1 ሀዋንቱካ ቃይ፥ ይሁዳ ካትያ ህዝቂያሳ አሳቱ ዱቂደ ጻፌዳ ሶሎሞና ሌምሳቱዋ።

2 ጹራ ገንያዌ ጾሳዉ ቦንቾ፤ ጹራ ፕልጊደ ከስያዌ ቃይ ካተቶ ቦንቾ።

3 ሳሎቱዋ ቃተነ ሳኣ ጪማተ አሳይ ጋከናዋዳን፥ ካተቱዋ ቆፋካ አሳይ ኤራናዉ ዳንዳየና።

4 ብራፐ ቅታ ድጋ፤ ሄዋፐ ጉይያን፥ ዎጋጪ ቆጺደ፥ ሎኦባ ከሳና።

5 ካትያ ስንፐ ኢታቱዋ ድጋ፤ ያቶፐ፥ አ ካዉተ አራታይ ጽሎተን ምን ኤቃና።

6 ካትያ ስን አያ ዎደ ጬቀቶፓ፤ ዎልቃማ አሳቱዋፐ ግዱዋን ሳኣ ኮዮፓ።✝ 7 ኔፐ ግታትያ አሳዉ ሳኣ እማናዉ ካፑ ኔና ደንና ካዉሽያዋፐ፥ ካፑ ኔና፥ "ሀዋኮ ቁ ጋ" ግያዌ ነዉ ኬካ።

8 ነ አይፍያን በኤዳዋ ማርካታናዉ ዳባባ ባናዉ ኤሌሎፓ፤ አያዉ ጎፐ፥ ኔን ማርካታ ስምና፥ ሀራ አሳይ ነ ማርካተይ ባላ ግድያዋ ቆንጭሶፐ፥ ኔን ዬላታና። 9 ኔፐነ ነ ሾሩዋፐ ግዱዋን ፓሉሚ መቶፐ፥ አናና ሃሳያደ ነ ፓሉምያ ዉርሳ። ሀራ አሳ ጹራ ቆንጭሶፓ። 10 ሄዌ ዮፐ፥ ኔን ኦድያዋ ስሴዳ አሳይ ኔና ካዉሻና፤ ሄዋን ነ ሱንይ ላኤን ስመናዳን ባያና።

11 ኮሽያ ዎድያን ሃሳየቴዳ ልከ ቃላይ ብራ ቦላ ትጌዳ ዎርቃ አሌቁዋ ማላ።

12 ሀይዝያ ኡራ ኤራንቻ አሳይ ዞርያ ዞሪ ሀይን ዎዳ ዎርቃ ዎይ ጌሻ ዎርቃፐ ኦዳ አሌቁዋ ማላ።

13 ካ ጫክያ ቦንያን እርጻ ሃይ ኡሽና አልያዋዳን፥ ኪትና አማነትያ አሳይ ባረና ኪትያዋንታ ናሸቼ።

14 እመናባ "እማና" ያጊደ ጬቀትያ አሳይ እራይ ባይና ሻርያነ ጫርኩዋ ማላ።

15 ዳንዳያንቻ አሳይ ደርያ ሞድያዎ ኦዲደ አማን፤ ሊቆ ቃላይ መቀ አደ ገሌ።

16 ኤሳ ደሞፐ፥ ካላና ጋካናዉ ማ፤ ሽን ዳርሶፐ፥ ኔን ጮሻና። 17 ኔና ኡፊደ እጸናዳን፥ ነ ሾሩዋ ጎለ ኡባ ገደ ቦፓ።

18 ባረ ሾሩዋ ቦላ ዎርዱዋን ማርካትያ አሳይ ጋትማይ፥ ማሻይነ ቃራ አዳይ አሳ ቆህያዋ ኬሻ ቆሄ።

19 መቱዋ ዎደ አማነተና ኡራን ዘምፕያዌ ቃጽያ ማታን ጮምያዋነ ስሌዳ ገድያን ሀመትያዋ ማላ።

20 ካዮት ኡቴዳ አሳዉ የ የጽያዌ ሜጉዋ ጋላስ ማዩዋ ቃርያዋነ ማዱ ቦላ ጫላባ ትግያዋ ማላ።

21 ነ ሞርኪ ኮሻቶፐ፥ ምዛ፤ ሳመቶፐ፥ ኡሻ።✝ 22 አያዉ ጎፐ፥ ኔን ሄዋ ኦያዌ አ ሁጲያን ታማ ቦንቁዋ ካሺደ ቆልያዋ ማላ። መና ጎዳይካ ነዉ ዎይታና።

23 ዶላሃ ባጋ ጫርኩ እራ አህያዋዳን፥ ዝግርሳይ ሀንቁዋ አዬ።

24 ዋላቀትያ ማቻትና እት ጎልያን ደአናፐ ጎልያ ካሻን ደእያዌ ኬካ።

25 ዳቡሬዳ ኡራይ እርጻ ሃ ኡሺደ አልያዋዳን፥ ሃኮ ቢታፐ ይያ ሎኦ ኦዱ ናሸቼ።

26 ኢታ አሳ ስንን ኩንድያ ጽሎ አሳይ ቡሉቀቴዳ ፑልቱዋነ ባዬዳ ኦላ ሃ ማላ።

27 ዳሮ ኤሳ ምያዌ ሎአ ግደና፤ ሄዋዳንካ፥ ባረ ቦንቹዋ ኮይያዌ ቦንችሰና።

28 ባረ ሁጲያ ናገና አሳይ ድርሳይ መኤዳ ካታማ ማላ።