ጾሳዉ ኦናዳን ኑን ዋኒደ ደአናዉ በሲ?
1 ስም ታናዳን አማንያዋንቶ፥ ህንተ ህንተ ኦናተ ጾሳ ናሸችያ ደኦነ ጌሻ ያርሹዋ ኦደ፥ ጾሳዉ ሺሻናዳን፥ ታን ህንተንታ ጾሳ ማሮተን ዎሳይ፤ ጾሳዉ ህንተ ጎይናናዉ በስያ ቱሙ ኦጊ ሄዋ። 2 ጾሳይ ህንተ ቆፋ ኡባና ዱማዪደ፥ ህንተንታ ላሞፐ አትን፥ ሀ አላምያ አሳ ማላቶፕተ። ሄ ዎደ ህንተ፥ ጾሳ ሸኒ፥ ሎኦባይ፥ አ ናሸችያባይነ ቃይ ፖሎ ግዴዳባይ አየንቶ ኤራንታ።
3 ጾሳይ ታዉ እሜዳ አ ኬካተን ታን ህንተንቶ ኦዳይ። ህንተንቱ ቆፓናዉ በስያዋፐ አደ፥ ኦቶሩዋን ቆፖፕተ፤ ሄዋ አጊደ፥ ዎዛናማ አሳዳን ቆፕተ፤ ጾሳይ ህንተንቶ ሁጲያን ሁጲያን እሜዳ አማኑዋ ኬናን ህንተ ቦላ ፕርድተ። 4 ኑ እት ቦላ ግዶን፥ ጮራ ቦላ ቆሞቱ ደኢኖ፤ ሄ ቆሞቱዋ ኡባዉካ ዱማ ዱማ ኦሱ ደኤ። 5 ሀዋዳን፥ ኑን ጮራ አሳ ግዶፐካ፥ ክርስቶሳ ባጋና እት አሳ። ቃይ ኑን እት አሳተ ቆሞቱዋዳን፥ እቱ እቱዋና ኦይቀት ኡቴዶ። 6 ጾሳይ ኑዉ እሜዳ አ ኬካተን ዱማ ዱማ እሞታይ ደኤ። ኑ እሞታይ ናበተ ግዶፐ፥ ኑዉ ደእያ አማኑዋ ኬና ኦዳናዉ በሴ። 7 ሀራቱዋ ማዱሳ ግዶፐ፥ ሄ ኦሱዋን ምናናዉ በሴ፤ ታማርሱሳ ግዶፐ፥ ሄ ታማርሱዋን ምናናዉ በሴ። 8 ሀራ አሳቱዋ ምንሱሳ ግዶፐ፥ ሄ ኦሱዋን ምናናዉ በሴ። ባረ ሁጰዉ ደእያባፐ ሀራቶ እምያ ኦንነ ዎዛናፐ እሞ። ማታይ ደእያ ኡራይ ምንስ ኦናዉ በሴ፤ ሀራቶ ኬክያ ኡራይ ናሸቻን ኬካናዉ በሴ።
9 ህንተንቱ ሲቁ አሳ በሳናዉ ሲቀትያዋ ግዳናዉ በሰና። ኢታባ እጽተ፤ ሎኦባ ምንሲደ ኦይቂተ። 10 እቱ እቱዋና እሻቱዋዳን ሲቀትተ፤ እቱ እቱዋ ቦንችያዋን ናሸትተ። 11 ምኒደ ኦተ፤ አዛሎፕተ፤ ህንተ ኩመን ዎዛናፐ ጎዳዉ ኦተ።12:11 ኩመን ዎዛናፐ ጎዳዉ ኦተ፦ ጌሻ አያናን ካለሰቲደ ኪተትያዋንታ ግድተ። 12 ጾሳይ ህንተንቶ እማና ጌዳዋን ናሸትተ፤ ዋይያን ገንጭተ። ኡባ ዎደ ጾሳ ዎስተ፤ 13 ጾሳ አሳቱዋ ኮሽያባን ማድተ፤ እማ ሞክተ።
14 ህንተንታ የደርስያዋንታ አንጅተ፤ ኡንቱንታ አንጅተፐ አትን፥ ሸቆፕተ። 15 ናሸትያዋንቱና ናሸትተ፤ ዬክያዋንቱናካ ዬክተ። 16 አሳ ኡባዉ እት ማላ ቆፋ ቆፕተ፤ ኦያባን ኡባን ህንተንታ ቶቺደ ደእተፐ12:16 ህንተንታ ቶቺደ ደእተ፦ አሽከ ግድተ ጉሳ። አትን፥ ኦቶረቶፕተ፤ ህንተንታ ህንተረካ አ ኤራንቻ ጊደ ቆፖፕተ።12:16 ሌም. 3:7
17 ኦንነ ህንተንቶ ኢታባ ኦፐ፥ ሄ ኡራዉ ኢታባ ኦ ዛሮፕተ፤ አሳ ኡባዉ ሎኦባ ኦናዉ ቆፕተ። 18 አሳ ኡባና ሳሮተን ደአናዉ፥ ህንተ ባጋና፥ ህንተንቶ ዳንዳየቴዳባ ኡባ ኦተ። 19 ታናዳን አማንያዋንቶ፥ ህንተ ህንተ ሁጰዉ አሳዉ ሀሉዋ ከሶፕተ። ጾሳይ ሀሉዋ ከሳናዳን፥ አ ቦላ ኦልተ። አያዉ ጎፐ፥ ጾሳ ማጻፋይ፥
"ጎዳይ፥ ‘ታን ሀሉዋ ከሳና፤
ታን ኩሽያ ጭጋና’ ጌ"
ያጌ።12:19 ዛረ. 32:35
20 ሽን ጾሳ ማጻፋይ፥
"ነ ሞርኪ ኮሻቶፐ፥ ምዛ።
ሳመቶፐ፥ ኡሻ።
አያዉ ጎፐ፥ ኔን ሄዋ ኦያዋን፥
አ ዳርሳ ዬላያሳ"
ያጌ።12:20 ሌም. 25:21-22
21 ኢታባ ሎኦባን ጾናፐ አትን፥ ኢታባይ ኔና ጾኖፖ።