1 ሴርያዋ ዶስያ ኡራይ ኤራተ ዶሴ፤ ሽን ሴራ እጽያ ኡራይ ዶንጭሎዋ።

2 ሎኦ አሳይ መና ጎዳፐ ሳባ ደሜ፤ ሽን መና ጎዳይ ኢታቱዋ ፕርዴ።

3 አሳ ኢታተይ ምንሲደ ኤሰና፤ ሽን ጽሎቱዋ ጻጱ ቃጸና።

4 ዎዛናማ ምሽራታ ባረ አስናዉ ካላቻ ማላ፤ ሽን ባረ አስና ካዉሽያ ምሽራታ አ መቀ ምያ አጃጅያ ማላ።

5 ጽሎቱዋ ቆፋይ ሱረ፤ ሽን ኢታቱዋ ዞሪ ጭሙዋ።

6 ኢታቱዋ ሃሳያይ አሳ ዎናሳ፤ ሽን ጽሎቱዋ ሃሳያይ ኡንቱንታ አሼ።

7 ኢታ አሳቱ ኩንዳና፤ ኡንቱንቶ ዘረይካ ደኤና፤ ሽን ጽሎቱዋ ዘረይ ምኒደ ደአና።

8 አሳይ ባረ አዳ ኤራተ ኬሻ ጋላተቴ፤ ሽን ጌላ ቆፋይ ደእያ አሳይ ካቴ።

9 ዱረ አሳ ማላቲደ፥ መቱዋን ደእያ አሳፐ ጮ አሳ ማላቲደ፥ ኦደ ባረ ደኡዋ ሱግያ አሳይ ኬካ።

10 ጽሎ አሳይ ባረ መህያዉ ቃረቴ፤ ሽን ኢታ አሳ ኬካተዉ መቀ ባዋ።

11 ባረ ቢታ ምንስ ኦያ ኡራይ ካ ካሌ፤ ሽን ፓናባ የደርስያ ኡራዉ አኬካይ ፓጬዳዋ።

12 ኢታቱ ናጋራንቻ አሳቱዋ ኦሞዱዋ አካናዉ አሞቲኖ፤ ሽን ጽሎቱዋ ጻጱ ዳሺደ ደአና።

13 ኢታ አሳ አ ዶናፐ ከሴዳ ሃሳያይ ጲረ ግዲደ ኦይቄ፤ ሽን ጽሉ መቱዋፐ ከስ አኬ።

14 አሳይ ባረ ዶናፐ ከስያ ቃላን ሎኦባ ካሌ፤ ባረ ኦዳ ኦሱዋ ጋትያካ አኬ።

15 ቦዛ አሳይ ብያ ቡሳይ አዉ አ ሁጲያን ልከ ማላቴ፤ ሽን አዳ ኤራንቻ አሳይ ዞርያ ስሴ።

16 ቦዛ ኡራ ሀንቁ ኤለካ ኤረቴ፤ ሽን ጭንጫ አሳይ ቦርያ ካደ አ።

17 ቱሙዋ ሃሳይያ አሳይ ሱረባ ኦዴ፤ ሽን ዎርዱዋ ማርካይ ዎርዱዋን ኦዴ።

18 አኬከናን ሃሳይያ ሃሳያይ ጩብያዳን ጫዴ፤ ሽን አዳ ኤራንቻ እንጻርሳይ ፓ።

19 ዎርዶ ሃሳያይ ጉ ዎድያሳ፤ ሽን ቱሞ ሃሳያይ መናዉ ደአና።

20 ኢታ ቆፕያዋንቱ ዎዛናን ጭሙ ደኤ፤ ሽን ሳሮባ ዞረትያዋንቱ ዎዛናን ናሸቻይ ኩሜ።

21 ጽሎቱዋ መቱ ጋከና፤ ሽን ኢታቶ መቶፐ አትና፥ ሀራባይ ደኤና።

22 መና ጎዳይ ዎርዳንቻቱዋ እጼ፤ ሽን ቱማንቻ አሳቱዋን እ ናሸቴ።

23 ጭንጫ አሳይ ባረ ኤራ ቆሴ፤ ሽን ቦዛቱ ባረንቱ ቦዛተ ኦዲኖ።

24 ምኒደ ኦያ ኡራይ ደርያ ሞዴ፤ ሽን አዛላይ ሞደቴ።

25 ህርግያዌ አሳ ናሸቻ ድጌ፤ ሽን ሎኦተና ደእያ ሃሳያይ አ ናሸቼ።

26 ጽሎ አሳይ ባረ ሾሩዋ ዞሪደ፥ ሱረ ኦግያ ካለ፤ ሽን ኢታቱዋ ኦጊ ቱሙዋፐ ሃሴ።

27 አዛላ አሳይ ሻንካቲደ አሄዳ አሹዋ ካና፤ ሽን ምን ኦደ ደሜዳ ኡራይ ባረ ዱረታዉ ቦንቹዋ እሜ።

28 ጽሎተ ኦግያን ደኡ ደኤ፤ ሄ ኦግያን ሀይቁ ባዋ።