥ "አሳይ ኡባይ ኔና ኮዬ" ያጌድኖ።

38 ሄዋፐ ጉየ የሱስ ቃይ ኡንቱንታ፥ "ሄዋ ሄራን ደእያ ሀራ ካታማቱዋ ቦይተ፤ ታን ሄዋን ቃላ ኦዳናዉ በሴ፤ አያዉ ጎፐ፥ ታን ዬዳዌ ሄዋሳ" ያጌዳ። 39 አይሁዳ ዎሳ ጎለቱዋን ቃላ ኦዲድነ ኢታ አያናቱዋ ከሲደ፥ ጋሊላ ጋድያ ኡባ ዩዬዳ።

40 ኦሉ ኦይቄዳ እት ብታኒ የሱሳኮ ዪደ፥ አ ስንን ጉልባቲደ፥ "ኔን ኮዮፐ፥ ታና ጌሻ ፓናዉ* ዳንዳያ" ያጊደ ዎሴዳ።

41 የሱስ አዉ ቃረቴዳ፤ ባረ ኩሽያ የድ፥ አ ቦቺደ፥ "ታን ኮያይ፤ ጌያ፤ ፓጻ!" ያጌዳ። 42 ኤለካ ኦሉ ብታንያ የድ አግና፥ ብታኒ ጌይ ፓጽ አጌዳ። 43 የሱስ ዳሪ ሀንቀቲደ፥ ኤለካ አ ከስ የዴዳ። 44 እ ብታንያ፥ "ኔና ኤራ! ሀዋ ኦስነ ኦዶፓ፤ ሽን ባደ ነ ቦላ ቄሳ በሳ፤ ቃይ ኔን ሀእ ጌሻ ግዴዳዋ አሳ ኤርሳናዉ፥ ሙሴ አዛዜዳ ያርሹዋ ያርሻ" ያጌዳ።

45 ሽን ብታኒ ቢደ፥ የዉዋ ኡባ ሳን አሳ ኡባዉ ኦዱዋነ ላለ ዶሜዳ፤ ሄዋ ድራዉ፥ የሱስ ቆንጭያ ከሲደ፥ ካታማ ገላናዉ ዳንዳይቤና፤ ሽን አሳይ ባይናሳ ጋጻን ደኤዳ፤ ቃይ አሳይ ኡባ ሳፐ አኮ ዬድኖ።