ጌሻ አያናይ ኮይያዋዳን ደኡሳ
1 ሄዋ ድራዉ፥ ክርስቶሳ የሱሳና ደእያዋንቱ ቦላን ፕርዳይ ሀእ ባዋ፤ 2 አያዉ ጎፐ፥ ክርስቶሳ የሱሳ ባጋና ኑዉ ደኡዋ እምያ ጌሻ አያና ህጊ ታና8:2 ታና፦ እት እት ጌሻ ቃላ ብለይ፥ ኔና ዎይ ህንተንታ ያጌ፤ ሀራይ ቃይ ኑና ያጌ። ናጋራ ህግያ አይለተፐነ ሀይቁዋ ህግያ አይለተፐ ከሴዳ። 3 አሳ አሳተይ ዳቡራንቻ ግድያ ድራዉ፥ ህጊ ኦናዉ ዳንዳይቤናዋ ጾሳይ ኦዳ፤ ናጋራንቻቱዋ አሳተ ማላ አሳተና ደእያ ባረ ናኣ፥ አሳይ ኦዳ ናጋራዉ ያርሹዋ ግዳናዉ ጾሳይ ኪቲደ፥ አሳ አሳተ ግዶን ደእያ ናጋራ ፕርዴዳ። 4 ጌሻ አያናይ ኮይያዋዳን ደእያዋንቱፐ አትን፥ ኑ አሳተይ ኮይያዋዳን ደአናዋንቱ ቦላ፥ ኑ ቦላ፥ ህግያ ጽሎ አዛዙ ፖለታና ማላ፥ ጾሳይ ሀዋ ኦዳ።
5 ባረንቱ አሳተይ ኮይያዋዳን ደእያዋንቱ ባረንቱ አሳተባ ቆፒኖ፤ ሽን ጌሻ አያናይ ኮይያዋዳን ደእያዋንቱ ጌሻ አያናባ ቆፒኖ። 6 አሳተባ ቆፉሳይ ሀይቁዋ አሄ፤ ሽን ጌሻ አያናባ ቆፉሳይ ደኡዋነ ሳሮተ አሄ። 7 አሳተባ ቆፉሳይ ጾሳዉ እጾ፤ አያዉ ጎፐ፥ አሳተይ ጾሳ ህገዉ ኤኖ ጌና፤ ቃይ ኤኖ ጋናዉካ አዉ ዳንዳየተና። 8 ባረንቱ አሳተዉ ኤኖ ግያዋንቱ ጾሳ ናሸቻናዉ ዳንዳይክኖ።
9 ሽን ጾሳ አያናይ ህንተንቱን ደኦፐ፥ ጌሻ አያናይ ግያዋዳን ደኢታፐ አትን፥ ህንተ አሳተይ ኮይያዋዳን ደእክታ። ሽን ኦንነ ክርስቶሳ አያናይ ባይናዋ ግዶፐ፥ ሄ ኡራይ ክርስቶሳዋ ግደና። 10 ሽን ክርስቶስ ህንተንቱን ደኦፐ፥ ህንተ አሳተይ ናጋራ ጋሱዋን ሀይቄዳዋ፤ ሽን ህንተ አያናይ ጽሎተ ጋሱዋን ህንተንቱን ፓጻ ደኤ። 11 ሽን የሱሳ ሀይቁዋፐ ደንዳ ጾሳ አያናይ ህንተ ግዶን ደኦፐ፥ ሀይቁዋፐ ክርስቶሳ ደንዳ ጾሳይ ቃይ ህንተንቱን ደእያ ባረ ጌሻ አያናን፥ ሀይቂያ ህንተ አሳተዉካ ደኡዋ እማና።