የሱስ ኢታ አያናይ ኦይቄዳ ብታንያ ፓዳ
(ማቶሳ 8:28-34፤ ሉቃሳ 8:26-39)
1 የሱስነ አ ካልያዋንቱ አባፐ ሄፍንዉ ፕኒደ፥ ገርገሰኖና ጌተትያ ጋድያ ጋኬድኖ። 2 አሳ ሞግያ ዱፉ ደኢያሳፐ ኢታ አያናይ ደእያ እት ብታኒ ከሲደ፥ የሱስ ዎንግርያፐ ከሴዳ ዎደ፥ የሱሳና ጋከቴዳ። 3 ብታኒ ሄ ዱፉ ደእያ ሳን አቅ ፔሺደ፥ ያን ደኤ፤ አ ኦንነ ሀራይ አቶ፥ ሳንላታን ቃቻናዉካ ዳንዳይቤና። 4 አያዉ ጎፐ፥ እ ዳሮ ዎደ ኡቁናንነ ሳንላታን ቃሸቲደ ደኤ፤ ሽን ሳንላታ ዱሰረዳ፤ ኡቁናካ መንሬዳ፤ አ ጾናናዉ ዳንዳዬዳዌ ኦንነ ባዋ። 5 እ ኡባ ዎደ ጋላስነ ቃማ፥ ሄ ዱፉ ደኢያሳንነ ደርያ ቦላ ዋሴ፤ ባረ ቦላካ ሹቻን ጋሬ።
6 የሱሳ ሃኩዋን በኤዳ ዎደ፥ አኮ ዎጽ ዪደ አዉ ጎይኔዳ። 7 ሄ ብታኒ ባረ ኮሻ ቁ ኦደ፥ "ኡባፐ ቦላ ጾሳ ናአዉ፥ የሱሳ፥ ኔናነ ታና አዬ ጋ? ታና ሙረና ማላ፥ ታን ኔና ጾሳ ሱንን ዎሳይ" ያጌዳ። 8 እ ሄዋ አያዉ ጌዴ ጎፐ፥ የሱስ አ፥ "ላ ሀ ኢታ አያናዉ፥ ሀ ብታንያፐ ከሳ" ያጌዳዋሳ።
9 የሱስ አ፥ "ነ ሱንይ ኦኔ?" ያጊደ ኦቼዳ።
እ፥ "ኑን ጮራ ግድያ ድራዉ፥ ታ ሱንይ ሌግዮና" ያጌዳ። 10 ኢታ አያናቱዋ ሄ ጋድያፐ ከስ የደና ማላ፥ የሱሳ ምንሲደ ዎሴዳ።
11 ሄ ደርያ ቦላን ጮራ ጉዱን ዉዲ ሄመቴ፤ 12 ኢታ አያናቱ የሱሳ፥ "ኑና ህን ጉዱን ዉድያኮ የዳርኪ፤ ኡንቱንቱን ቢደ ገላና" ያጊደ ዎስና፥ 13 የሱስ፥ "ቢተ" ያጌዳ። ኢታ አያናቱ ብታንያፐ ከሲደ፥ ጉዱንቱዋን ገሌድኖ፤ ላኡ ሻአ ግድያ ጉዱን ዉዲ ካካ ሁጲያና ካጆቲደ፥ አባን ገሊደ፥ ምተት አጌዳ።
14 ጉዱን ዉድያ ሄምያዋንቱ ባቃቲደ፥ ሀኔዳዋ ካታማንነ ካታማፐ ጋጻ ጋድያን ኦዴድኖ፤ ሄዋ በአናዉ አሳይ ዬዳ። 15 አሳይ የሱሳኮ ዪደ፥ ጮራ ኢታ አያናቱ በን ኦይቄዳ ብታኒ ባረ ዎዛናይ ስምና፥ ማዩዋ ማዪደ፥ ሄዋን ኡቴዳዋ በኢደ፥ ኡባይ ያዬዳ። 16 ሄዋ በኤዳ አሳቱ ኢታ አያናቱ ኦይቄዳ ብታኒ ሀኔዳዋነ ቃይ ጉዱን ዉድያባ ሄ አሳዉ ኦዴድኖ። 17 ሄዋ ድራዉ፥ አሳይ ባረንቱ ጋድያፐ የሱስ ባና ማላ፥ ዎሳ ዶሜዳ።
18 የሱስ ዎንግርያን ገልሽን፥ ኢታ አያናቱ ኦይቄዳ ብታኒ የሱሳና ደአና ማላ፥ የሱሳ ዎሴዳ። 19 ሽን የሱስ እጺደ አ፥ "ነ ሶይ ስማደ፥ ጎዳይ ነዉ አይ ማላ ዎልቃማባ ኦደንቶነ ቃይ እ ነዉ አይ ማላ ኬከንቶ ነ ሶይ አሳዉ ኦዳ" ያጌዳ። 20 ብታኒ ቢደ፥ ታሙ ካታማ5:20 ታሙ ካታማ፦ ሀዋንቱ እት ጭታ ግዴዳ ካታማቱ ሳማርያፐነ ጋሊላ ጋድያ አዋይ ዶልያ ባጋና ደእያዋንታ ግዲደ፥ ሄዋንቱን ደእያ አሳቱዋ ኤሻይካ ግሪከ አሳቱዋ ደኡዋ ኦግያ ካልያዋ በሴ። ግያ ሳን ዩዪደ፥ የሱስ ባረዉ አይ ማላ ዎልቃማባ ኦደንቶ፥ ኦዱዋ ዶሜዳ፤ እ ኦዴዳዋ ስሴዳ አሳይ ኡባይ ማላለቴዳ።
ያእሮሳ ናቶነ የሱሳ ማዩዋ ቦቼዳ ምሽራቶ
(ማቶሳ 9:18-26፤ ሉቃሳ 8:40-56)
21 የሱስ ስሚደ፥ ዎንግርያን ገሊደ፥ አባ ፕኔዳዋፐ ጉይያን፥ ጮራ አሳይ አባ ማታን አኮ ዩይ አደ ሺቄድኖ። 22 ያእሮሳ ግያዌ፥ አይሁዳ ዎሳ ጎልያ ካፓቱዋፐ እቱ፥ የሱሳ በኤዳ ዎደ አኮ ይ አ ገድያን ኩንዲደ፥ 23 "ታ ናታ ሀርጋደ ሀይቃናዉ፤ እዛ ፓጺደ ሎኦ ደአና ማላ፥ ያደ ነ ኩሽያ እዝ ቦላ ዎርኪ" ያጊደ የሱሳ ምንሲደ ዎሴዳ።
24 የሱስ ያእሮሳና ቤዳ፤ እ ቢሽን ጮራ አሳይ አ ካሊደ መቶድኖ።
25 ታማነ ላኡ ላይ ኡባ እዝ ቦላፐ ሱይ ጎግያ እት ምሽራታ ደአዉ። 26 ጮራ አክማቱ እዞ አክምሽንካ፥ እዛ ፓጻ ካኤታዱ፤ ባረ ሚሻ ኡባ ዉርስናካ እዝዉ ሃ ኢቴዳዋፐ አትን፥ አይነ እዞ ማድቤና። 27 ሄ ምሽራታ የሱሳባ ስሳደ፥ አሳ ግዶና የሱሳፐ ጉየና ያደ፥ አ ማዩዋ ቦቻዱ። 28 አያዉ ጎፐ እዛ፥ "ታን ሀራይ አቶ፥ አ ማዩዋ ቦቾፐካ ፓጻና" ያጋደ ቆፓዱ።
29 ኢፐ ጎግያ ሱይ ኤለካ ኤቂ አጌዳ፤ እዛ ባረ ዋይያፐ ፓጼዳዋ ባረ ቦላን ኤራ አጋዱ። 30 የሱስ ባረፐ ዎልቃይ ከሴዳዋ ባረ ሁጰዉ ኤሪደ፥ ኤለካ ጮራ አሳ ግዶን ጉየ ስሚደ፥ "ታ ማዩዋ ቦቼዳዌ ኦኔ?" ያጌዳ።
31 የሱሳ ካልያዋንቱ አ፥ "አሳይ ኔና ሱግያ ዎደ በኣደ፥ ‘ታና ኦኔ ቦቼዳዌ?’ ያጋይ?" ጌድኖ።
32 የሱስ ሄዋ ኦኔ ኦደንቶነ በአናዉ ዩሽ አደ ጼሌዳ፤ 33 ሽን ምሽራታ ባረዉ ሀኔዳዋ ኤራደ፥ ያሻ ኮኮራደ ያደ የሱሳ ስንን ጉፋናዱ፤ ቃይ ቱማተን ሀኔዳዋ ኡባ አዉ ኦዳዱ። 34 የሱስ እዞ፥ "ታ ናቴ፥ ኔና ነ አማኑ ፓዳ፤ ሳሩዋን ባ፤ ነ ዋይያፐነ ፓጻ" ያጌዳ።
35 የሱስ ብሮ ሄዋ ጊሽን፥ አይሁዳ ዎሳ ጎልያ ካፑዋ ሶይፐ ኪተቴዳ አሳቱ ዪደ፥ "ነ ናታ ሀይቃድጋዱ፤ ስም ታማርስያዋ አያዉ ዳቡርሳይ?" ያጌድኖ።
36 ሽን የሱስ ኡንቱንቱ ግያዋ ስሲደ፥ አይሁዳ ዎሳ ጎልያ ካፑዋ፥ "አማኖ ጻላላ አማናፐ አትን፥ ያዮፓ" ያጌዳ። 37 የሱስ ጰጽሮሳፐ፥ ያቆባፐነ ያቆባ እሻ ዮሃንሳፐ ሀራይ ኦንነ ባረና ካለና ማላ ድጌዳ። 38 ኡንቱንቱ አይሁዳ ዎሳ ጎልያ ካፑዋ ሶይ ጋኬዳ ዎደ፥ የሱስ አሳይ ሎይ ዬክያዋነ ዝላልያዋ በኤዳ። 39 ገሊደ አሳ፥ "አያዉ ሎይ ዬኪቴ? ናታ ገምእሻዱፐ አትን፥ ሀይቃበይኩ" ያጌዳ።
40 ሄዋፐ ጉየ አሳይ አ ቦላ ሚጬዳ፤ ሽን አሳ ኡባ ካረ ከሲደ፥ ናት አዉዋነ አቶ ሄዋን ባረናና ደእያ አ ካልያዋንታነ አኪደ፥ ናታ ደኢያሳ ገሌዳ። 41 የሱስ ናት ኩሽያ ኦይቂደ፥ "ጻልታ፥ ቁሚ"5:41 ጻልታ፥ ቁሚ፦ ሀ ቃላቱ አራማይከ ጌተትያ ቃላን የሱሳ ዎድያን ፓላስቲነ ጋደን ሃሳየትያዋ። ጻልታ ግያዌነ ቁም ግያዌ አማራዋ ቃላ ግደና። ሽን ግሪክያ ቃላ። ያጌዳ፤ ሄዋ ብለይ፥ "ጉ ናቴ፥ ታን ኔና ደንዳ ጋይ" ግያዋ።
42 ናታ ኤለካ ደንዳ ኤቃደ ሀመታዱ፤ እዛ ታማነ ላኡ ላይ ናቶ፤ ሄዌ ሀንያዋን አሳይ ዳሮ ማላለቴዳ። 43 የሱስ ሄዋ ኡንቱንቱ ኦስነ ኦደና ማላ፥ ኡንቱንታ ምንስ አዛዚደ፥ "እዝዉ ምያባ እምተ" ያጌዳ።