አዳ ኤራተፐ ቤትያ አንጁዋ
1 ታ ናአዉ፥ ኔን ታ ግያዋ አኮፐ፥ ታ አዛዙዋካ ነ ግዶን ምንጆፐ፥ 2 አዳ ኤራተ ሀይዞፐ፥ ነ ዎዛናፐ አኬኮፐ፥ 3 ኤራተ ጼሶፐ፥ አኬካካ ቁ ኦደ ጼሳ። 4 አሳይ ብራ ዎይ ቆሴዳ ሚሻ ኮይያዋዳን፥ ኔን ኤራተ ኮያ። 5 ሄ ዎደ ኔን መና ጎዳዉ ያዬ ግያዌ አየንቶ አኬካና፤ ጾሳካ ሎይደ ኤራና። 6 አያዉ ጎፐ፥ መና ጎዳይ አዳ ኤራተ እሜ፤ አፐ ኤራተይነ አኬካይ ቤቴ። 7 እ ሱረቶ ማድያ ዞርያ ምንጄ፤ ቶሺ ባይናን ሀመትያዋንቶካ እ ጎንዳልያ። 8 ቱሙዋ ፕርዳ ኦግያ ናጌ፤ ባረዉ አማነትያዋንቱ ኦግያካ ናጌ።
9 ሄ ዎደ ኔን ጽሎተ፥ ሱረ ፕርዳ፥ ሱረተነ ሎኦ ኦሱዋ ኡባ ኤራና። 10 አያዉ ጎፐ፥ አዳ ኤራተይ ነ ዎዛና ገላና፤ ኤራተይካ ነ ሸምፖ ናሸቻ ግዳና። 11 ኔና አዱስ ቆፕያዌ ናጋና፤ አኬካይካ ኔና ናጋና። 12 አዳ ኤራተይ ኔና ኢታ አሳቱዋ ኦግያፐ ናጋና፤ ጌላባ ሃሳይያዋንቱፐ አሻና። 13 ኡንቱንቱ ናጋራ ማን ደአናዉ፥ ጽሎተ ኦግያ አጊኖ። 14 ኢታ ኦያዋን ናሸቲኖ፤ ጌላባን ሀሹ ጊኖ። 15 ኡንቱንቱ ኦያዌ ምርቀ፤ ኡንቱንቱ ደኡካ ጌላ።
16 አዳ ኤራተይ ዎሹምያ ምሽራትፐነ ሸሌሽያ ቃላን ሃሳይያ ላገትፐ ኔና አሻና። 17 እዛ ባረ ናአተ አስና አጋዉ፤ ባረ ጾሳ ስንን ጫቀቴዳ ጫቁዋካ ዶጋዉ። 18 እዝ ጎለ ብያዌ ሀይቃናዉ ብያዋ፤ እዝ ኦጊ ሀይቆ ካለ። 19 ኢኮ ብያ ኦንካ ጉየ ስመና፤ ደኡዋ ኦግያካ ደመና። 20 ሄዋ አጋደ፥ ኔን ሎኦ አሳቱዋ ሌምሱዋ ካላ፤ ጽሎ አሳቱዋ ደኡዋካ ቁላ። 21 አያዉ ጎፐ፥ ሱረ አሳቱነ ቶሺ ባይና አሳቱ ቢታን ጋምኢደ ደአና። 22 ሽን ኢታቱ ቢታፐ ቆለታና፤ አማንተናዋንቱካ ሾደቲደ ያና።