1 የሱስ ባረ ታማነ ላኡ ካልያዋንታ አዛዝያዋ ፖሌዳ ዎደ፥ ሄዋፐ ደንዲደ፥ ካታማቱዋን ታማርሳናዉነ ኦዳናዉ ቤዳ።

2 ጻማቅያ ዮሃንስ ቃሾ ጎለን ደኢደ፥ የሱስ ኦዳዋ ስሲደ፥ ባረና ካልያዋንታ አኮ ኪቲደ፥ 3 "ያናዌ ኔኔየ? ዎይ ሀራ ናጋኔ?" ያግ ኦቻናዳን ኦዳ።

4 የሱስ ዛሪደ፥ ኡንቱንቶ ሀዋዳን ያጌዳ፤ "ቢደ ህንተንቱ በእያዋነ ስስያዋ ዮሃንሳዉ ኦድተ፤ 5 ቆቃቱ ጼሊኖ፤ ዎባቱ ሀመቲኖ፤ ኦሉ ኦይቄዳዋንቱ ፓጺደ ጌዪኖ፤*11:5 ፓጺደ ጌዪኖ ግያዋ ሎይ አኬካናዉ 8:2 ጻደና ደእያ ብለን ጻፈቴዳዋ በአና ዳንዳየቴ። ቱላቱ ስሲኖ፤ ሀይቄዳዋንቱ ደንዲኖ፤ ህዬሳቱ ዎንጋላ ምሽራቹዋ ስሲኖ።✝11:5 ኢሳ. 35:5-6፤ 61:1 6 ታባ ስና ኡራይ አንጀቴዳዋ" ያጌዳ።

7 ዮሃንሳ ካልያዋንቱ ስም ቤዳ ዎደ፥ የሱስ ዮሃንሳባ ሺቄዳ አሳዉ ሀዋዳን ያግ ሃሳዬዳ፤ "አያ በአናዉ አሳይ ደኤና መላ ቢታ ከሴድቴ? ጫርኩ ቃያ ማቃ በአናዉ ከሴድቴ? 8 ያትና፥ አያ በአናዉ ከሴድቴ? ሎእያ ማዩዋ ማዬዳ ብታንያ በአናዉ ከሴድቴ? ሎእያ ማዩዋ ማዬዳዋንቱ ካታቱዋ ጎለን ደኢኖ። 9 ያትና፥ አያ በአናዉ ከሴድቴ? ናብያ በአናዉ ከሴድቴ? ኤ፥ ታን ህንተዉ ኦዳይ፤ ናብያፐካ አያዋ በኤድታ። 10 አያዉ ጎፐ፥ ጾሳ ማጻፋን፥

" ‘ጾሳይ፥ "በአ፥ ታን ኪትያዋ

ኔፐ ስንዉ የዳና።"

እ ነዉ ኦግያ ጊግሳናዋ’ ያጌዳ

ጌተቲደ ዮሃንሳባይ ጻፈቴዳ።"✝11:10 ሚልክ. 3:1

11 ታን ህንተንቶ ቱሙዋ ኦዳይ፤ አት ኡሉዋፐ የለቴዳ አሳ ኡባን ጻማቅያ ዮሃንሳፐ አያዌ ኦንነ ደንድቤና፤ ሽን ሳሉዋ ካዉተን ኡባፐ ላፍያዌ አፐ አና። 12 ጻማቅያ ዮሃንሳ ዎድያፐ ዶሚደ፥ ሀቼ ጋካናዉ፥ ሳሉዋ ካዉተታ ዳሮ ናቀታዉ፤ ምን ባጸትያዋንቱ እዞ ደሚኖ። 13 አያዉ ጎፐ፥ ናባቱ ኡባቱነ ሙሴ ህጊ ዮሃንሳ ዎዲ ጋካናዉ፥ ትምቢትያ ሃሳዬድኖ፤ 14 ስም ህንተንቱ ኡንቱንቱ ሃሳዮዋ አማናናዋ ግዶፐ፥ ያናዋ ጌተቴዳ ኤላስ ሀ ዮሃንሳ።✝11:14 ሚልክ. 4:5፤ ማቶሳ 17:10-13፤ ማር. 9:11-13 15 ስስያ ሀይይ ደእያዌ ስሶ!

16 "ሽን ታን ሀ ዎድያ አሳ አያና ሌምሶ? ኡንቱንቱ ቆጫን ኡትያ ናና ማላቲኖ፤ ኡንቱንቱ ባረንቱ ላገቱዋ ጼሲደ፥ 17 ‘ኑን ህንተንቶ ህጽጽያ ፑኔዶ፤ ሽን ዱርበይክታ፤ ዬኩዋ የካ ከሴዶ፤ ሽን ዬክበይክታ’ ያጊኖ። 18 አያዉ ጎፐ፥ ዮሃንስ ጾሚደነ ዎይንያ ኤሳ ኡሸናን ዪና ኡንቱንቱ፥ ‘አ ቦላ ኢታ አያናይ ደኤ’ ያጌድኖ። 19 ታን፥ አሳ ናአይ፥ ማደነ ኡሻደ ዪና፥ ኡንቱንቱ ታና፥ ‘ሀ ናፍሳማነ ዎይንያ ኤሳ ኡሽያዋ በእተ፤ ቃራጻ ቃንጽያዋንቱናነ ናጋራንቻቱዋና ሲቀቴ’ ያጊኖ፤ ሽን ጾሳ አዳ ኤራተይ ባረ ኦሱዋን ቱማ ግዲደ ቤቴ" ያጌዳ።

20 ሄዋፐ ጉይያን፥ የሱስ ባረ ማላታፐ ዳርያ ባጋ ኦዳ ካታማቱዋን ደእያ አሳይ ባረንቱ ናጋራፐ ስምቤና ድራዉ፥ ኡንቱንታ ሀዋዳን ያጊደ፥ ቶሽያ ዶሜዳ፤ 21 "ኮራዚነ ካታማዉ፥ ነዉ አየሮ፤ ቤተሳይዳ ካታማዉ፥ ነዉካ አየሮ፤ አያዉ ጎፐ፥ ህንተንቱ ቦላ ጾሳይ ኦዳ ማላታይ ጺሮሳ ካታማንነ ሲዶና ካታማን ኦሰቶዋ ግድንቶ፥ ኡንቱንቱ ማቅያ ማዪደ፥ ብድን ኦከቲደ፥ በን ባረንቱ ናጋራፐ ስማናዋንታሽን።✝11:21 ኢሳ. 23:1-18፤ ህዝ. 26:1—28:26፤ ኢዩ. 3:4-8፤ አሞጻ 1:9-10፤ ዛካ. 9:2-4 22 ታን ህንተዉ ኦዳይ፤ ፕርዳ ጋላስ ጾሳይ ህንተፐ ጺሮሳ ካታማዉነ ሲዶና ካታማዉ ፕርዳ ካዉሽሳና። 23 ቃይ ቅፍርናሆማ ካታማዉ፥ ኔን ሳሉዋ ፑደ ቁ ጋናዉ ኮያድ? ኔን ስኦልያ ዱገ የገታና፤ አያዉ ጎፐ፥ ነ ቦላ ጾሳይ ኦዳ ማላታይ ሶዶማ ካታማን ኦሰቶዋ ግድንቶ፥ ሶዶማ ካታማይ ሀቼ ጋካናስካ ደአናዋሽን።✝11:23 ኢሳ. 14:13-15፤ ዶመ 19:24-28 24 ታን ህንተዉ ኦዳይ፤ ፕርዳ ጋላስ ጾሳይ ኔፐ ሶዶማዉ ፕርዳ ካዉሽሳና" ያጌዳ።

25 የሱስ ሄ ዎደ ዛሪደ፥ ሀዋዳን ያጌዳ፤ "ታ አቦ፥ ሳሉዋ ሳኣ ጎዳዉ፥ ኔን ሀዋ አዳ ኤራንቻቱዋፐነ አኬካንቻቱዋፐ ገንደ፥ ኤረና ናናቶ ቆንጭሴዳ ድራዉ፥ ኔና ጋላታይ፤ 26 ኤ ታ አቦ፥ አያዉ ጎፐ፥ ሀዌ ነ ሸንያዳን ኦሰቴዳ።

27 "ታ አቡ ታዉ ኡባባ እሜዳ፤ አዉዋፐ ሀራይ ናኣ ኤረና፤ ናኣፐነ ናአይ አዉዋ ቆንጭሳናዉ ኮይያ አሳፐ አትን፥ ሀራይ አዉዋ ኤረና።

28 "ዳቡራንቻቶ፥ ዴጹዋ ቶኮዋንቶ ኡባቶ፥ ታኮ ሃ ዪተ፤ ታን ህንተንታ ሸምፕሳና። 29 ታን ጋራነ ታ ዎዛናን አሽከ ግዶ ድራዉ፥ ታ ሞርገ ምን ዋጸትተ፤ ታፐ ታማርተ፤ ህንተንቱ ሼምፖካ ህንተ ሸምፑዋ ደማና።✝11:29 ኤር. 6:16 30 አያዉ ጎፐ፥ ታ ሞርገ ምይ ጊጋ፤ ቃይ ታን ህንተንታ ቶሴዳዌካ ካዉሻ" ያጌዳ።