1 Kaatatuwaa 10

Saaba Kaatatto

1 Saaba kaatatta Med’inaa Godaa suntsan waareteedda Solomona waariyaa sisaade, dees’iyaa ooshatuwaa akkaade, Aa paac’c’anaw denddaaddu.✝10:1-10 Mat. 12:42; Luk'. 11:31 2 Sawuwaa, loytsi daro work’k’aanne al"o shuchchaa c’aaneteedda daro gaalotuwaa c’uguwaana loytsi daro ajabaana Yerusaalame gakkaade, Solomona sintsa aad’d’aadu. Bare wozanaan de’iyaawaa ubbaa Solomonaw odaaddu. 3 Solomone Aa oochcheeddawaa ubbaa odeedda; iziw birshshennan aappe geemmi atteedabay ayaynne baawa. 4 Saaba kaatata Solomona aad’d’eeda era, I kees’s’eedda kaatiyaa golliyaa, 5 Aa maaddan shiik’iyaa k’umaa, Aa oosanchchatuu uttiyaa utetsaa, Aa k’oomatuu ootsiyaa oosuwaanne mayiyaa mayuwaa, Aa eessaa tigiyaawanttanne Med’inaa Godaa Geeshsha Golliyaan I s’uuggiyaa yarshshuwaa be’eedda wode, izi wozanay gagetteedda.

6 Hewaappe guyyiyaan iza kaatiyaa, «Newaanne ne aad’d’eeda eratetsaabaa taani ta gaden de’aadde siseeddawe tuma. 7 Shin taani yaade, ta ayfiyaa biraanan be’ana gakkanaw unttunttu taw odeeddawaa ammanabeykke. Taw Asay odeeddawe bagganne gakkenna; aad’d’eeda eratetsankka duretetsankka taani siseeddawaappe loytsi daree. 8 Ubbaa wode ne sintsan ek’k’iide, ne aad’d’eeda era sisiyaa ne asatuunne ne oosanchchatuu ayaa nashettiinooshsha! 9 Neenan nashettiidde, neena Israa’eeliyaa kawutetsaa araatan utisseedda Med’inaa Goday ne S’oossay galatetto! Med’inaa Goday Israa’eeliyaa asaa med’inaw siik’eedda diraw, neeni suure pirddaanne s’illotetsaa ootsana mala I neena kaateyeedda» yaagaaddu.

10 Kaatata oyddu sha"a kiilo giraame dees’iyaa work’k’aa, loytsi daro sawuwaanne al"o shuchchaa kaatiyaw immaaddu. Saaba kaatatta Kaatiyaa Solomonaw immeeddawaa keeshshaa daro sawuwaa hewaappe simmina ooninne ahibeena.

11 (Kaatiyaa Kiiraama markkabatuu, Oofirappe work’k’aa aheeddawanttu yaappekka sanddale geetettiyaa loytsi daro mitsaanne al"o shuchchaa aheeddino. 12 Kaatii Solomone he sanddaliyaappe Med’inaa Godaa Geeshsha Golliyaanne kaatiyaa golliyaa tuuk’etuwaa, mazimuriyaa yes’s’iyaawanttoo diitsaanne maasink’k’uwaa med’isseedda. Hewaa mala sanddalii he gallassaappe haa simmina yinne erenna, beettinne erenna.)

13 Kaatii Solomone immanaw bessiyaa imotaappe haraa, Saaba kaatatta amottaade Aa oochcheeddawaa ubbaa iziw immeedda. Hewaappe guyyiyaan Saaba kaatatta bare ajabaana denddaade, bare gade simmaaddu.

Kaatiyaa Solomone Duretaa

14 Solomone laytsan laytsan akkiyaa work’k’ay laatamanne heezzu sha"a kiilo giraame dees’iyaawaa. 15 Hewe zal"anchchatuwaappe akkeedda k’aras’aanne Araba biittaa kaatetuwaa ubbaappenne Israa’eeliyaa biittaa mooddiyaawanttuppe akkeedda giiraa bolla gujjaa. 16 Solomone laa"u s’eetu wogga gonddalletuwaa k’os’s’eedda work’k’aappe med’isseedda; itti itti gonddalliyan laappun kiilo giraame gidiyaa work’k’ay geleedda. 17 K’aykka I heezzu s’eetu k’eeri gonddalletuwaa k’os’s’eedda work’k’aappe med’isseedda; itti itti k’eeri gonddalliyan laa"u kiilo giraame gidiyaa work’k’ay geleedda. Kaatii he gonddalletuwaa Liibaanoosa Wora Golliyaa geetettiyaa gollen wotseedda.

18 K’aykka kaatii itti wolk’k’aama kawutetsaa araataa danggarssaa zaaliyaappe med’isseedda, muruta work’k’aan sheeshsheedda. 19 Kawutaa araatay de’iyaa sa’aa pude kesanaw yed’d’iyaa usuppun detsatuu de’iino. He araataw guyye baggay s’aatsaa. Araataw laa"u baggaanakka k’esiyaa zemppissiyaa sa’atuu de’iino; he laa"u sa’atuu lank’k’iyankka ek’k’eedda itti itti gaammuwaa misilii de’ee. 20 He araataa pude kesiyaa usuppun detsatuwaan ya baggananne ha baggana itti itti gaammuwaa misilii, ubbaanna tammanne laa"u misiletuu de’iino. Hawaa mala kawutetsaa araatay hara kawutetsan hak’aninne oosettibeenna.

21 Kaatii Solomone ushshaa ushiyaa miishshaa ubbay work’k’aappe med’etteedda; Liibaanoosa Wora Gollen de’iyaa miishshaa ubbaykka muruta work’k’aappe med’etteedda. Ittibaynne biraappe med’ettibeenna; ayaw gooppe, Solomone wode biray ubbakka go"iyaabaadan paydetti erenna. 22 Kaatiyaw Kiiraama markkabatuwaanna zal"iyaa wolk’k’aama markkabatuu abbaan de’iino. He markkabatuu work’k’aanne biraa, danggarssaa achchaa, geleshshotuwaanne k’aaretuwaa c’aani akkiide, heezzu laytsaappe itti gede yiino.

23 Kaatii Solomone duretetsaaninne aad’d’eeda eratetsan sa’aan de’iyaa kaatetuwaa ubbaappe dareedda. 24 Sa’aan de’iyaa Asay ubbay Aa sintsa aad’d’anawunne S’oossay Aa wozanaan wotseedda aad’d’eeda era sisanaw koyee. 25 Laytsaappe laytsan yiyaa ubbay aw immanaw work’k’aanne biraa miishshatuwaa, mayotuwaa, ola miishshatuwaanne sawuwaa, paratuwaanne bak’ulotuwaa akkiide yee.

26 Solomone paraa gaaretuwaanne paratuwaa shiishsheedda; aw itti sha"anne oyddu s’eetu paraa gaaretuunne tammanne laa"u sha"a paratuu de’iino. I unttunttu paraa gaaretuwaa katamatuwaaninne barenana Yerusaalamen wotseedda.✝10:26 1 Kat. 4:26 27 Kaatii Yerusaalamen biray shuchchaadan keeletanaadan, zigaykka gad’an dic’c’iyaa etsaadan c’orattanaadan ootseedda. 28 Solomone paratuu Gibs’eppenne K’aawe geetettiyaa biittappe yeeddino. Kaatiyaa zal"anchchatuu unttunttu K’aaweppe shaluwaan shammiide ahiino.✝10:28 Zar. 17:16 29 Unttunttu itti itti paraa gaariyaa usuppun s’eetu s’agaraa biran, itti itti paraa s’eetanne ishatamu s’agaraa biran Gibs’eppe shammiide ahiino; unttunttukka Hiitetuwaa kaatetoo ubbatoonne Sooriyaa kaatetoo zal"iino.