ዎይንያ ቱራ ቶክያ ኦሳንቻቱዋ ሌምሱዋ
(ማቶሳ 21:33-46፤ ሉቃሳ 20:9-19)
1 የሱስ ኡንቱንቶ ኦዱዋ ሌምሱዋን ያጊደ ዶሜዳ፤ "እት ብታኒ ዎይንያ ግያ ቱራ ቶኪደ፥ ድርሳ ዩሽ አደ ድሬዳ፤ ቃይ ሄ ዎይንያ ጉምእያ ኦላካ ቦኬዳ፤ ሄዋ ናግያ አሳዉ ናግያሳ ኬጼዳ፤ ሄዋፐ ጉይያን፥ ኮ ኦያ አሳዉ እሚደ፥ ሀራ ጋደ ቤዳ።12:1 ኢሳ. 5:1-2 2 ዎይንያ አይፍያ ማጽያ ዎዲ ጋክና፥ ባረና ጋክያዋ አኪደ ያና ማላ፥ እት ቆማ ባረ ኮዋቱዋኮ ኪቴዳ። 3 ኮ ኦያዋንቱ አ ቆማ ኦይቂ ዋደ፥ ኩሸ መላ የዴድኖ። 4 ላኤንዋ ሀራ ቆማ ኡንቱንቱኮ ኪቴዳ፤ ኡንቱንቱ ሄ ቆማ ሁጲያ ጳልቂደ ፖክስ የዴድኖ። 5 ዎይንያ ቱራ ጎዳይ ቃይካ ሀራ ቆማ ኪቴዳ፤ ሄ ቆማ ዎድኖ፤ ቃይ ሀራ ጮራቱዋካ ሄዋዳን ኦድኖ፤ እቱዋ እቱዋ ዋደ፥ ሀራቱዋ ዎድኖ።
6 "ዎይንያ ቱራ ጎዳዉ ኪታናዉ ኡባፐ ዉርሰን እ ዳሪ ሲቅያ አ ናኣ ጻላላይ አቴዳ፤ እ፥ ‘ኡንቱንቱ ታ ናኣ ቦንቼናን አግክኖ’ ጊደ፥ ባረ ናኣ ኡንቱንቱኮ ኪቴዳ።
7 "ሽን ኮ ኦያዋንቱ ባረንቱ ግዶን፥ ‘ላታናዌ ሀዋ፤ ቢደ አ ዎይተ፤ አዉ ደእያዌ ኑዋ ግዳና!’ ያጌድኖ። 8 ናኣ ኦይቂ ዎደ፥ አ አሃ ዎይንያ ቱራ ግዶፐ ጋጻ ከስ ኦሌድኖ።
9 "ስም ዎይንያ ቱራ ጎዳይ ዎታኔ? ዪደ ሄ ኮዋቱዋ ዎ ዉርሲደ፥ ዎይንያ ቱራ ኮ ኦያ ሀራ አሳዉ እማናዋ።
10,11 " ‘ግምቢያዋንቱ ካ እጼዳ ሹቻይ
ጎዳ ጻጱዋ ምንስያ፥
ኡባፐ አያ ሹቻ ግዴዳ።
ሀዌ ጎዳይ ኦዳዋ፤
ቃይ ኑናካ ማላልስያዋ’
ያግያዋ ጾሳ ማጻፋፐ ናባብ በይክቴ?"
ያጌዳ።12:10-11 ማዝ. 118:22-23
12 ቄሳቱዋ ካፓቱ፥ ህግያ ታማርስያዋንቱነ ጭማቱ የሱስ ሄ ሌምሱዋ ባረንቱን ሌምሴዳዋ ኤሬዳ ድራዉ፥ አ ኦይቃናዉ ኮዬድኖ፤ ሽን አሳዉ ያዪደ፥ ባሽ ቤድኖ።
ጊራ ጊራኔ አጋኔ ግያ ኦሻ
(ማቶሳ 22:15-22፤ ሉቃሳ 20:20-26)
13 ቃይ አ ሃሳያፐ ባላ ደማና ማላ፥ ፓርሳዋቱዋፐነ ሄሮድሳ ባጋቱዋፐ12:13 ሄሮድሳ ባጋቱዋ፦ ሀዋንታ ጉሳይ ሄ ዎደ ደእያ ካዉተ ፖሎትካ ባጋና ካሰ ዎጋ ሄሮድሳነ አ ናኣ ሄሮድ አንትጳሳ ባጋቱዋነ ኡንቱንታ ካልያ አሳቱዋ። አማሬዳዋንቱ አኮ ኪትና ዪደ፥ 14 "ታማርስያዎ፥ ኔን ቱሙዋ ሃሳይያዋነ አሳፐ አሳ ሻከናዋ ኑን ኤሬቶ፤ አያዉ ጎፐ፥ ኔን አሳ ዱማያካ፤ ቃይ ጾሳ ኦግያ ቱማተን ታማርሳ። ኑን ሮማ ካትያ ቄሳረዉ ጊራ ጊርያዌ ዎጌየ ዎጋ ግደኔ? ጊራ ጊራኔዬ ድጋኔ?" ያጌድኖ።
15 ሽን ኡንቱንቱ ሎአ ማላትያ ኢታ አሳ ግዴዳዋ የሱስ ኤሪደ፥ "ታና አያዉ ፓጪቴ? እት ሳንትምያ ሃ ታኮ አህተ፤ ታን አነ በአና" ያጌዳ። 16 ኡንቱንቱ አዉ አሄድኖ፤ "ሀ ማላይነ ሱንይ ኦዌ?" ያጊደ ኡንቱንታ ኦቼዳ።
ኡንቱንቱ፥ "ቄሳረዋ" ያጌድኖ።
17 የሱስ ዛሪደ ኡንቱንታ፥ "ያቶፐ፥ ቄሳረዋ ቄሳረዉ፥ ጾሳዋ ጾሳዉ እምተ" ያግና ኡንቱንቱ አባ ማላለቴድኖ።
ሀይቁዋፐ ደንዱዋ ኦሻ
(ማቶሳ 22:23-33፤ ሉቃሳ 20:27-40)
18 ሀይቄዳ አሳይ ደንደና ግያ ሳዱቃዋናቱዋፐ እት እት አሳቱ የሱሳኮ ዪደ፥ ሀዋዳን ያጊደ፥ አ ኦቼድኖ፤ 19 "ታማርስያዎ፥ ሙሴ ኑዉ ህግያ ጻፊደ፥ ‘ማቻቶ አኬዳ አሳይ ናኣ የለናን ሀይቆፐ፥ ሄ ሀይቄዳዋ እሻይ አ ማቻቶ ላቲደ፥ ባረ እሻዉ ናኣ የላናዉ በሴ’ ያግያዋ ጻፌዳ።12:19 ዛረ. 25:5 20 እት ዎደ ላፑ እሻቱ ደእያዋንቱፐ ባይራይ ማቻቶ አኪደ፥ ናኣ የለናን ሀይቄዳ። 21 ላኤንያ እሻይ እዞ አኬዳ፤ እካ ናኣ የለናን ሀይቄዳ፤ ሄዘንያዌካ ሄዋዳን ሀኔዳ። 22 ላፑናቱካ እዞ አኪደ፥ ናኣ የለናን ሀይቄድኖ፤ ኡባፐ ጉይያን፥ ቃይ ሄ ምሽራታ ሀይቃዱ። 23 ያትና፥ ሀይቄዳ አሳይ ሀይቁዋፐ ደንድያ ዎደ፥ እዛ ኡንቱንቱፐ ሀቃዎ ማቼ ግዳኔ? አያዉ ጎፐ፥ ላፑናቱካ እዞ አኬድኖ"።
24 የሱስ ዛሪደ ኡንቱንታ፥ "ህንተንቱ ባለትያዌ፥ ጾሳ ማጻፋቱዋነ አ ዎልቃ ኤረና ድራሳ! 25 አያዉ ጎፐ፥ ሀይቄዳ አሳይ ሀይቁዋፐ ደንድያ ዎደ፥ ሳሉዋን ደእያ ኪታንቻቱዋ ማላ ግዳናፐ አትን፥ አቱማ አሳይነ አከና፤ ማጫ አሳይነ ገለና። 26 ሽን ሀይቄዳዋንቱ ደንዱዋባ ግዶፐ፥ ሙሴ ማጻፋን ጻፈቴዳ ጻራጋይ ምያ ቡራባ ኦድያ ሳኣን፥ ጾሳይ ሙሳ፥ ‘ታን አብራሃመ ጾሳ፥ ይሳቃ ጾሳ፥ ያቆባ ጾሳ’ ግድያዋ ኡባካ ናባብ በይክቴ?12:26 ከሳ 3:6 27 እ ፓጻ ደእያዋንቱ ጾሳ ግድያዋፐ አትን፥ ሀይቄዳዋንቱ ጾሳ ግደና፤ ህንተ ዳርስ ባሌድታ" ያጌዳ።
ኡባፐ አያ አዛዙዋ
(ማቶሳ 22:34-40፤ ሉቃሳ 10:25-28)
28 ህግያ ታማርስያዋንቱፐ እቱ ኡንቱንቱ ፓሉመትያዋ ሺቂደ ስሴዳ፤ ቃይ የሱስ ኡንቱንቶ ሎኦ ዛሬዳዋ ስሲደ፥ "አዛዙዋ ኡባፐ አያ አዛዙ ሀቃዌ?" ያጊደ የሱሳ ኦቼዳ።
29 የሱስ ዛሪደ፥ አ "አዛዙዋ ኡባፐ አያ አዛዙዋ፥ ‘እስራኤልያ አሳይ ስስተ፥ ጎዳይ ኑ ጾሳይ እት ጎዳ።12:29 ዛረ. 6:4-5 30 ህንተንቱ ጎዳ ህንተ ጾሳ ህንተ ኩመን ዎዛናፐ፥ ህንተ ኩመን ሸምፑዋፐ፥ ህንተ ኩመን ቆፋፐ፥ ህንተ ኩመን ዎልቃፐ ሲቅተ’ ያጌ። 31 ቃይ አዛዙዋ ኡባፐ አያ ላኤን አዛዙ ሀዋ፤ ‘ኔን ነ ሾሩዋ ነ ሁጲያዳን ሲቃ’ ግያዋ፤ ሀዋንቱፐ አያ ሀራ አዛዙ ባዋ" ያጌዳ።12:31 ዎጋ 19:18
32 ህግያ ታማርስያዌ የሱሳ ያጌዳ፤ "ታማርስያዎ፥ ቱሙዋ ጋዳ፤ ኔን ‘ጾሳይ እት ጾሳ ጻላላ። አፐ አትን፥ ሀራይ ባዋ’ ጌዳዌ ቱማ።12:32 ዛረ. 4:35 33 ጾሳ ኩመን ዎዛናፐ፥ ኩመን ቆፋፐነ ኩመን ዎልቃፐ ዶስያዌነ ቃይ ባረ ሾሩዋካ ባረ ሁጲያዳን ሲቅያዌ፥ ጉድያ ያርሹዋፐነ ሀራ ያርሹዋ ኡባፐ አ" ያጌዳ።12:33 ሆሰ 6:6
34 የሱስ ህግያ ታማርስያዋ ዛሩ አ ኤራንቻ አሳ ዛሩዋ ግዴዳዋ በኢደ፥ "ኔን ጾሳ ካዉተፐ ሃካበይካ" ያጌዳ፤ ሄዋፐ ጉይያን፥ የሱሳ ሀራባ ኦቻናዉ ኦንነ ጻልቤና።
"የሱስ ኦ ናኤ" ያግያ ኦሻ
(ማቶሳ 22:41-46፤ ሉቃሳ 20:41-46)
35 የሱስ ጌሻ ጎልያን ታማርሲደ፥ "ህግያ ታማርስያዋንቱ ክርስቶሳ ዎት ዳዊተ ናኣ ጊኖ? 36 ዳዊተ ባረና ጌሻ አያናይ ሃሳይስና፥
" ‘ጎዳይ ታ ጎዳ፥ "ታን ነ ሞርከቱዋ፥
ኔን የ ኤቂያባ ኦና ጋካናዉ፥
ሀዋን ታፐ ኡሸቻ ባጋና፥ ቦንቼታደ ኡታ" ጌዳ’
ያጌዳ።12:36 ማዝ. 110:1 37 ዳዊተ ባረ ሁጰዉ ክርስቶሳ፥ ‘ጎዳ’ ጊደ ጼሶፐ፥ ያትና፥ ክርስቶስ ዋኒደ፥ ዳዊተ ናኣ ግዲ?" ያጌዳ።
ጮራ አሳይ የሱስ ግያዋ ናሸቻን ስሴዳ።
የሱስ፥ "ሙሴ ህግያ ታማርስያዋንቱፐ ናገትተ" ያጌዳ
(ማቶሳ 23:1-36፤ ሉቃሳ 20:45-47)
38 የሱስ ታማርሲደ፥ "ህግያ ታማርስያዋንቱፐ ናገትተ፤ ኡንቱንቱ አዱሳ ማዩዋ ማዪደ ዩይያዋነ ገያ ሄራንካ አሳይ ኡንቱንታ ቦንቺደ ሳሮትያዋ ዶሲኖ። 39 ኡንቱንቱ አይሁዳ ዎሳ ጎለቱዋን ዳሪ ሎእያ ኦይድያ ዶሲኖ፤ ቃይ አሳይ ባረንታ እማተን ሞክያሳንካ ቦንቾ ሳኣ ዶሲኖ። 40 ኡንቱንቱ አምኤቱ ጎልያ ቦንቂደ፥ ባረንቶ ሎአ ማላታናዉ ጾሳ ዎሳ አዱሲኖ፤ ኡንቱንቱ ኡባፐ አያ ሙራ አካናዋንታ" ያጌዳ።
አምአት ምጹዋታ
(ሉቃሳ 21:1-4)
41 የሱስ ጌሻ ጎልያን እሞታ የግያ ሳጽንያ ማታን ኡቲደ፥ አሳይ ባረ ሚሻ ሄ ሳጽንያን የግያዋ በኤዳ፤ ጮራ ዱረ አሳይ ዳሮ ሚሻ ሄ ሳጽንያን የጌድኖ። 42 እት ህዬሳ አምአታ ያደ፥ እት ሳንትምያን ላመትያ ላኡ ሰምበራቱዋ ሄ ሳጽንያን የጋዱ። 43 የሱስ ባረና ካልያዋንታ ጼሲደ፥ "ታን ህንተንቶ ቱሙዋ ጋይ፤ እሞታ ሳጽንያን የጌዳ አሳ ኡባፐ ሀ ህዬሳ አምአታ ዳርሳደ የጋዱ። 44 አያዉ ጎፐ፥ ሀራቱ ኡባይ ባረንቶ ፓላሄዳ ሚሻፐ የጌድኖ፤ ሽን እዛ ባረ ፓጫፐ፥ ባረዉ ደእያ ደኡዋ ሙለካ እማ አጋዱ" ያጌዳ።