1 ታናዳን አማንያዋንቶ፥ ህንተንቱ ኡባይ ህግያ ኤርያ ድራዉ፥ ታን ግያዋ ሎይ ኤሪታ፤ ህጊ እት አሳይ ፓጻ ደኤዳ ዎደ ጻላላን አ ሞዴ። 2 አያዉ ጎፐ፥ አስና ገሌዳ ምሽራታ እዝ አስናይ ፓጻ ደኤዳ ኬናን፥ ህግያን አናና ቃሸታ ኡታዱ፤ ሽን እዝ አስናይ ሀይቆፐ፥ አናና ጫቄዳ ህጊ እዞ ሞደና። 3 ሄዋ ድራዉ፥ እዛ ባረ አስናይ ፓጻ ደእሽን፥ ሀራ አቱማዋ ገሎፐ፥ አሳይ እዞ፥ "ዎሹመዉኖ" ጋና። ሽን እዝ አስናይ ሀይቆፐ፥ ህጊ እዞ ሞደና፤ እዛ ሀራ አስና ገሎፐነ እዞ ኦንነ፥ "ዎሹመዉኖ" ጌና።

4 ታናዳን አማንያዋንቶ፥ ሄዋዳን ህንተንቱ ቃይ ክርስቶሳ አሳተፐ እት ባጋ ግድያ ድራዉ፥ ህንተንቱ አ ባጋና ሀይቄድታ። ቃይ ኑን ጾሳ ማድያ ኦሱዋ ኦና ማላ፥ ህንተንቱ ጾሳይ ሀይቁዋፐ ደንዳ ክርስቶሳዋንታ። 5 አያዉ ጎፐ፥ ኑን ኑ አሳተይ ኮዬዳዋዳን ደእያ ዎደ፥ ህጊ ኑን ናጋራ ኦናዳን፥ ኑና ደን፤ ኑ አሳተ ግዶን ኢታ አሙ ደእያ ድራዉ፥ ኑን ሀይቆ አይፍያ አይፌዶ። 6 ሽን ሀእ ኑን ኑና ቃቼዳዎ ሀይቄዳ ድራዉ፥ ጾሳይ ኑና ህግያ ቃሹዋፐ ብሌዳ። ሄዋ ድራዉ፥ ኑን ጌሻ አያናይ ጊግሴዳ ኦራ ኦግያን ጾሳዉ ኤኖ ጋናዋፐ አትን፥ ጻፈቴዳ ህጊ ኑዉ ጊግሴዳ ኤጫ ኦግያን ኤኖ ጎኮ።

7 ያትና፥ ኑን ዋጋኔ? ህጊ ባረ ሁጰዉ ናጋሬ? ሄዋ ግደና፤ ሽን ህጊ ናጋራይ አየንቶ ታና ኤርሴዳ። አያዉ ጎፐ፥ ታን ህጊ፥ "አሳባ አሞቶፓ" ግቤነንቶ፥ አሳባ አሞትያዌ አየንቶ ኤርከ።✝7:7 ከሳ 20:17 8 ሽን ናጋራይ ታን ኡባባ አሞታና ማላ፥ አዛዙዋ ባጋና ታ ቦላ ኦግያ ደሜዳ፤ አያዉ ጎፐ፥ ህጊ ባዌንቶ፥ ናጋራዉ ዎልቃይ ባዋ።

9 ካሰ ህጊ ባይና ዎደ ታን ፓጻ፤ ሽን አዛዙ ዬዳ ዎደ ናጋራይ ደኦ ስምና፥ 10 ታን ቃይ ሀይቃድ፤ ታና ፓጻ ዎናዉ ጾሳይ ቆፔዳ አዛዙ፥ ታዉ ሀይቁዋ አሄዳ። 11 አያዉ ጎፐ፥ ናጋራይ አዛዙዋ ባጋና ታና ጭምያ ኦግያ ደሚደ፥ ሄ አዛዙዋን ታና ዎዳ።✝7:11 ዶመ 3:13

12 ሄዋ ድራዉ፥ ህጊ ጌሻ፤ አዛዙካ ጌሻ፥ ጽላነ ሎአ።

13 ያትና፥ ሎኦባይ ታዉ ሀይቁዋ አሄዴ? ሄዋ ግደና፤ ሽን ታዉ ሄዋ ናጋራይ አሄዳ፤ አሳይ ናጋራይ አየንቶ ሻኪደ ኤራና ማላ፥ ናጋራይ ሎኦባ ባጋና፥ ታዉ ሀይቁዋ አሄዳ። ቃይ አዛዙ፥ "ኦንነ ናጋራ ኦናዉ በሰና" ያግያ ድራዉ፥ ናጋራይ ካሰዋፐ አ ኢቴዳ።

14 ኑን ህጊ ጾሳዋ ግድያዋ ኤሬቶ፤ ሽን ታን ታና ናጋራዉ ዛልኤዳ ሀይቂያ አሳ፤ 15 ታን ኦያዋ ዎዛና አከ፤ አያዉ ጎፐ፥ ታን እጽያዋ ኦይፐ አትን፥ ታን ኦናዉ ዶስያዋ ኦከ።✝7:15 ጋላ. 5:17 16 ታን እጽያዋ ኦያዋ ግዶፐ፥ ህጊ ሎአ ግድያዋ ማርካታይ። 17 ሄዋ ግዶፐ፥ ሄ የዉዋ ታ ቦላ ደእያ ናጋራይ ኦያዋፐ አትን፥ ሀእ ታን ኦከ።

18 ታናን፥ ሄዌነ ታ አሳተን ሎኦባይ ደኤናዋ ታን ኤራይ፤ አያዉ ጎፐ፥ ሎኦባ ኦያ አሙ ታ ቦላ ደኦፐካ፥ ታን ሄ ሎኦባ ኦናዉ ዳንዳይከ። 19 ታን እጽያ ኢታባ ኦይፐ አትን፥ ታን ዶስያ ሎኦባ ኦከ። 20 ሽን ታን እጽያዋ ኦያዋ ግዶፐ፥ ሄዋ ታ ቦላ ደእያ ናጋራይ ኦያዋፐ አትን፥ ሀእ ሄዋ ኦያዌ ታና ግድከ።

21 ስም ታን ሎኦባ ኦናዉ ዶስሽን፥ ኢታባ ኦያዌ ታዉ ህገ ግድያዋ ደማድ። 22 አያዉ ጎፐ፥ ታን ታ ዎዛና ግዶን ጾሳ ህግያን ናሸታይ፤ 23 ሽን ታ ቦላ ግዶን ደእያ ታ ዎዛና ቆፋ ህግያና ዋትያ ዱማ ህግያ በአይ። ሄ ህጊ ታ ቦላ ግዶን ደእያ ናጋራ ኦስስያ ህግያን ታና ቃሽሴ። 24 ታን አይባ ናሸች ባይና አሴ! ታና ሀይቆ አፍያ ሀ አሳተፐ አሻናዌ ኦኔ? 25 ኑ ጎዳ የሱስ ክርስቶሳ ባጋና ጾሳዉ ጋላታይ ግዶ።

ስም ታን ታ ዎዛና ቆፋን ጾሳ ህገዉ ኤኖ ጋይ። ሽን ታ አሳተን ታና ናጋራ ኦስስያ ህገዉ ኤኖ ጋይ።