ሌምሱዋ 1

ሌምሳቱዋ ዎት ጎኤታነንቶ

(1:1-7)

1 ሀዋንቱ እስራኤልያ ካትያ ዳዊታ ናኣ ሶሎሞና ሌምሳቱዋ።✝1:1 1 ካታ. 4:32 2 ሌምሶቱ አሳይ አዳ ኤራተ፥ ሴራነ ኤራ ሃሳያ አኬካናዉ ማዲኖ። 3 ኡንቱንቱ አዳ ኤራተን፥ ደአና ደኡዋ፥ ጽሎተ፥ ሱረ ፕርዳነ ሱረተ ታማርስያዋንታ፥ 4 ቦዛቶ አኬካ፥ ዎዳላቶ ኤራተነ ዎዛናማተ እምያዋንታ። 5 አዳ ኤራንቻቱ ሀ ሌምሳቱዋ ስሲደ፥ ኤራ ጉጂኖ፤ አኬካንቻ አሳቱካ ሎኦ ዞርያ አኪኖ። 6 ሄዋዳን ሌምሳቱዋነ ኡንቱንቱ ብለ፥ አዳ ኤራንቻቱዋ ሃሳያነ ኡንቱንቱ ቃንእሸቱዋ አኬካናዉ ዳንዳየቴ።

7 አዳ ኤራተዉ ዶመይ መና ጎዳዉ ያይያዋ፤ ሽን ቦዛቱ አዳ ኤራተነ ሴራ ካኖ።✝1:7 ኢዮባ 28:28፤ ማዝ. 111:10፤ ሌም. 9:10

አዳ ኤራተ ኮያናዳን እመቴዳ ዞርያ

(ሌም. 1:1—7:27)

8 ታ ናአዉ፥ ነ አቡ ዞርያ ስሳ፤ ነ ዳያ ታማርስያዋካ ዶጎፓ። 9 ሄዌ ነ ሁጲያዉ ቦንቾ ካላቻ፤ ነ ቆያዉካ ሀብልያ ግዳናዋ።

10 ታ ናአዉ፥ ኔና ናጋራንቻቱ ባለፐ፥ ኤኖ ጎፓ። 11 ኡንቱንቱ ኔና፥ "ኑናና ደንዳ፤ አሳ ዎናዉ ቆሰቲደ ናጎይተ፤ ጋሱ ዮፐነ ጽሎቱዋ ዎናዉ ቆሰት ኡቶይተ፤ 12 ስኦሊ ምትያዋዳን፥ ኑንካ ኡንቱንታ ፓጻ ደእሺና ምቶይተ፤ ኑን ኡንቱንታ ጪሞ ኦላን ኦልያ አሳቱዋዳን ኦና። 13 ኑን አልኦ ሚሻ ኡባ ደማና፤ ኑ ጎልያካ ኦሞዱዋን ኩንና፤ 14 ኑናና ዙፐቱዋን፤ ደሜዳዋካ እትፐ ግሸታና" ያጋና።

15 ታ ናአዉ፥ ኡንቱንቱና ኦግያ ሀመቶፓ፤ ነ ገድያ ኡንቱንቱ ሎሱዋ የሶፓ። 16 አያዉ ጎፐ፥ ኡንቱንቱ ኢታባ ኦናዉ ዎጺኖ፤ አሳ ሱ ጉሳናዉ ኤሌሊኖ። 17 ካፉ ጼልሽን፥ አ ኦይቃናዉ ዳባ የግያዌ አይነ ማደና። 18 ሽን ኡንቱንቱ ባረንቱ ሱ ጉሳናዉ ባረንቶ ዎጽማድያ ምጪኖ፤ ባረንቱ ሸምፑዋ ዎናዉ ቆሰት ኡቲኖ። 19 ቦንቂያን ጎኣ ደምያ ኡባቱዋ ዉርሰይ ሄዋ ማላ፤ ሄዌ እዛዉ ሸምፑዋ አኬ።

አዳ ኤራተ እጾፐ ኔና ኤራ!

20 አዳ ኤራተታ ኦግያን ጼሳዉ፤ ጉታራን ባረ ቃላ ቁ ኦደ ስሳዉ።✝1:20-21 ሌም. 8:1-3 21 አዳ ኤራተታ አሳይ ሺቅያ ሳኣን ኤቃደ ጼሳዉ፤ ካታማ ገልያ ፐንግያን ኤቃደ፥

22 "ህንተኖ፥ አኬካይ ፓጬዳዋንቶ፥ ህንተ አኬካ ፓጫ አዉደ ጋካናዉ ዶሲቴ? ቅሊጭያዋንቶ፥ ቅሊጭያዋን አዉደ ጋካናዉ ናሸቲቴ? ቦዛቶ፥ ኤራተ አዉደ ጋካናዉ እጺቴ? 23 ታ ሴራኮ ስሞፐ፤ ታን ታ ኤራ ህንተ ቦላ ጉሳና፤ ታ ቃላካ ህንተና ታማርሳና። 24 ታን ጼሴዳ ዎደ፥ ህንተ ኮየናን እጼድታ፤ ታን ኩሽያ ምጭናካ፥ ኦንነ አኬክቤና። 25 ታ ዞርያ ኡባ ካድታ፤ ታ ሴራካ አክበይክታ። 26 ሄዋ ድራዉ፥ ህንተና መቱ ጋክያ ዎደ፥ ታን ህንተ ቦላ ሚጫና፤ ህንተና ባሻይ ጋክያ ዎደ፥ ታን ቅሊጫና። 27 ዳጋማይ ኡሹዋዳን ህንተ ቦላ ይያ ዎደ፥ መቱ ጎትያዳን ህንተ ቦላ ይያ ዎደ፥ ቱጋይነ ዋዪ ህንተ ቦላ ጋክያ ዎደ፥ ታን ህንተና ቅሊጫና።

28 "ሄ ዎደ ኡንቱንቱ ታና ጼሳና፤ ሽን ታን ኮይከ፤ ኡንቱንቱ ታና ምንሲደ ኮያና፤ ሽን ደምክኖ። 29 አያዉ ጎፐ፥ ኡንቱንቱ ኤራተ እጼድኖ፤ መና ጎዳዉ ያይያዋ ዶርበይክኖ። 30 ታ ዞርያ አክበይክኖ፤ ታ ሴራ ኡባካ ካድኖ። 31 ሄዋ ድራዉ፥ ኡንቱንቱ ባረንቱ ኦዳ ኦሱዋ አይፍያ ማና፤ ባረንቱ ቆፔዳ ቆፋ አይፍያካ ካላና። 32 አኬካይ ፓጬዳዋንታ አዳ ኤራተፐ ሃክያዌ ዎ፤ ቦዛቱዋ ሸነኮ ግያዌ ይሴ። 33 ሽን ታን ኦድያዋ ስስያዋንቱ ኡባይ ዎፑ ጊደ፥ ሳሮ ደአና፤ መቱዋ ህርጋፐካ ሸምፓና" ያጋዉ።