1 ያትና፥ ኑን ዋጋኔ? ጾሳ አ ኬካተይ ዳራናዳን፥ ናጋራን ምኒደ ደአኔ? 2 ግደና፤ ኑን ናጋራ ኦና ማላ ሀይቂድጌዶ። ያትና፥ ኑን ሀዋፐ ስንዉ ዎት አ ግዶን ደአኔ? 3 ዎይ ኑን ኡባቱ ክርስቶሳ የሱሳና እትፐ ግዳናዉ፥ ጻማቀቴዳ ዎደ፥ አ ሀይቁዋንካ አናና እትፐ ግዳናዉ ጻማቀቴዳዋ ኤርክቴ? 4 ሄዋ ድራዉ፥ ክርስቶስ ባረ አዉዋ ቦንቾ ዎልቃን ሀይቁዋፐ ደንዶዋዳን፥ ኑንካ ኦራ ደኡዋ ደአናዉ፥ አ ሀይቁዋ አናና ሻካናዉ ጽንቃታን አናና እትፐ ሞገቴዶ።

5 አያዉ ጎፐ፥ ኑን እ ሀይቄዳዋዳን ሀይቂደ፥ አናና እቱዋ ግዶፐ፥ ሀዋዳንካ፥ ሀይቁዋፐ እ ደንዶዋዳን ኑንካ ደንዲደ፥ አናና እቱዋ ግዳና። 6 ኑን ሀዋፐ ስንዉ ናጋራዉ አይለ ግደና ማላ፥ ቃይ ኑ ናጋራንቻ አሳተ ዎልቃይ ያና ማላ፥ ኑ ኤጫ አሳተ ክርስቶሳና ማስቃልያ ቦላ ምስማርያን ሸት ካቀቴዳዋ ኤሬቶ። 7 አያዉ ጎፐ፥ እት ኡራይ ሀይቂያ ዎደ ናጋራ ዎልቃይ አ ሞደና፤ ሽን 8 ኑን ክርስቶሳና ሀይቄዳዋ ግዶፐ፥ አናና ቃይ ደአናዋ አማኔቶ። 9 አያዉ ጎፐ፥ ክርስቶስ ሀይቁዋፐ ደንዴዳዋ፥ ቃይ ላኤንዋ እ ሀይቀናዋነ ሀይቁ ስንፐ አ ሞደናዋ ኑን ኤሬቶ። 10 እ እት ካላካ ሀይቄዳ፤ ናጋራዉ አ ቦላ ዎልቃይ ባዋ፤ ሽን እ ሀ ደእያ ደኡዋ ጾሳዉ ደኤ። 11 ሀዋዳን ቃይ ህንተ ናጋራ ኦናዳን፥ ህንተንታ ሀይቄዳዋዳን ቆፕተ፤ ሽን ጎዳ ክርስቶሳ የሱሳ ባጋና ጾሳዉ ህንተ ፓጻ ደእያዋዳን፥ ህንተንታ ቆፕተ።

12 ሄዋ ድራዉ፥ ህንተ ህንተንቱ አሳተ አሞ አዛዘታና ማላ፥ ናጋራይ ሀይቂያ ህንተ አሳተ ሞዶፖ። 13 ቃይ ህንተ አሳተፐ እት ሳነ ኢታ ኦሱዋ ኦናዉ ናጋራዉ እሞፕተ፤ ሽን ሀይቁዋፐ ደንዴዳ አሳዳን ህንተንታ ጾሳዉ እምተ፤ ቃይ ህንተ ኩመን አሳተካ ጽሎ ኦሱዋ ኦናዉ ጾሳዉ እምተ፤ 14 አያዉ ጎፐ፥ ናጋራይ ህንተንታ ሞዳናዉ ዳንዳየና፤ ህንተ ጾሳ አ ኬካተ ጋርሳና ደኢታፐ አትን፥ ህግያፐ ጋርሳና ደእክታ።

15 ያትና፥ ዋናኔ? ጾሳ አ ኬካተ ጋርሳና ደኢኖፐ አትን፥ ህግያፐ ጋርሳና ደኤና ድራዉ፥ ናጋራ ኦኔ? ግደና፤ 16 ህንተ ህንተንታ እት ኡራዉ አዛዘታናዉ፥ አይልያዳን ኦደ እምያ ዎደ፥ ሄ ህንተንታ አዛዝያዎ አይለቱዋ ግድያዋ ኤሪታ፤ ዎይ ህንተ ህንተንቶ ሀይቁዋ አህያ ናጋራዉ ኤኖ ጊታ፤ ዎይ ህንተ ህንተንታ ጽሎ ኦያ አዛዞ ኤኖ ጊታ። 17 ሽን ጾሳዉ ጋላታይ ግዶ፤ አያዉ ጎፐ፥ ናጋራዉ ካሰ ህንተ አይለ፤ ሽን ጉየፐ ህንተ አኬዳ ትምርትያ ግዶን ደእያ ቱማተዉ ህንተ ኩመን ዎዛናፐ አዛዘቴድታ። 18 ህንተንቱ ናጋራ አይለተፐ ከሲደ፥ ጽሎተዉ አይለ ግዴድታ።

19 ህንተንቱ መታን ዳቡራንቻ ግድያ ድራዉ፥ ታን ኦስካ ገልያ ሃሳያ ሃሳያይ፤ ህንተ ካሰ ህንተ ኩመን አሳተ ናቁዋ ኦናዉ፥ ቱናተዉነ ናቆ አይለ ኦደ እሜድታ፤ ሀእ ሄዋዳንካ ህንተ ኩመን አሳተ ጌሻባ ኦናዉ፥ ጽሎተዉ አይለ ኦደ እምተ።

20 ህንተንቱ ናጋራዉ አይለቲደ ደእያ ዎደ፥ ጽሎተይ ህንተንቶ ጎዳ ግደና። 21 ህንተንታ ሀእ ዬላይያ የዋቱዋ ሄ ዎደ ኦዳዋፐ አይ ማዱዋ ደሜድቴ? አያዉ ጎፐ፥ ሄ የዋቱዋ ዉርሰይ ሀይቁዋ። 22 ሽን ናጋራ አይለተፐ ህንተ ከሲደ፥ ጾሳዉ ኤኖ ጌድታ፤ ቃይ ህንተ ኦያ ኡባባን ህንተንታ ኡባካ አዉ አደ እሜድታ። ሄዌ ህንተንቶ ዎረ፤ ሄዋ ዉርሰይ መና ደኡዋ። 23 አያዉ ጎፐ፥ ናጋራ ጋቲ ሀይቁዋ። ሽን ጾሳይ ኑ ጎዳ ክርስቶሳ የሱሳ ባጋና እምያ እሞታይ መና ደኡዋ።