ሮመ 9

ጾሳይ ካሰ ዶሬዳ እስራኤልያ አሳ

1 ታን ቱሙዋ ሃሳያይ፤ ታን ክርስቶሳሳ፤ ቃይ ዎርዶትከ። ጌሻ አያናይ ሞድያ ታ ትላ ዎዛናይ ታን ዎርዶተናዋ ታዉ ማርካቴ። 2,3 ታዉ አሹዋን ዛረ ግድያ ታናዳን አማንያዋንቶ፥ ታ ዎዛናን ዳሮ ቃረታይነ አገና ቆፋይ ደኤ። አያዉ ጎፐ፥ ታን ታ ሁጰዉ ኡንቱንቱ ድራዉ፥ ጾሳ ሸቃፐ ጋርሳና ደኣርክታሻ! ቃይ ክርስቶሳፐካ ሻከታርክታሻ! 4 ኡንቱንቱ እስራኤልያ አሳቱዋ፤ ጾሳይ ኡንቱንታ ባረ ናና ኦደ፥ ባረ ቦንቹዋ ኡንቱንቱና ሻኬዳ። ኡንቱንቱና ቃላ ገሊደ፥ ህግያ ኡንቱንቶ እሜዳ። ኡንቱንቱ ጾሳዉ በስያ ኦግያን ጎይኒኖ፤ ቃይ ጾሳይ እማና ጌዳዋካ አኬድኖ።✝9:4 ከሳ 4:22 5 ኡንቱንቱ ዘረን ካሰ አዎቱዋ ዛረ፤ ቃይ ክርስቶስካ አሹዋን ኡንቱንቱ ዛረ። እ፥ ኡባፐ ቦላ ግዲደ ሞድያ፥ መናዉ ጋላተቴዳዌ ጾሳ። አመንእ።

6 ሽን ታን፥ "ጾሳይ እማና ጌዳዌ አታና" ያግከ። አያዉ ጎፐ፥ እስራኤልያ አሳ ኡባቱ ጾሳይ ዶሬዳዋንታ ግድክኖ። 7 ቃይ አብራሃመ ዘረቱ ኡባቱ ጾሳ ናና ግድክኖ። ጾሳይ አብራሃሞ፥ "ነ ዘረይ ይሳቃ ባጋና ጼሰታናዋ" ያጌዳ።✝9:7 ዶመ 21:12 8 ሄዋ ጉሳይ ኡንቱንቱ ጾሳይ እማና ጌዳ ኦግያን የለቴዳ ናናይ ዛርያዳን ፓይደታና፤ ሽን አሳ ቆፋዳን የለቴዳዋንቱ ጾሳ ናና ግድክኖ ጉሳ። 9 አያዉ ጎፐ፥ ጾሳይ እማና ጊደ ሃሳዬዳዌ ሀዋ፤ "ታን ሀ ጌተቴዳዋዳን ሄ ዎደ ያና፤ ሳራካ አቱማ ናኣ የላና" ያጌዳ።✝9:9 ዶመ 18:10

10 ሄዋ ጻላላካ ግደና፤ እርቢቃ የሌዳ ማንተ ናና አዉ እቱዋ፤ እካ ኑ አዉዋ ይሳቃ። 11,12 ሽን እት ናኣ ዶሬዳ ጾሳይ ባረ ሁጰዉ ቆፔዳዋ ግዳናዳን፥ ጾሳይ እርቢቅዉ፥ "ባይራይ ቴፋዉ አዛዘታና" ያጌዳ፤ እ ሄዋ ኡንቱንቱ የለታናፐነ ኢታባ ዎይ ሎኦባ አይነ ኦናፐ ካሰና ጌዳ። ሄዋ ድራዉ፥ ጾሳ ዶሩ አ ጼሴዳዋዳንፐ አትን፥ ኡንቱንቱ ኦዳዋና ግደና።✝9:11-12 ዶመ 25:33 13 ጾሳ ማጻፋይ፥ "ያቆባ ሲቃድ፤ ሽን ኤሳ እጻድ" ያጌ።

14 ያትና፥ ኑን ዋጋኔ? ጾሳይ ደሽሲደ ፕርዲ? ሄዋ ግደና። 15 አያዉ ጎፐ፥ ሙሴዉ እ፥

"ታን ማራናዉ ኮይያዋንታ ማራና፤

ቃይ ቃረታናዉ ኮይያዋንቶካ ቃረታና"

ያጌዳ።✝9:15 ከሳ 33:19 16 ስም ጾሳይ አሳ ማርያዌ እ ማራናዉ ኮይያ ድራሳፐ አትን፥ አሳይ ኮይያ ዎይ ኦያ ድራሳ ግደና።

17 አያዉ ጎፐ፥ ጾሳ ማጻፋይ ግብጼ ካትያዉ፥ "ታን ታ ዎልቃ ኔናን በሳናዉነ ታ ሱንይ አላምያ ኡባን ኦደታናዉ፥ ሄዎ ታን ኔና ካዉድ" ያጌ።✝9:17 ከሳ 9:16 18 ስም ጾሳይ ማራና ኮይያዋ ማሬ፤ ቃይ ዎዛና ጎርዳና ኮይያዋ ዎዛና ጎርዴ።

ጾሳ ሀንቁዋነ ማሮታ

19 ስም ህንተ ታና፥ "ሄዌ ቱማ ግዶፐ፥ ጾሳይ አሳ ባይዞ አያዉ ቶሺ? ጾሳይ ጌዳዋ እጻድ ጋናዌ ኦኔ?" ያጋናዉ ዳንዳዪታ።

20 ሽን ታ ላገዉ፥ ጾሳዉ ዛራናዉ ኔን ኦኔ? ኡርቃፐ መቴዳ ሚሻይ ጉየ ዛሪደ ባረና መዳዋ፥ "ታና ሀዋዳን አያዉ መዲ?" ጊደ ኦቻናዉ ዳንዳዪ?✝9:20 ኢሳ. 29:16፤ 45:9 21 ዎይ ኡርቃ መያዌ ባረ መያ ኡርቃ ባረ ኮይያዋዳን ኦናዉነ እት ማላ ኡርቃፐ እቱዋ ቦንቾ ሚሻ ኦደ፥ ቃይ እቱዋ ቶሸቴዳ ኦሱዋ ኦያ ሚሻ ኦደ መናዉ አዉ ማት ባዌ?

22 ጾሳይ ኦዳዌ ሀዋና እቱዋ። እ ባረ ሀንቁዋ በሳናዉነ ባረ ዎልቃ ኤርሳናዉ ኮዬዳ፤ እ ባረ ሀንቁዋን ፕርዳናዋንታ፥ ባይዛናዉ ጊግ ኡቴዳዋንታ፥ ዳሮ ገንጩዋን ዳንዳዬዳ። 23 ቃይ እ ማሬዳዋንቶ፥ ባረ ቦንቹዋ አካናዉ ጊግስ ዎዳዋንቶ እ አይ ኬና ቦንቼትንቶነ በሳናዉ ኮዬዳ። 24 ኑን እ ጼሴዳዋንታ፤ ሽን አይሁዳ አሳ ጻላላፐ ግደናን፥ አይሁዳ ግደና አሳ ግዶፐካ ጼሴዳ።

25 ሆሰአ ማጻፋን እ ግያዌ ሀዋ፤

"ታ አሳ ግደናዋንታ፥

‘ታ አሳ’ ጋደ ጼሳና።

ታን ሲቃቤና ዛርያካ፥

‘ታ ሲቃቶ’ ጋደ ጼሳና።✝9:25 ሆሰ 2:23

26 ‘ህንተንቱ ታ አሳ ግድክታ’ ግያዋ፥

ኡንቱንቱ ስሴዳ ሄ ሳኣን፥

ኡንቱንቱ፥ ‘ደኡዋ ጾሳ ናና’ ጌተቲደ ጼሰታናዋንታ"

ያጌ።✝9:26 ሆሰ 1:10 27 እስያስ እስራኤልያ አሳባ ያጊደ ሃሳዬዳ፤

"እስራኤልያ አሳይ አባ ማታን

ደእያ ሻፍያ ኬና ግዶፐካ፥

ኡንቱንቱፐ አማሬዳዋንቱ ጻላላይ አታና።✝9:27-28 ኢሳ. 10:22-23

28 አያዉ ጎፐ፥

ጎዳይ ሳኣ ቦላን ደእያ አሳ ኡባ ቦላ፥

ኤለካ ፕርዳና"

ያጌዳ። 29 እስያስ ካሰቲደ፥

"ኡባፐ ዎልቃማ ጎዳይ፥

ኑዉ አማሬዳ ዘረ አሸነንቶ፥

ኑን፥ ሶዶማ ካታማዳንነ፥

ጋሞራ ካታማዳን ሀኔዶሽን"

ያግ ሃሳዬዳ።✝9:29 ኢሳ. 1:9

30 ያትና፥ ኑን ዋጋኔ? ጽሎተ ኮይቤና አይሁዳ ግደና አሳይ አማኑዋን ጽሌዳ፤ 31 ሽን እስራኤልያ አሳይ ባረንታ ጽልስያ ህግያ ኮዬዳዋንቱ ሄ ህግያ ደምበይክኖ። 32,33 አያዉ ደምበይክኖ? ኡንቱንቱ ኦሱዋናፐ አትን፥ አማኑዋን ጽሎተ ኮይቤና ድራሳ። ኡንቱንቱ ጾሳ ማጻፋይ፥

"አኬክተ፤ ታን ጽዮነን አሳ ቢያ ሹቻ፥

ኡንቱንቱ ኦግያን ዛላ ዎና።

ሽን አን አማንያ ኦንነ ዬላተና"

ያጊደ ጻፈቶዋዳን ቢያ ሹቻን በቴድኖ።✝9:32-33 ኢሳ. 28:16