1 ካትያ ዎዛናይ መና ጎዳ ኩሽያና፤ እ አ ዎዛና ጎግያ ሃ ዛርያዋዳን፥ ባረ ኮዬዳሳ ዛሬ።
2 አሳይ ኦያዌ ኡባይ እዛዎ ልከ ማላቴ፤ ሽን መና ጎዳይ አ ዎዛና ቆፋ ፓጬ።
3 ያርሹዋ ያርሽያዋፐካ አደ፥ ጽሎባነ ሱረባ ኦያዋ መና ጎዳይ ዶሴ።
4 ኢታቱ ኦቶረትያዋንነ አይያዋን ኤረቲኖ፤ ሄዌካ ናጋራ።
5 ምኖ ኦሳንቻ ሀልቹ ዱረዬ፤ ሽን ኤሌልያ ኡባይ ህዬሳና።
6 ዎርዶቲደ ዳጋዬዳ ዱረታይ ፐንቱዋ ሱሉዋዳን ዬ፤ ሄዋ ኮይያዋንቱ ሀይቁዋ ኮዪኖ።
7 ኢታቱ ሱረባ ኦናዉ እጽያ ድራዉ፥ ኡንቱንቱ ማካላ ኦሱ ኡንቱንታ አኪደ ቤ።
8 ባይዛንቻቱ ጌላ ኦግያን ሀመቲኖ፤ ሽን ጌሻቱ ሱረባ ኦኖ።
9 ዋላቀትያ ማቻትና እት ጎልያን ደእያዋፐ ሄ ጎልያ ካሻን ደእያዌ ኬካ።
10 ኢታቱ ኢታባ ኦናዉ አሞቲኖ፤ ባረንቱ ሾሮቶ ቃረትክኖ።
11 ቅሊጭያዌ ሙረቴዳ ዎደ፥ ዎዛናይ ፓጬዳ ኡራይ አዳ ኤራ ታማሬ፤ ቃይ ዎዛናማ ኡራይ ታማሪደ፥ ኤራ ደሜ።
12 ጽሎ ጾሳይ ኢታቱዋ ሶን ኦሰትያዋ ኡባ በኤ፤ ኡንቱንታ አ የጊደ ይሴ።
13 ህዬሳ ዋሱዋ ስሳናፐ ጊደ፥ ባረ ሀይ ቱጭያ ኡራይ፥ እካ ዋሳና፤ አልያዌ ያና።
14 ጌማን እምያ እሙ ሀንቁዋ ዶሽሴ። አፍላ ግዱዋና እሜዳ ማታዪ ሱሎ ሀንቁዋ እርጽሴ።
15 ሱረ ፕርዳይ ፕርደቴዳ ዎደ፥ ሄዌ ጽሎ ናሸቻ፤ ሽን ኢታ ኦያዋንቶ ዳጋማ።
16 አኬካ ኦግያፐ ሀድሬዳ ኡራ ሀይቁ ናጌ።
17 አ እንጅያን ደአና ግያ ኡራይ ማንቄ፤ ዎይንያ ኤሳነ ዛይትያ ዶስያ አሳይ ዱረተና።
18 እት እት ገደነ ጾሳ አሳቱዋ አሻናዉ ኢታ አሳቱ ሙረቲኖ፤ አማነተና አሳቱካ ሱረ አሳቱዋ ድራዉ ሙረቲኖ።
19 ዋላቀትያነ ይሎትያ ማቻትና ደአናፐ ባዙዋን ደእያዌ ኬካ።
20 ዎዛናማ ኡራ ሶን ማልኦ ቁማይነ ኦይሳይ ምንጀቴ፤ ሽን ቦዛ አሳይ ባረዉ ደእያዋ ኡባ ም ድጌ።
21 ጽሎተነ አገና ሲቁዋ ኮይያ ኡራ ላይይ አዱቄ፤ ቃይ ሄ ኡራይ ጽሎተነ ቦንቹዋ ደሜ።
22 ዎዛናማ አሳይ ዎልቃማ ኦላንቻቱ ደእያ ካታማ ኦሊደ ኦይቄ፤ ኡንቱንቱ አማነቴዳ ምኖ ጌሱዋካ ላሌ።
23 ባረ ዶናነ ባረ እንጻርሳ ናግያ አሳይ ባረና መቱዋፐ ናጌ።
24 ኦቶረትያነ አይያ አሳይ ቅሊጭያዋ ጌተቴ፤ እ ኦቶራንቻ ግዴዳ ድራዉ፥ አሳዉ ቆፐና።
25 አዛላ አሙ ዎ፤ አያዉ ጎፐ፥ እ ኦናዉ ኮየና።
26 አዛላይ ጋላሳ ኩመን ዳሮባ ደማናዉ አሞቴ፤ ሽን ጽሉ ባረዉ አሸናን እሜ።
27 ጾሳይ ኢታቱዋ ያርሹዋ ሸነቴ፤ ሄዋፐካ ኡንቱንቱ አዉ ኢታ ቆፋን ሺሽያ ያርሹዋ አ ሸነቴ።
28 ዎርዶ ማርካይ ያና፤ ሽን ቆፒደ አኬካን ሃሳይያ ኡራ ሃሳያይ አከታና።
29 ኢታ አሳይ ታዋ ጻላላይ ልከ ጌ፤ ሽን ሱረ አሳይ ዩሽ ቆፔ።
30 አሳይ ባረ አዳ ኤራተን፥ አኬካንነ ዞርያን መና ጎዳና ኤቀታናዉ ዳንዳየና።
31 ኦላዉ ፓራ ኮራናዉ ዳንዳየቴ፤ ሽን ኦላ ጾንስያዌ መና ጎዳ።