ጭንጫተፐ ቤትያ ጎኣ
1 ታ ናቶ፥ ህንተ አቡ ዞርያ ስስተ፤ ሎይ ሀይዝተ፤ ያቶፐ፥ ህንተ አኬካና። 2 ታን ህንተዉ ሎኦ ትምርትያ እምያ ድራዉ፥ ታ ትምርትያ አጎፕተ። 3 ታን ታ ሁጲያንካ ታ አቦ ናኣ፤ ታ አትዉካ አ ሲቅያ መጽ እት ናኣ። 4 ታ አቡ ታና ታማርሲደ፥ ሀዋዳን ያጌዳ፤ "ታን ኦድያዌ ነዉ ገሎ፤ ታ አዛዙዋ ናጋ፤ ያቶፐ፥ ኔን ፓጻ ደአና። 5 አዳ ኤራተነ አኬካ ደማ፤ ታን ነዉ ኦዴዳዋ ዶጎፓ፤ ታ ቃላፐ ከሶፓ። 6 አዳ ኤራተዉ ዞክያ ዛሮፓ፤ አያዉ ጎፐ፥ እ ኔና አሻና፤ አ ሲቃ፤ እ ኔና ናጋና። 7 አዳ ኤራተይ ኡባፐ አያ ድራዉ፥ አዳ ኤራተ ደማ። አኬካይ ነ ደእያዋ ኡባ ዉርስ አኮፐካ አ ደማ። 8 ኔን አ ቦንቻ፤ እካ ኔና ቁ ቁ ኦና፤ ኔን አ ኦይቆፐ፥ እ ኔና ቦንቻና። 9 እ ነ ሁጲያን ሳባ ካላቻ ዎና፤ ቦንቾ ካላቻ እማና" ያጌዳ።
10 ታ ናአዉ፥ ስሳ፤ ታን ግያዋካ አካ፤ ነ ደኡዋ ላይይካ አዱቃና። 11 ታን ኔና አዳ ኤራተ ኦግያ ካለና፤ ሱረ ሎሱዋናካ አፋና። 12 ኔን ሀመትያ ዎደ፥ ነ ሀመትያሳን ቢያዌ ደኤና፤ ዎጾፐካ በታካ። 13 ታማሬዳዋ ሀሳያ፥ የዶፓ፤ ትምርቲ ነዉ ደኡዋ ግዴዳ ድራዉ፥ ሎይ ናጋ። 14 ናጋራንቻቱዋ ኦግያ የፓ፤ ኢታ አሳቱዋ ኦግያንካ ሀመቶፓ፤ 15 አፐ ሃካ፤ አን ሀመቶፓ፤ አፐ ጉየ ስማ፤ ያታደ ነ ኦግያን ባ። 16 አያዉ ጎፐ፥ ኡንቱንቱ ኢታባ ኦና ጋካናዉ፥ ገምእሻናዉ ዳንዳይክኖ፤ ኡንቱንቱ አሳ በናን ኡንቱንታ ገምእሹ አፈና። 17 ኡንቱንቱ ናጋራ ኡክዳን ሚኖ፤ ሱገ ኦሱዋካ ኡሻዳን ኡሺኖ።
18 ጽሎቱዋ ኦጊ ሴታ ጋላሳይ ጋካናዉ፥ ጉጅ ጉጅ ፖእያ ዎንታ ጻልቂያ ማላ። 19 ሽን ናጋራንቻቱዋ ኦጊ ጵ ጎ ማ ማላ፤ ኡንቱንቱ ዎት በትንቶካ ኤርክኖ።
20 ታ ናአዉ፥ ታን ኦድያዋ ስሳ፤ ታን ኦድያዋካ ሎይደ ሀይዛ። 21 ታን ኦዴዳባቱ ነ አይፍያፐ ጌሞፕኖ፤ ኡንቱንታ ነ ዎዛናን ዎ። 22 አያዉ ጎፐ፥ ኡንቱንታ ደምያ አሳዉ ኡባዉ ደኡዋ እሚኖ፤ ኡንቱንቱ ቦላዉካ ፓጻተ እሚኖ። 23 ኡባባፐካ ነ ዎዛና ምንሳደ ናጋ፤ አያዉ ጎፐ፥ ደኡ አፐ ፑልቴ። 24 ነ ዶናፐ ገነ ሃሳያ ድጋ፤ ዎርዶ ሃሳያ ነ ዶናፐ ድጋ። 25 ስት ጋደ ስንዉ ጼላ፤ ነ አይፊ ነ ስንን ደእያዋ ትሽ ኦደ ጼሎ። 26 ነ ገድያዉ ሀመትያ ኦግያ ሱርሳ፤ ሱረ ኦግያ ጻላላን ሀመታ።4:26 እብራ. 12:13 27 ሱረ ኦግያፐ ኡሸቻ ሀድርሳ ጎፓ፤ ነ ገዲ ኢታሳ ቤናዳን ናጋ።