1 የሱስ ጌሻ ጎልያፐ ከስሽን፥ አ ካልያዋንቱፐ እቱ አ፥ "ታማርስያዎ፥ ሀዌ አይበ ሎኦ ሹቻተንቶነ ቃይ አይበ ሎኦ ሹቻ ጎላቱዋ በአይ!" ያጌዳ።

2 የሱስ ዛሪደ፥ "ሀ ዎልቃማ ሹቻ ጎላቱዋ በአይ? ሀ ጎላቱዋን ደእያ እት ሹቻይነ አተናን ኡባይ ኮለታና" ያጌዳ።

3 የሱስ ጌሻ ጎልያፐ ህን ባጋና ደብረ ዛይተ ደርያ ቦላን ኡቴዳ ዎደ፥ ጰጽሮስ፥ ያቆብ፥ ዮሃንስነ እንድራስ ባረንቱ ጻላላ አኮ ዪደ አ፥ 4 "ሄዌ አዉደ ሀናነንቶ፥ ኑዉ ኦዳርኪ፤ ቃይ ሄዌ ኡባይ ፖለታና ዎድያ ኤርስያ ማላቱ አያ ግዳኔ?" ያጊደ ኦቼድኖ።

5 የሱስ ቃይ ኡንቱንቶ ሀዋዳን ያጊደ፥ ኦዱዋ ዶሜዳ፤ ህንተንታ ኦንነ ባለና ማላ ናገትተ። 6 ጮራ አሳቱ ታ ሱንን፥ "ታን ክርስቶሳ" ያጊደ ያናዋ፤ ጮራ አሳ ባለና። 7 ማታን ደእያ ኦላ ኮሻነ ሃኩዋን ደእያ ኦላ ኦዱዋ ህንተ ስስያ ዎደ፥ ህርጎፕተ፤ ሄዋ ማላባይ ሀናናዉ በሴ፤ ሽን ዉርሰይ ብራ። 8 አያዉ ጎፐ፥ እት ጋደ አሳይ ሀራ ጋደ አሳና ኦለታና፤ ቃይ እት ካዉተይ ሀራ ካዉተና ኦለታና፤ ቢታ ቃይ ኡባ ሳን ደአና፤ ኮሻይካ ደአና፤ ሽን ሄዌ ኮይሮ የሉዋ ኦይ ማላ።

9 ሽን ህንተ ህንተንቱ ሁጰዉ ናገትተ፤ አያዉ ጎፐ፥ አሳይ ህንተንታ ኦይቂደ፥ ፕርዳ ጎለዉ አደ እማና፤ ቃይ ባረ አይሁዳ ዎሳ ጎለቱዋንካ ህንተንታ ልሱዋን ሾጫና፤ ጋድያ ሞድያዋንቱ ስንንነ ካታቱዋ ስንን ታ ድራዉ ህንተ ማርካታናዉ ኤቃና። 10 ምሽራቹዋ ቃላይ ኮይሮና አሳዉ ኡባዉ ኦደት ድጋናዉ በሴ። 11 ኡንቱንቱ ህንተንታ ፕርዳ ጎለ አህያ ዎደነ አደ እምያ ዎደ፥ ዎት ሃሳያንተንቶ ኮይሮና ህርጎፕተ፤ ሄ ሳትያን ጾሳይ ህንተንቶ እምያባ ሃሳይተ። አያዉ ጎፐ፥ ጌሻ አያናይ ሃሳያናፐ አትን፥ ሃሳይያዋንቱ ህንተንታ ግድክታ።

12 እሻይ ባረ እሻ፥ አዉ ባረ ናኣ ዎሳና፤ ቃይ ናናይ ባረንቱ አዎቱዋ ቦላንነ ባረንቱ አየቱዋ ቦላ ደንዲደ፥ ኡንቱንታ ዎሳና። 13 አሳይ ኡባይ ህንተንታ ታ ሱን ድራዉ እጻና፤ ሽን ዉርሰይ ጋካናዉ ገንጭያዌ አታና።

14 ሽን ናብያ ዳኔል ኦዴዳ ባሻ ቱናተይ ኤቃናዉ በሰናሳን ኤቂሽን ህንተ በእያ ዎደ፥ ሄዌ ዋግያዌንቶ፥ ናባብያዌ አኬኮ፤ ይሁዳ ጋድያን ሄ ዎደ ደእያዋንቱ ደርያኮ በትኖ።✝ 15 ጎልያ ሁጲያን ደእያ ኡራይካ እትባ አካናዉ ዱገ ዎደ፥ ባረ ሶይ ገሎፖ። 16 ጋደን ደእያዌካ ባረ ማዩዋ አካናዉ ጉየ ስሞፖ። 17 ሄ ዎደ ሻሃራ ማጫዋንቶነ ንያ ማጫዋንቶ አዬሮ። 18 ሽን ሀዌ ኡባይ ሀንያ ዎዲ ባልጉዋ ግደና ማላ፥ ጾሳ ዎስተ፤ 19 አያዉ ጎፐ፥ ጾሳይ ሳኣ ኮይሮ መዳዋፐ ዶሚደ፥ ሀእ ጋካናዉ፥ ኡባካ ደእቤና መቱ፥ ቃይ ሀዋፐ ስንዉካ ኡባ ደኤና መቱ አሳ ቦላ ሄ ዎደ ደአና።✝ 20 ጎዳይ ሄ ጋላሳቱዋ ፓይዱዋ ጉያዌ ባዌንቶ፥ አሳ ግዴዳ ኦንነ አተና፤ ሽን እ ባረ ዶሬዳ አሳቱዋ ድራዉ፥ ሄ ጋላሳቱዋ ፓይዱዋ ጉዳ።

21 ሄ ዎደ ኦንነ ህንተንታ፥ "በእተ፤ ክርስቶስ ሀዋን ደኤ" ዎይ፥ "በእተ፤ ክርስቶስ፥ ሄዋን ደኤ" ያጎፐ፥ ሄዋ አማኖፕተ። 22 አያዉ ጎፐ፥ ዎርዳንቻ ክርስቶሳቱነ ዎርዶ ናባቱ ደንዲደ ባረንቶ ዳንዳየቶፐ፥ ሀራይ አቶ ጾሳይ ዶሬዳዋንታካ ባለናዉ ማላታነ ማላልስያባ በሳና። 23 ሽን ህንተ ናገትተ፤ ታን ህንተንቶ ኡባባ ካሰታደ ኦዳድ።

24 ሽን ሄ ዎደ ሄ ዋይያፐ ጉይያን፥

አዋይ ማና፤

አገናይ ፖእያዋ አጋና፤✝

25 ጾልንታቱ ሳሉዋፐ ኩንዳና።

ቃይ ሳሉዋን ደእያ ዎልቃቱካ ቃጸታና።✝

26 ሄ ዎደ ታን፥ አሳ ናአይ፥ ዎልቃማ ዎልቃናነ ቦንቹዋና ሻርያ ግዶና ዪሽን፥ ኡንቱንቱ በአና።✝ 27 ሄ ዎደ ታን ኪታንቻቱዋ ሳኣ ኦይዱ ባጋ ኪታና፤ ሳኣ ጋጻፐ ሳሉዋ ጋጻ ጋካናዉ፥ ጾሳይ ዶሬዳ አሳ ሺሻና።

28 ሌምሱዋ ባላሳቶ ግያ ምትፐ ታማርተ፤ ባላሳታ አጭያ ዎደነ እዝ ሀይይ ሀይትያ ዎደ፥ ቦኒ ማቴዳዋ ህንተ ኤሪታ። 29 ሀዋዳንካ ህንተ ሄ ኡባባይ ሀንያዋ በእያ ዎደ፥ እ* ማታቲደ ፐንግያ ሺቄዳዋ* ኤርተ። 30 ታን ህንተንቶ ቱሙዋ ኦዳይ፤ ሀ ኡባባይ ሀናና ጋካናዉ፥ ሀ ዎድያ የለታይ ሀይቂድገና። 31 ሳሉነ ሳአይ አና፤ ሽን ታ ቃላይ ኡባካ አና።

32 ሽን ሄ ጋላሳነ ሄ ሳትያ አዉዋ ጻላላፐ አትን፥ ሀራይ አቶ ሳሉዋን ደእያ ኪታንቻቱዋ ግድና፥ ዎይ ታና ናኣ ግድናካ ኦንነ ኤርያባይ ባዋ። 33 ሄ ዎዲ አዉደ ግዳነንቶ፥ ህንተ ኤረና ድራዉ፥ ናገትተ፤ ምንተ፤ ጾሳ ዎስተ። 34 ታ ዩሳይ ባረ ጎልያ አጊደ፥ ኦግያ ብያ ብታንያ ማላ፤ ብታኒ ባረ ቆማቶ ሁጲያን ሁጲያን ኦሱዋ እሚደ፥ ኡንቱንታ ባረ ኦሶ ካፖ ኦዳ፤ ቃይ ካርያ ናግያዌካ ምንሲደ ናጋና ማላ አዛዜዳ።

35 ሄዋ ድራዉ፥ ምንተ፤ አያዉ ጎፐ፥ ጎልያዉ ኦማርሳ ግድና፥ ዎይ ቃማ ብላሄ ግድና፥ ዎይ ኩቱ ዋስያ ዎደ ግድና፥ ዎይ ጉራ ዎንቱማን ግድና አዉደ ያነንቶ፥ ህንተ ኤርክታ። 36 ህንተንቱ አኬከናን እ ዮፐ፥ ህንተንታ ገምእሼዳዋንታ ደመና ማላ ምንተ። 37 ታን ህንተንቶ ኦድያዋ አሳ ኡባዉ ኦዳይ፤ ምንተ።