ማርቆሳ ምሽራቹዋ 15

የሱሳ ጵላጾሳኮ አፌድኖ

1 ዎንታ ጉራን ኤለካ ቄሳቱዋ ካፓቱ ጭማቱዋናኔ ሙሴ ህግያ ታማርስያዋንቱና ሄዋን ሺቄዳ አይሁዳ ሻንጋቱዋ ኡባና ማቀቲደ፥ የሱሳ ቃች አፊደ፥ ጵላጾሳዉ አደ እሜድኖ።

2 ጵላጾስ አ፥ "ኔን አይሁዳቱዋ ካቴ?" ያጊደ ኦቼዳ።

የሱስ ዛሪደ አ፥ "ነ ግያዋዳና" ያጌዳ።

3 ቄሳቱዋ ካፓቱ የሱሳ ዳሮባን ሞቴድኖ። 4 ጵላጾስ ሽረቲደ የሱሳ፥ "ነዉ ዛርያባይ ባዌ? ኡንቱንቱ ነ ቦላ ዎይሳ ሞቱዋ አህንቶ በእኪ?" ያጊደ ኦቼዳ።

5 ሽን የሱስ ሀራባ ዛረናን እጽና፥ ጵላጾስ ማላለቴዳ።

የሱሳ ቦላ ሀይቁዋ ፕርዴድኖ

6 ጵላጾሳዉ ፓስጋ ባላ ቦንችያ ጋላሳን አሳይ ኮይያ እት ኡራ ቃሹዋፐ ብልያ ዎጋይ ደኤ። 7 ሄ ዎደ እት ባርባና ግያ ብታኒ ዋላሳ ከሲደ ሸምፑዋ ዎዳ አሳቱዋና እትፐ ቃሾ ጎልያን ደኤ። 8 ሺቄዳ ጮራ አሳይ ጵላጾስ ካሰ ኤረቶዋዳንካ ባረንቶ ማሮታ ኦና ማላ፥ አ ኦቼድኖ። 9 ጵላጾስ አሳ ዛሪደ፥ "ታን ህንተንቶ አይሁዳቱዋ ካትያ ብልያዋ ኮዪቴ?" ያጊደ ኦቼዳ። 10 አያዉ ጎፐ፥ ቄሳቱዋ ካፓቱ የሱሳ ቃናቲደ አ እሜዳዋ ጵላጾስ ኤሬዳ።

11 ሽን ቄሳቱዋ ካፓቱ የሱሳ ኮታ ባርባና ብላናዳን፥ ሄ ሺቄዳ አሳይ ጵላጾሳ ዎሳና ማላ፥ አሳ ማቄድኖ። 12 ጵላጾስ ላኤንዋ ዛሪደ፥ "ያትና፥ ሀ አይሁዳ ካትያ ህንተንቱ ግያዋ ዎቶ?" ያጌዳ።

13 አሳይ ጵላጾሳዉ ዛር ዛር ባረንቱ ኮሻ ቁ ኦደ፥ "አ ካቃ" ያጌድኖ።

14 ጵላጾስ አሳ፥ "አያዉ? እ አይ ኢታባ ኦዴ?" ያጌዳ።

ሽን አሳይ ካሰዋፐካ ባረ ኮሻ ቁ ኦደ፥ "አ ካቃ" ያጌድኖ።

15 ጵላጾስ አሳ ናሸቻናዉ ኮዪደ፥ ባርባና አሳዉ ብሌዳ፤ ያቲደ ልሱዋን የሱሳ ዎታዳራቱዋን ሾጭሲደ፥ ካቃና ማላ ኡንቱንቶ አ እሜዳ።

ዎታዳራቱ የሱሳ ቅሊጬድኖ

16 ሄዋፐ ጉይያን፥ ዎታዳራቱ የሱሳ ጋድያ ሞድያዋ ግቢያ አፊደ፥ ሀራ ዎታዳራቱዋ ኡባ እትፐ ጼሴድኖ። 17 ቃይ ዞኦ ማዩዋ አ ማይዜድኖ፤ አጉን ካላቻ ጊግሲደ፥ አ ሁጲያን ዎድኖ። 18 ሄዋፐ ጉይያን አ፥ "አይሁዳቱዋ ካተዉ፥ ሳሮታይ ነዉ ግዶ" ያግ ሳሮቲደ፥ አ ቅሊጩዋ ዶሜድኖ። 19 የሱሳ ሁጲያ ማቃ ጻምኣን ሾጬድኖ፤ ቃይ አ ቦላን ጩቼድኖ፤ ጉልባቲደ አዉ ጎይኔድኖ። 20 አ ቦላ ቅሊጬዳዋፐ ጉይያን፥ ዞኦ ማዩዋ አፐ ቃር አኪደ፥ አ ማዩዋ አ ማይዜድኖ፤ ያቲደ ማስቃልያ ቦላን ምስማርያን ሺደ፥ አ ካቃናዉ አፌድኖ።

የሱሳ ካቄድኖ

21 ኡንቱንቱ ቢደ፥ እስክንድራነ ሩፎሳ የሌዳ አዉዋ፥ እት ስሞና ግያ ቀሬና ጋድያ አሳይ፥ ጋጻፐ ካታማ ይያዋና ጋከቲደ፥ የሱሳ ማስቃልያ ዎልቃን ቶሴድኖ።✝15:21 ሮመ 16:13 22 ያቲደ ጎልጎታ ጌተትያሳ የሱሳ አፌድኖ። "ጎልጎታ" ግያዌ "ሁጲያ ጎስያሳ"*15:22 "ሁጲያ ጎስያሳ" ጌተትያዌ፥ አሳ ሁጲያ ማላትያ ሹቻይ ሄዋን ደእያ ድራዉ፥ ሁጲያ ጎስያሳ ጌተቴዳ። ግያዋ። 23 ካዋራ ግያ ሊ ዋላከቴዳ ዎይንያ ኤሳ የሱሳዉ ኡሻናዉ እሜድኖ፤ ሽን እ ኡሸናን እጼዳ። 24 ኡንቱንቱ አ ካቄድኖ፤ ቃይ ኦና ኦና ጋካነንቶ ኤራናዉ አ ማዩዋ ሻኪደ፥ ሳማ የጌድኖ።✝15:24 ማዝ. 22:18

25 ኡንቱንቱ አ ካቂያ ዎደ፥ ዎንታፐ ሄዙ ሳተ። 26 "አይሁዳቱዋ ካትያ" ያግ አ ሞትያ ጻፉ ጻፌት ኡቴዳ። 27 የሱሳና ላኡ ካይሳቱዋ እቱዋ አፐ ኡሸቻ ባጋና፥ ቃይ እቱዋ አፐ ሀድርሳ ባጋና ማስቃልያ ቦላ ምስማርያን ሺደ ካቄድኖ። 28 ጾሳ ማጻፋይ፥ "ኢታባ ኦዳ አሳቱዋና እ ፓይደቴዳ" ያግያዌ ፖለቴዳ።✝15:28 ኢሳ. 53:12

29 ኦግያና አያ አሳይ የሱሳ ካደ፥ ባረንቱ ሁጲያ ቃደ ቦሬድኖ፤ "ስም፥ ጌሻ ጎልያ ኮላደ ሄዙ ጋላሳ ግዶን ኬጽያዎ፥✝15:29 ማዝ. 22:7፤ 109:25፤ ማር. 14:58፤ ዮሃ. 2:19 30 አነ ማስቃልያ ቦላፐ ዎደ፥ ነ ሁጲያ አሻ" ያጌድኖ።

31 ሀዋዳንካ ቄሳቱዋ ካፓቱ ሙሴ ህግያ ታማርስያዋንቱና እትፐ የሱሳ ቦላ፥ "ሀራ አሳቱዋ አሼዳ፤ ሽን ባረና አሻናዉ ዳንዳየና፤ 32 ኑን በኢደ አማናና ማላ፥ ክርስቶስ እስራኤልያ ካቲ፥ አነ ማስቃልያ ቦላፐ ሀእ ዎ" ጊደ ቅሊጬድኖ። ቃይ ሀራይ አቶ፥ አናና ማስቃልያ ቦላ ምስማርያን ሸቲደ ካቀቴዳዋንቱካ አ ቦላ ቅሊጬድኖ።

የሱሳ ሀይቁዋባ

33 ኡሱፑን ሳትያፐ ዶሚደ፥ ኡዱፑ ሳትያ ጋካናዉ፥ ጋድያ ኡባይ ሜዳ። 34 ኡዱፑ ሳትያን የሱስ ባረ ቃላ ቁ ኦደ፥ "ኤሎሄ፥ ኤሎሄ፥ ላማ ሳባቅታኒ?"*15:34 ኤሎሄ፥ ኤሎሄ፥ ላማ ሳባቅታኒ፦ ሀ ቃላቱ የሱስ ሀ አላምያን አሹዋ ማዪደ ስመረትያ ዎደ ሃሳየትያ አራማይከ ጌተትያ ቃላን ሃሳየቶዋ። ያጌዳ። ሄዋ ግያዌ፥ "ታ ጾሳዉ፥ ታ ጾሳዉ፥ ታና አያዉ አጋዲ?" ግያዋ።✝15:34 ማዝ. 22:1

35 ሄዋን ኤቄዳ አሳፐ እቱ እቱ ሄዋ ስሲደ፥ "በእተ፤ ኤላሳ ጼሴ" ያጌዳ። 36 ሄ አሳፐ እቱ ዎጽ ዪደ፥ ዛንዛ ማላትያዋን ጫላ ዎይንያ ኤሳ ኩንዳ፤ ሄዋ ማቃ ጋትማ ጼራን ዎደ፥ "ደእሽተ አነ፤ ኤላስ ማስቃልያፐ አ ዎናዉ ያነንቶነ አነ በኦይተ" ያጊደ የሱሳ ዶናኮ ኡሻናዉ ሺሼዳ።✝15:36 ማዝ. 69:21

37 የሱስ ቃላ ቁ ኦ ዋሲደ፥ ሀይቂ አጌዳ።

38 ጌሻ ጎልያን ቃሸቴዳ ጋርዱ ቆሞፐ ዱገ ጋካናዉ፥ ላኡ ከሲደ ፖሸት ዎዳ።✝15:38 ከሳ 26:31-36 39 ማስቃልያፐ ስን ባጋና ሄዋን ኤቄዳ እት ጼቱዋ ካፑ፥ ሄዋ ኬና የሱስ ዋሲደ ሀይቄዳዋ በኤዳ ዎደ፥ "ሀ ብታኒ ቱሙ ጾሳ ናኣ" ያጌዳ።

40 ሄዋን ሃኩዋን ኤቂደ ጼልያ አማሬዳ ማጫዋንቱ ደኢኖ፤ ኡንቱንቱ ግዶን ማግዳላ ግያ ካታማፐ ዬዳ ማይራማ፥ ቴፋ ያቆባነ ዮሳ ዳያ ማይራማነ ሳሎማ ደኢኖ። 41 ሄ ማጫ አሳቱ የሱስ ጋሊላን ደእያ ዎደ፥ አ ካሌዳዋንታነ አ ማዴዳዋንታ፤ ቃይ የሱሳና እትፐ የሩሳላመ ቤዳ ሀራ ጮራ ማጫ አሳቱ ሄዋን ደኢኖ።

የሱሳ ሞጉዋባ

42,43 ሳአይ ኦማርሴዳ ዎደ፥ ሄዋን ሺቄዳ አሳን ቦንቼቴዳ እት ዮሴፎ ግያ ብታኒ፥ ጾሳ ካዉተይ ያናዋ ናግ ኡቴዳዌ፥ አርማትያሳ ግያ ካታማ አሳይ ዬዳ፤ ሄ ጋላሳይ ዎንተ ሳምባታዉ ጊገትያ ጋላሳ ግዴዳ ድራዉ፥ ዮሴፎ ጻሊደ ጵላጾሳኮ ቢደ፥ የሱሳ አሃ አካናዉ ዎሴዳ። 44 ጵላጾስ፥ የሱስ ኤለካ ሀይቂ ድጌዳዋ ስሴዳ ዎደ ማላለቴዳ፤ ጼቱዋ ካፑዋ ጼሲደ፥ "እ ሀይቆደፐ ጋምኤዴ?" ያጊደ ኦቼዳ። 45 ጵላጾስ የሱስ ሀይቄዳዋ ጼቱዋ ካፑዋፐ ስሲደ፥ አ አሃ ዮሴፎ አካናዳን ኦዳ። 46 ዮሴፎ ሞጉዋ ማዩዋ ሻሜዳ፤ የሱሳ አሃ ማስቃልያፐ ዎ ማዩዋን ጻጺደ፥ ሹቻ ዎጬዳ አሳ ሞግያ ጎንጎሉዋ ግዶን አ አሃ ዎዳ፤ ቃይ ሄ ጎንጎሉዋ ዶናን ዎልቃማ ሹቻ ጎንዶርሲደ ዎዳ። 47 ማግዳላ ካታማፐ ዬዳ ማይራማነ ዮሳ ዳያ ማይራማ የሱሳ አሃ ኡንቱንቱ ሀቃን ዎንቶ በኢኖ።