1 ኤራንቻ ናአይ ባረ አዉዋ ሴራ ስሴ፤ ሽን ቅሊጭያዌ ሴራ ስሰና።

2 አሳይ ባረ ዶናፐ ከስያ ቃላን ሎኦባ አኬ፤ ሽን አማንተናዋንቱ ማካላባ አሞቲኖ።

3 ባረ ዶና ናግያ ኡራይ ባረ ሸምፑዋ ናጌ፤ ሽን ኤለካ ሃሳይያ ኡራይ ባረና ይሴ።

4 አዛላይ አሞቴ፤ ሽን አያነ ደመና፤ ሽን ምኒደ ኦያዋንቱ ካላና።

5 ጽሎ አሳቱ ዎርዱዋ ሃሳያ እጺኖ። ሽን ኢታ አሳቱዋ ሃሳያይ ዬላዬነ ካዉሼ።

6 ሱረ ደኡዋ ደእያ ኡራ አ ጽሎተይ ናጌ፤ ሽን ናጋራንቻ አ ናጋራይ ኩንድሴ።

7 ባረና ዱረ ማላትስያ አሳይ ደኤ፤ ሽን አዉ አያይነ ባዋ፤ ሀራይ ቃይ ባረና ህዬሳ ማላትስያዌ ደኤ፤ ሽን አዉ ዳሮ ዱረታይ ደኤ።

8 አሳይ ባረ ሻሉዋን ባረ ሸምፑዋ ዎዛናዉ ዳንዳዬ፤ ሽን ህዬሳ ያሽስያዌ ባዋ።

9 ጽሎቱዋ ጾምፒ ፖጩም ፖኤ፤ ሽን ኢታቱዋ ጾምፒ ቶአና።

10 ኦቶሩ ዋላሳ የሌ፤ ሽን ዞርያ አክያዋንቱ አዳ ኤራንቻ።

11 ዳቡር ባይናን ደሜዳ ሚሻይ ኤለካ ዬ፤ ሽን ምን ኦደ ደሜዳ ዱረታይ፥ ዳር ዳሪደ ቤ።

12 ኮይያዌ ፖለተናን ጋምእያዌ ካዮዬ፤ ሽን አሞቴዳዌ ፖለትያዌ ናሸቼ።

13 ዞርያ ካያ ኡራይ መቱዋን ገሌ፤ ሽን አዛዙዋ ቦንችያ ኡራይ ሳሩዋን ደአና።

14 አዳ ኤራንቻይ እምያ ትምርቲ ደኡዋ ፑልቶ፤ ሄዌ አሳይ ሀይቁዋ ጲርያፐ ከስ አካናዉ ማዴ።

15 አኬካይ ደእያ ኡራይ ቦንቼቴ፤ ሽን አማነተናን አግያዌ ባሻዉ አፌ።

16 ጭንጫ አሳይ ኡባይ ኤራን ኦ፤ ሽን ቦዛይ ባረ ቦዛተ ቆንጭሴ።

17 አሳይ ኪቴዳ ኢታ ኪታንቻይ፥ መቱዋን ገሊኖ፤ ሽን አማንያ አሳቱ ኪቴዳዌ፥ ሳሮተ አሂኖ።

18 ሴራ እጽያ አሳይ ህዬሴነ ዬላቴ፤ ሽን ሴርና ስስያ ኡራይ ቦንቼቴ።

19 አሞቴዳዋ ደምያዌ ሎይ ናሸቼ፤ ሽን ኢታቱ ኢታፐ ሃካናዉ ኮይክኖ።

20 አዳ ኤራንቻ አሳቱዋና ሀመትያ አሳይ አዳ ኤራንቻ ግዴ፤ ሽን ቦዛ አሳቱዋና ሀመትያ አሳይ መቱዋን ገሌ።

21 ናጋራንቻቱዋ ኢታ ካጫይ ካሌ፤ ሽን ጽሎቱ ሎኦ ኦሱዋ ዎይቱዋ አካና።

22 ሎኦ አሳይ ባረ ናናቱዋ ናናቱዋ ላትሴ፤ ሽን ናጋራንቻ ዱረታይ ጽሎ ዳጋቴ።

23 ህዬሳ ጎሻይ ዳሮ ካ አይፋናዉ ዳንዳዬ፤ ሽን ሱረ ፕርዳይ ፓጬዳዋ ጋሱዋን ዬ።

24 ቃይጼርያን ዋናዉ ቃረትያ ኡራይ ባረ ናኣ እጼ፤ ሽን ባረ ናኣ ሲቅያ ኡራይ ምኒደ ሴሬ።

25 ጽሉ አ ኡሉ ካላና ጋካናዉ ሜ፤ ሽን ናጋራንቻይ ኮሻቴ።