አጉር ሃሳያ
(30:1-33)
1 ሀዋፐ ካሊደ ጻፈቴዳዌ ያቃ ናአይ አጉር ሃሳዬዳ ሃሳያ። ሄ ብታኒ እቴላስነ ኡካላዉ ሀዋ ሃሳዬዳ። 2 ቱሙ ታን አይ አሳፐካ ቦዛ ዳራይ፤ አሳዉ ደእያ አኬካይ ታዉ ባዋ። 3 ታን አዳ ኤራ ታማራበይከ፤ ጌሻ ጾሳባካ አያነ ኤርከ። 4 ሳሉዋ ፑደ ከሲደ፥ ዱገ ዎዳዌ ኦኔ? ጫርኩዋ ባረ ኩሽያን ኦይቄዳዌ፥ ሃ ባረ አፍላን ዪጬዳዌ፥ ሳኣ ጋጻ አ ሳኣን ሳኣን ዎዳዌ ኦኔ? አነ ኤሮፐ አ ሱን ታዉ ኦዳ። አ ናኣ ኦና ጋይ?
5 ጾሳይ ኦድያ ቃላይ ኡባይ ቱማ፤ ባረኮ ባቃቲደ ብያ ኡባዉ እ ጎንዳለ። 6 አ ቃላ ቦላ አያነ ጉጆፓ፤ ጉጆፐ እ ኔና ሴራና፤ ኔን ዎርዳንቻ ግድያዋካ እ ቆንጭሳና።
7 አቤት መና ጎዳዉ፥ ታን ኔና ላኡባቱዋ ኦቻይ፤ ታን ሀይቃና ጋካናዉ፥ ኡንቱንታ ታና ድጎፓ። 8 ኮይሩዋን፥ ታን አሳ ጭመናዳንነ ዎርዱዋ ሃሳየናዳን ታና ናጋ፤ ላኤንዋን፥ ታዉ ኮሽያ ኬሻ ቁማ እማፐ አትና፥ ታና ዱረ ዎይ ማንቆ ከሶፓ። 9 ሄዌ ዮፐ፥ ዱረ ግዳደ፥ "መና ጎዳይ ኦኔ?" ጋደ ኔና ካዳና፤ ዎይ ማንቆ ግዳደ፥ ዉአና፤ ያታደ ታ ጾሳ ሱን ቦርሳና።
10 ኔና ሸቀና ማላነ እ ሸቂና ነዉ ጎመተና ማላ፥ ቆማ አ ጎዳን ሞቶፓ።
11 ባረንቱ አዎቱዋ ሸቂያነ ባረንቱ አየቱዋ አንጀና አሳቱ ደኢኖ። 12 ዳሮ ቱና ቱን ኡቲደ፥ ባረንታ ጌሻዳን ፓይድያ አሳቱ ደኢኖ። 13 ኦቶሩዋ ኩሜዳ አሳቱነ አሳ ካደ ጼልያ አሳቱ ደኢኖ። 14 ኡንቱንቱ አቻይ ማሻ ማላ ግድና፥ ኡንቱንቱ ጎጎጩካ ጎሎዱዋ ማላ ግድና፥ ህዬሳቱዋነ መቶታንቻቱዋ ናቂደ፥ ኡንቱንቱዋ ቦንቂያ አሳቱ ደኢኖ።
15 ኡላትዉ ላኡ ማጫ ናናቱ ደኢኖ። ኡንቱንቱ፥ "ሀማ! ሀማ!" ያጊደ ዋሲኖ። ኡባካ ካል ኤረና ሄዙባቱ ደኢኖ፤ ኦይደን ቃይ ኡባ፥ "ግዳና" ግ ኤረና።
16 ሄዋንቱካ:
ዱፉዋ፥
ማይነ ማጫ አሳ፥
ሃ ካልስ ኤረና መላ ቢታነ፥
"ታዉ ግዳና!" ግ ኤረና ታማ።
17 ባረ አዉዋ ቅሊጭያ ናኣ አይፍያ፥ ባረ አታ ጭምና ካያ ናኣ አይፍያ፥ ዛንጋራን ደእያ ቁሮቱ ዎጫና፤ አ አሹዋ አንኮቱ ማና።
18 ታና ሄዙባቱ ማላልሲኖ፤ ኦይደን ኡባ ታዉ ገለና።
19 ሄዋንቱካ:
አርጋንይ ሳሉዋና ፓልያ ፓሉዋ፥
ሾሻይ ሹቻ ቦላና ሶሎልያ ሶሎለ፥
ማርካቢ አባ ቦላን ሶልድያ ሶልዱዋነ
ዎዳላይነ ወዶራታ ሲቁዋ ዶምያ ዶመ።
20 ዎሹምያ ምሽራታ ሀንያ ሀኑካ ሄዋ ማላ። አ ሙሳ ማዉ፤ ሽን ሜዳዋፐ ጉይያን፥ ባረ ዶና ቁጫ ድጋደ፥ "ታን አይነ ባይዛበይከ" ያጋዉ።
21 ሄዙ የዎቱዋን ቢታይ ቃጼ፤ ኦይደንዋ ኡባ ቶካናዉካ ዳንዳይቤና።
22 ሄዋንቱካ:
አይሊ ካተቴዳ ዎደ፥
ቦዛይ ካ ካሌዳ ዎደ፥
23 አሳይ እጼዳ ምሽራታ አስና ገሌዳ ዎደነ፥
ማጫ ቆማታ ባረ ጎዳቶ ላቴዳ ዎደ መትያ ሀኖታ።
24 ሳኣ ቦላ ኦይዱ ጉ መታቱ ደኢኖ፤ ሽን ኡንቱንቱ ሎይ አዳ ኤራንቻ።
25 ሄዋንቱካ:
ጩንጫለቱዋ፥ ጩንጫለቱ ዎልቃይ ባይና መታ፤
ሽን ባረንቶ ምያዋ ቦንያን ሺሺደ፥ ምንጂኖ።
26 ጉፓለቱዋ፥ ጉፓለቱ ጉ ዎልቃይ ደእያዋንታ፤
ሽን ባረንቱ ጎልያ ሹቻ ጎንጎሉዋን ኬጺኖ።
27 ቦለቱዋ፥ ቦለቶ ካቲ ባዋ፤
ሽን ኡንቱንቱ ኡባይካ ማራን ዛቲኖ።
28 ዛራቱዋ፥ ዛራቱ ኩሽያን ኦይቂናካ ኦይቀቲኖ፤
ሽን ኡንቱንቱ ሀራይ አትና፥ ካትያ ጎለንካ ደኢኖ።
29 ባረንቱ ማታ በሲደ ሀመትያ ሄዙ መታቱ ደኢኖ፤ ኦይደንካ ሎኦ ሄመታ ሀመቴ።
30 ሄዋንቱካ:
ዶኣ ኡባፐ ምንያነ ያዪደ ባቃት ኤረና ጋሙዋ፤
31 አየቱዋ ግዶን አዪደ ሀመትያ አዉረ ኩቱዋ፥
ዴሻ ኦርግያነ፥
ባረ ኦላንቻቱዋ ግዶን ኤቂያ ካትያ።
32 ኔን ቦዛደ ኦቶረቴዳዋ ግዶፐነ፥ ኢታባ ኦናዉ ሀልቼዳዋ ግዶፐ፥ አነ ታክ ጋደ ቆፓ።
33 ማ ቡክያዌ ኦይሳ ከስያዋዳን፥ ሲያ ይምፕያዌካ ሱ አህያዋዳን፥ ሄዋዳን ሀንቁዋ ደንያዌ ዋላሳ አዬ።