Romanos 2

ጾሳ ፕርዳ

1 ሄዋ ድራዉ፥ ኔኖ ሀራንቱ ቦላ ፕርድያዎ፥ ነዉ ጋሶይያባይ ባዋ፤ አያዉ ጎፐ፥ ኔን ሀራንቱ ቦላ ፕርዳደ፥ ሄ ኔን ኡንቱንቱ ቦላ ፕርድያዋ ማላ ኦፐ፥ ነ ቦላ ፕርዳሳ። 2 ኑን ሀዋ ማላ ኦሱዋ ኦያዋንቱ ቦላ ጾሳይ ጽሎ ፕርዳ ፕርድያዋ ኤሬቶ። 3 ኔኖ፥ ሀዋ ማላ ኦሱዋ ኦያዋንቱ ቦላ ፕርድያዎ፥ ቃይ ሄ ኔን ፕርድያዋ ማላ ኦያዎ፥ ኔን ጾሳ ፕርዳፐ አትያዋ ማላቲ? 4 ዎይ ጾሳ ዎልቃማ ኬካተ፥ ገንጩዋነ ዳንዳያ ካይሻ? ጾሳይ ኔና ናጋራፐ ዛራናዉ ኮይያ ድራዉ፥ እ ኬካ ግድያዋ ኔን ኤራሳ።

5 ሽን ህንተንቶ ጉዙማ ዎዛናይነ ናጋራፐ ስመና ዎዛናይ ደኤ፤ ሄዋ ድራዉ፥ ጾሳ ሀንቁነ ጽሎ ፕርዳይ ቆንጭያ ጋላስ፥ ኔን ነ ቦላ ሀንቁዋ ካሰዋፐ ዳርሳሳ። 6 ጾሳይ አሳ ኡባዉ አ ኦሱዋ ማላ እማናዋ።✝2:6 ማዝ. 62:12፤ ሌም. 24:12 7 እት እት አሳቱ ሎኦባ ዳንዳያን ኦኖ፤ ቃይ ጋላታ፥ ቦንቹዋነ ባየና ደኡዋ ኮዪኖ፤ ኡንቱንቶ ጾሳይ መና ደኡዋ እማና። 8 ሽን ሀራንቱ ኢታባ ኦናዉ ያረቲኖነ ቱማተ እጺኖ፤ ጾሳይ ኡንቱንቱ ቦላ ባሻነ ሀንቁዋ የዳና። 9 ኢታባ ኦያ አሳይ ኡባይ መቶታናነ ዋየታና፤ ሄዌ ካሰቲደ፥ አይሁዳ አሳ ጋካና፤ ሄዋፐ ቃይ አይሁዳ ግደና አሳ ጋካና። 10 ሽን ጾሳይ ሎኦ ኦሱዋ ኦያ ኡባቶ ጋላታ፥ ቦንቹዋነ ሳሮተ እማና። ካሰቲደ አይሁዳቶ እማና፤ ሄዋፐ ቃይ አይሁዳ ግደናዋንቶ እማና። 11 አያዉ ጎፐ፥ ጾሳ አይፍያን አሳይ ኡባይ እት ማላ።✝2:11 ዛረ. 10:17

12 ሙሴ ህጊ ባይናን ናጋራ ኦዳ ኡባይ ህጊ ባይናን ያና። ሙሴ ህጊ ደእሽን፥ ናጋራ ኦዳ ኡባይ ህግያን ፕርደታና። 13 አያዉ ጎፐ፥ ጾሳ ስንን ህግያ ናግያዋንቱ ጽሊኖፐ አትን፥ ህግያ ስስያዋንቱ ጽልክኖ። 14 አይሁዳ ግደና አሳዉ ህጊ ባዋ፤ ሽን ባረንቱ ትላ ቆፋን ህጊ አዛዝያዋ ኦኖ፤ ኡንቱንቶ ህጊ ዮፐካ፥ ኡንቱንቱ ባረንቱ ሁጰዉ ህገ። 15 ህጊ አዛዝያዌ ኡንቱንቱ ዎዛና ግዶን ጻፈቴዳዋ ኡንቱንቱ ሀኖታይ በሴ፤ እት እት ካላ ኡንቱንቱ ትላ ቆፋይ ኡንቱንቶ ማርካትያ ድራዉነ ቃይ እት እት ካላ ኡንቱንቱ ቆፋይ ኡንቱንታ ሞትያ ድራዉ፥ ዎይ ቃይ ኡንቱንቱና ጋዳትያ ድራዉ፥ ሄዌ ቱማ ግድያዋ ኤርሴ። 16 ታን ታማርሴዳ ምሽራቹዋ ቃላዳን፥ አሳ ዎዛናን ጌሜዳ ቆፋ ጾሳይ የሱስ ክርስቶሳ ባጋና ሀዋዳን ፕርዳና።

አይሁዳቱዋነ ሙሴ ህግያ

17 ሽን ኔን ኔና አይሁዳ ጋሳ፤ ህግያን ዘምፓደ ጾሳን ጬቀታሳ። 18 ኔን ኦና ማላ፥ ጾሳይ ኮይያዌ አየንቶ ኤራ፤ ቃይ ቱማ ግድያዋ ዶራናዉ ህግያፐ ታማራዳ። 19,20 ኔን ቆቃቱዋ ካለያዋ፥ ቃይ ማን ደእያዋንቶካ ፖእስያዋ፥ ኤረናዋንታ ኤርስያዋነ ናናቱዋ ታማርስያዋ ግድያዋ ኤራድ፤ ህግያፐ ኔን ኩመን ኤራተነ ቱማተ ደምያዋ ኤራሳ። 21 ያትና፥ ኔን ሀራቱዋ ታማርስያዌ ኔና ነ ሁጰዉ አያዉ ታማርስኪ? ኔን፥ "ዉኦፓ" ያጋደ ቃላ ኦዳሳ። ሽን ኔን ነ ሁጰዉ ዉአይየ? 22 ኔን፥ "ዎሹሞፓ" ያጋ። ሽን ኔን ነ ሁጰዉ ዎሹማይ? ኔን ኤቃ ሸነታ። ሽን ኤቃይ ደእያ ጎልያ ቦንቃይ? 23 ጾሳ ህጊ ነዉ ደእያ ድራዉ፥ ኔን ጬቀታሳ፤ ሽን ሄ ህግያ መንደ ጾሳ ዬላያይ? 24 አያዉ ጎፐ፥ ጾሳ ማጻፋይ፥ "አይሁዳ አሳቶ፥ ህንተ ጋሱዋን አይሁዳ ግደና አሳቱዋ ግዶን ጾሳ ሱንይ ባዬ" ያጌ።✝2:24 ኢሳ. 52:5

25 ኔን ህገዉ አዛዘቶፐ፥ ነ ቃጻራይ ማዱዋና ደኤ፤ ሽን ኔን ህግያ መንፐ፥ ኔን ቃጻረቴዳዌ ቃጻረትቤናዋዳን ፓይደቴ። 26 አይሁዳ ግደና አሳይ ቃጻረተናን ህጊ አዛዝያዋ ናጎፐ፥ ጾሳይ አ ቃጻረቴዳዋዳን ፓይደኔ? 27 ህንተንቱ፥ አይሁዳ አሳቱ፥ ህንተንቶ ጻፈቴዳ ህጊ ደኦፐካ ቃይ ህንተ ቃጻረቶፐካ፥ ህግያ ህንተ መንያ ድራዉ፥ አይሁዳ ግደና አሳይ ቦላ ቃጻረታና ዮፐካ፥ ህገዉ አዛዘቲደ፥ ህንተ ቦላ ፕርዳና።

28 አያዉ ጎፐ፥ አይሁዳ አሳ ማላትያ ኡባይ ቱሙ አይሁዳ አሳ ግደና፤ ቃይ አሳይ ባረ አሹዋ አሳተ ቃጻረቴዳ ድራዉ፥ ቱሙ አይሁዳ አሳ ግደና። 29 ሽን ቱሙ አይሁዳ አሳ ግያ ኡራይ ጋርሳ ባጋና አይሁዳ አሳ*2:29 አይሁዳ ጉሳይ ጋላተትያዋ ግዲደ ሱንይ ይሁዳፐ ዬዳ። ግዴዳዋ፤ ቃጻረትያዋ ጾሳ አያናን ኦሰትያ ዎዛና ቃጻራፐ አትን፥ ጻፈቴዳ ህግያና ግደና፤ ሄ ኡራይ ባረ ጋላታ ጾሳፐ አክያዋፐ አትን፥ አሳፐ አክቤና።✝2:29 ዛረ. 30:6