1 አሞና ናአይ እዮስያስ ይሁዳን ካተቴዳ ዎደ ሶፎናሳኮ ዬዳ መና ጎዳ ቃላይ ሀዋ። ሶፎናስ ኩሻ ናኣ፤ ኩሽ ጋዳልያ ናኣ፤ ጋዳሊ አማርያ ናኣ፤ አማር ካትያ ህዝቂያሳ ናኣ።✝

2 መና ጎዳይ ሀዋዳን ያጌ፤ "ታን ጋድያ ቦላን ደእያዋ ኡባ ሙልጹ ኦደ ይሳና። 3 ታን አሳነ መህያ፥ ሳሉዋ ካፎቱዋነ አባ ሞለቱዋካ ይሳና። ቃይ ታን ኢታ አሳቱዋ አ የጋና፤ አሳ ዛርያካ ቢታ ቦላፐ ይሳና" ያጌ መና ጎዳይ።

4 ቃይካ ጾሳይ ሀዋዳን ያጌ፤ "ታን ይሁዳንነ የሩሳላመን ደእያ ኡባ ሙራናዉ ታ ኩሽያ ደንና፤ ባኣላ ግያ ኤቃዉ ጎይንያ አቴዳዋንታነ አዉ ኦያ ቄሳቱ ዋ ሄ ሳኣፐ ሙልጹ ኦደ ይሳና። 5 ጎልያ ሁጲያ ደምባዪደ ኦድኖ፤ ሄዋ ቦላ ከሲደ፥ አዋዉ፥ አግናስነ ጾልንተቶ ጎይንያዋንታ ታን ይሳና። መና ጎዳዉ ጎይኒድነ አ ሱንን ጫቂደ፥ ቃይ ሞሎካ ግያ ኤቃ ሱንን ጫቂያዋንታ ታን ይሳና። 6 መና ጎዳ ካልያዋ አጊደ ጉየ ስሜዳዋንታ፥ መና ጎዳ ኮይቤናዋንታነ ኡንቱንታ ካለናዳን ኦችቤናዋንታካ ታን ይሳና" ያጌ።

7 መና ጎዳ ጋላሳይ ማቴዳ ድራዉ፥ ኡባ ሞድያ መና ጎዳ ስንን ጮኡ ጊተ! መና ጎዳይ ባረ አሳ ያርሾ ጊጌዳ መህያዳን አ እማናዉ ጊግሴዳ፤ ቃይ ይሁዳ ቦንቂያ ሞርከቱዋካ ዱማዪደ ጊግሴዳ።

8 መና ጎዳይ ሀዋዳን ያጌ፤ "ታ አሳ አ እምያ ጋላስ ካፓቱዋ፥ ካትያ ናናቱዋነ አላጋ ቢታ ዎጋ ካልያዋንታ ኡባቱዋ ታን ሙራና። 9 ሄ ጋላስ አላጋ ቢታ አሳቱዋዳን፥ ኤቃዉ ጎይንያዋንታነ ባረንቱ ጎዳ ጎልያ ማካላንነ ጭሙዋን ኩንያዋንታ ታን ሙራና" ያጌ።

10 መና ጎዳይ ሀዋዳን ያጌ፤ "ሄ ጋላስ የሩሳላመ ድርሳን ሞልያ ፐንግያ ማታን ደእያ ኦራ ካታማ ሻኩዋን ዋሱነ ዬኩ ስሰታና፥ ዞዘቱዋ ቦላንካ ቁ ጌዳ ዶምኤ ኮሻይ ጊሩማና። 11 ህንተኖ፥ ካታማዉ ህርክ ባጋና ደእያዋንቶ፥ ዬክተ፤ አያዉ ጎፐ፥ ሄዋን ዛልእያ ኡባቱ ዬድኖ፤ አሌቆ ሀንያ ብራ ዛልእያዋንቱካ ሀይቂ ዉሬድኖ። 12 ሄ ጋላስ ታን የሩሳላመ ግዱዋ ጾምፕያን ኮያና፤ ህርግ ባይናን ዎፑ ግ ኡቲደ፥ ባረንቱ ዎዛናን፥ ‘መና ጎዳይ ሎኦባነ ኦና፤ ኢታባነ ኦና’ ያግያዋንታ ታን ሙራና። 13 ኡንቱንቱ ማጹ ቦንቀታናዋ፤ ኡንቱንቱ ጎሊካ ኮለታና። ኡንቱንቱ ጎልያ ኬጻና፥ ሽን ሄ ጎልያን ደእክኖ፤ ቃይ ዎይንያ ቱራቱዋካ ቶካና፥ ሽን ሄ ዎይንያ ኤሳ ኡሽክኖ" ያጌ።

14 መና ጎዳ ዎልቃማ ጋላሳይ ማቴዳ፤ ቃይ ሎይ ኤሌሊደ ዬ። መና ጎዳ ጋላሳይ ጫሞ ጋላሳ። ሄ ጋላስ ምኖ ኦላንቻቱካ ዋሱዋ ጹልሳና። 15 ሄ ጋላሳይ ሀንቁዋ ጋላሳ፥ መቶነ ኡንኦ ጋላሳ፥ ባሻነ ኮለ ጋላሳ፥ ማነ ሻኖቻ ጋላሳነ ሻርያነ ባራ ማ ጋላሳ ግዳናዋ። 16 ሄ ጋላሳይ ዩሹዋ ድረቴዳ ካታማቱዋ ቦላነ አዱሳ ግምበቱዋ ቦላ ኦላ ማላካታይ ፑነትያ ጋላሳነ ኦላንቻቱ ኦላ ኮሻይ ስሰትያ ጋላሳ ግዳናዋ።

17 መና ጎዳይ ሀዋዳን ያጌ፤ "ኡንቱንቱ ጾሳ ናቄዳ ድራዉ፥ ቆቅያዳን ታታፋና ጋካናዉ፥ አሳቱዋ ቦላን ታን መቱዋ አሀና። ኡንቱንቱ ሱይ ድኡዋዳን ጎጋና፤ ኡንቱንቱ አሃይ ፕቱዋዳን ኦለታና። 18 መና ጎዳ ሀንቁዋ ጋላስ ኡንቱንቱ ብራ ግድና፥ ኡንቱንቱ ዎርቃይካ ኡንቱንታ አሻናዉ ዳንዳየና። እ ሳኣን ደእያ ኡባ አኬከናን ደእሽን፥ ዉርስ ይሳና፤ ቢታ ኡባይካ አ ሀንቁዋ ታማን ሜተታና" ያጌ።