1 ሄ ዎደ፥ ጮራ አሳይ ቃይ የሱሳኮ ሺቄዳ፤ አሳዉ ምያባይ ይና፥ የሱስ ባረና ካልያዋንታ ባረኮ ጼሲደ፥ 2 "ሀ ጮራ አሳይ ታናና ሄዙ ጋላሳይ ጋካናዉ ጋምኢደ፥ ምያባ አይነ ደምቤና ድራዉ፥ ታን ኡንቱንቶ ቃረታይ። 3 ታን ኡንቱንታ ኮሻና ሶይ የዶፐ፥ ቢደ ኦግያን ዳቡሪደ ኩንዳና፤ አያዉ ጎፐ፥ እቱ እቱ ሃኮ ሳፐ ዬዳ" ያጌዳ።

4 አ ካልያዋንቱ ዛሪደ፥ "ሀ አሳይ ባይና ሳን ሀ አሳ ኡባ ምዛናዉ ግድያ ቁማ ደማናዉ ዳንዳይያዌ ኦኔ?" ያጌድኖ።

5 የሱስ ኡንቱንታ፥ "ህንተንቶ አፑን ዳቡ ደኢ?" ያጊደ ኦቼዳ።

ኡንቱንቱ፥ "ላፑ ዳቡ ደኤ" ያጌድኖ።

6 የሱስ አሳ፥ "ሳኣን ኡትተ" ያጊደ አዛዜዳ፤ ቃይ ላፑ ዳቡዋ አኪደ፥ ጾሳ ጋላቴዳ፤ ሄ ዳቡዋ መንደ፥ አሳዉ ግሻና ማላ፥ ባረና ካልያዋንቶ እሜዳ። የሱሳ ካልያዋንቱ ሄ ጮራ አሳዉ ግሼድኖ። 7 ኡንቱንቶ ቃይካ አማሬዳ ሱፓ ሞለቱ ደኢኖ፤ የሱስ ሄዋንቶካ ጾሳ ጋላቲደ፥ አሳዉ ግሻና ማላ፥ ባረና ካልያዋንታ አዛዜዳ። 8 አሳይ ኡባይ ሚደ ካልና አቴዳ ዶካይ ላፑ ዛምቤልያ ኩሜዳዋ አ ካልያዋንቱ ደንድኖ። 9 ቁማ ሜዳ አሳይ ኦይዱ ሻአ ግዳና፤ ሄዋፐ ጉይያን፥ የሱስ አሳ የዴዳ። 10 እ ቃይ ባረና ካልያዋንቱና ኤለካ ዎንግርያን ገሊደ፥ ዳልማኑታ* ግያ ጋድያ ቤዳ።

11 ፓርሳዋቱ ዪደ፥ የሱሳና ፓሉማ ዶሜድኖ።

የሱሳ ፓጫናዉ ኮዪደ፥ ሳሉዋፐ ማላታ ባረንታ በሳና ማላ ኦቼድኖ። 12 የሱስ ዳርስ ቶክ ሸምፒደ፥ "ሀ ዎድያ አሳይ አያዉ ማላታ ኮዪ? ታን ህንተንቶ ቱሙዋ ኦዳይ፤ ሀ ዎድያ አሳዉ ማላታይ ኡባካ እመተና" ያጌዳ። 13 ቃይ ኡንቱንታ ሄዋን አጊደ፥ ዛር ዎንግርያን ገሊደ፥ አባፐ ሄፍን ፕኔዳ።

14 የሱሳ ካልያዋንቱ ቁማ አፋናዋ ዶጌድኖ፤ ኡንቱንቶ ዎንግርያ ግዶን እት ኡክፐ ሀራይ ባዋ። 15 የሱስ ኡንቱንታ፥ "ህንተንታ ኤርተ፤ ፓርሳዋቱዋ እርሹዋፐነ ሄሮድሳ* እርሹዋፐ ናገትተ" ያጊደ አዛዜዳ።

16 ኡንቱንቱ ባረንቱ ግዶን፥ "እ ሀዋ ግያዌ ኑዉ ቁማይ ባይና ድራሳ" ያጊደ ሃሳያ ዶሜድኖ።

17 የሱስ ኡንቱንቱ ግያዋ ኤሪደ፥ "ህንተንቶ ዳቡ ባይናዋ አያዉ ሃሳዪቴ? ሀእ ጋካናዉ ህንተዉ ገለኔ? ዎይ አኬክክቴ? ህንተ ዎዛናይ ጆሌዴ? 18 ህንተንቶ አይፊ ደኤ፤ በእክቴ? ቃይ ሀይይ ደኤ፤ ስስክቴ? ህንተንቶ ሀሳየተኔ?✝ 19 ታን እቼሹ ዳቡዋ እቼሹ ሻአ አሳዉ መን እሜዳ ዎደ፥ አፑን ዛምቤልያ ኩሜዳ ዶካ ደንድቴ?" ያጌዳ።

ኡንቱንቱ፥ "ታማነ ላኡ ዛምቤልያ ኩሜዳ ዶካ ደንዶ" ያጌድኖ።

20 "ታን ቃይካ ላፑ ዳቡዋ ኦይዱ ሻአ አሳዉ መንደ እሜዳ ዎደ፥ አፑን ዛምቤልያ ኩሜዳ ዶካ ደንድቴ?" ያጌዳ።

ኡንቱንቱ፥ "ላፑ ዛምቤልያ ኩሜዳ ዶካ ደንዶ" ያጌድኖ።

21 እ ቃይ፥ "ሀእካ አኬክበይክቴ?" ያጌዳ።

22 የሱስነ አ ካልያዋንቱ ቤተሳይዳ ግያ ካታማ ቤድኖ፤ አሳቱ ቆቃ ብታንያ የሱሳኮ አሂደ፥ ሄ ብታንያ ቦቻና ማላ፥ አ ዎሴድኖ። 23 የሱስ ቆቃ ብታንያ ኩሽያ ኦይቂደ፥ ሄራፐ ጋጻ ከሴዳ፤ አ አይፍያን ጩቺደ፥ ባረ ኩሽያ አ ቦላ ዎደ፥ "ነዉ አየንቶ ቤቲ?" ያጊደ ኦቼዳ።

24 ብታኒ ቂደ፥ "ታን አሳ በአይ፤ ሽን አሳይ ሀመቲደ፥ ም ማላቴ" ያጌዳ።

25 ሄዋፐ ጉይያን፥ የሱስ ሽረቲደ ብታንያ አይፍያን ባረ ኩሽያ ዎዳ። አ አይፊ ፓጼዳ፤ ብታኒካ ሎይ ጼሌዳ፤ ቃይ ኡባባካ ጌሺደ በኤዳ። 26 የሱስ ብታንያ፥ "ሄራ ገሎፓ" ያግ አ ሶይ የዴዳ።

27 የሱስ ባረና ካልያዋንቱና ቂሳርያ ፕሊጶሳ ደእያ ቄር ሄራቱዋ ቤዳ፤ እ ቢሽን ኦግያን የሱስ፥ "ታና አሳይ ኦና ጊ?" ያጊደ ባረና ካልያዋንታ ኦቼዳ።

28 አ ካልያዋንቱ፥ "እት እት አሳይ ኔና፥ ‘ጻማቅያ ዮሃንሳ’ ጌ፤ ሀራንቱ፥ ‘ኤላሳ’ ጊኖ፤ ቃይ ሀራንቱ፥ ‘ናባቱዋፐ እቱዋ’ ጊኖ" ያጌድኖ።

29 የሱስ ኡንቱንታ፥ "ህንተሽ ታና ኦና ጊቴ?" ያጊደ ኦቼዳ።

ጰጽሮስ፥ "ኔን ዶረቴዳ ክርስቶሳ" ያጊደ ዛሬዳ።

30 የሱስ፥ "ታባ ኦስነ ኦዶፕተ" ያጊደ ኡንቱንታ አዛዜዳ።

31 የሱስ ባረና ካልያዋንታ፥ "ታን፥ አሳ ናአይ፥ ዳሪ ዋየታናዉ በሴ፤ ጭማቱ፥ ቄሳቱዋ ካፓቱነ ህግያ ታማርስያዋንቱ ታና እጻናዉ በሴ፤ ኡንቱንቱ ታና ዎናዉነ ታን ሄዘንያ ጋላሳፐ ጉይያን፥ ሀይቁዋፐ ደንዳናዉ በሴ" ያጊደ ታማርሱዋ ዶሜዳ። 32 ሄዋ እ ኡንቱንቶ ጌሺደ ኦዴዳ፤ ጰጽሮስ አ እት ባጋ ዛሪደ፥ ዞረታ ዶሜዳ።

33 ሽን የሱስ ጉየ ስሚደ፥ ባረና ካልያዋንታ ጼሊደ ጰጽሮሳ፥ "ሀ ሴጻናዉ፥ ክቻ ታ ማታፐ! ኔን አሳይ ቆፕያዋ ቆፓሳፐ አትን፥ ጾሳይ ቆፕያዋ ግደና" ያጌዳ።

34 የሱስ ጮራ አሳነ ባረና ካልያዋንታ ባረኮ ጼሲደ፥ "ታና ካላና ኮይያ ኡራይ ደኦፐ፥ ባረና ካዶ፤ ያቲደ ባረ ማስቃልያ ቶኪደ፥ ታና ካሎ። 35 አያዉ ጎፐ፥ ባረ ሸምፑዋ* አሻና ኮይያ ኡራይ ባይዛናዋ፤ ሽን ታ ድራዉነ ዎንጋላ ምሽራቹዋ ድራዉ ባረ ሸምፑዋ ባይዝያ ኡራይ አሻናዋ። 36 እት ኡራይ ሳኣን ደእያ ኡባባ ባረዉ ሺሺደ፥ ባረ ሸምፑዋ ባይዞፐ፥ አ አያ ማዳኔ? 37 እት ኡራይ ባረ ሸምፑዋ ዎዛናዉ አያ እማና ዳንዳይ? 38 ጾሳ አማነና ሀ ናጋራንቻ የለታ ዎድያን፥ እት ኡራይ ታናንነ ታ ቃላን ዬላቶፐ፥ ታንካ፥ አሳ ናአይ፥ ቃይ ታ አዉዋ ቦንቹዋን ጌሻ ኪታንቻቱዋና ይያ ዎደካ፥ አን ዬላታና" ያጌዳ።