2 Kaatatuwaa 4

Elssaa’anne Shuneema Kataman De’iyaa Mishirattonne

8 Itti gallassi Elssaa’i itti dure mishirata de’iyaa Shuneema geetettiyaa katamaa beedda. Mishirata Aa shoobbaade, k’umaa mizaaddu. He gallassaappe doommiide, I hewaana aad’d’iyaa wode ubbaan, k’umaa maanaw I soo gelee. 9 Aa bare asinaa, «Ha ubbaa wode nu mataana aad’d’iyaa bitanii S’oossaa asaa gidiyaawaa taani eray. 10 Hewaa diraw, ane itti guutsa kifiliyaa bolla pook’iyaan aw kees’s’oytte; Aa gidduwaan gisuwaa, araataa, s’arap’p’eezaanne s’omppiyaa wotsoytte. Hewaappe guyyiyaan, I nuukko yeedda wode ubbaan, hewan gelana danddayee» yaagaaddu.

11 Itti gallassi Elssaa’i Shuneema katamaa yiide, bare kifiliyaa pude kesiide, yaan shemppeedda. 12 Hewaappe guyyiyaan, bare k’oomaa Giyaaza, «Ba; he mishiratto s’eesa» yaageedda; Giyaazi s’eesina, Aa yaade Elssaa’a sintsan ek’k’aaddu. 13 Elssaa’i Giyaaza, «Ha mishiratee ‹Neeni nu diraw, hawaa ubbaa metootaadda. Yaatina nuuni new ay ootsanne? New nuuni biide, kaatiyaa woy ola gadaawaa haasayissiyaabi de’ii?› yaagaadde izo oochcha» yaageedda.

Mishirata, «Taani hawaan ta asaa giddon de’ishshin, taana metiyaabay baawa» yaagaaddu.

14 Hewaappe guyyiyaan, Elssaa’i Giyaaza, «Yaatina nuuni iziw ay ootsanee?» yaagiide oochcheedda.

Giyaazi, «Iziw na’i baawa; I asinaykka c’imeedda» yaageedda.

15 Elssaa’i, «Mishiratto k’aykka s’eesa» yaageedda. Izo s’eeseedda; Iza yaade, penggiyaan ek’k’aaddu. 16 Elssaa’i mishiratto, «Laytsi hannoode neeni attuma na’aa idimmana» yaageedda.

Mishirata, «Hay ta godaw, neeni S’oossaa asaa gidikkii, taw worddotoppa!» yaagaaddu.✝4:16 Dom. 18:14

17 Shin Mishirata shahaaraaddu; Elssaa’i iziw odeeddawaadan laytsan he wode attuma na’aa yelaaddu.

18 He na’ay dic’c’eedda; itti gallassi katsaa c’akkiyaa asatuwaana de’iyaa bare aawuwaakko beedda. 19 Bare aawoo, «Woo ta huup’iyaw! Woo ta huup’iyaw!» yaageedda.

Aa aawuu itti k’oomaw, «Tookkaade Aa daayikko afa» yaagiide odeedda.

20 K’oomay na’aa akkiide, aattikko afina gallassaa seetay gakkanaw na’ay bare daay kiwuwaan utteedda; hewaappe guyyiyaan, na’ay hayk’k’i aggeedda. 21 Mishirata na’aa pude afaade, S’oossaa asaa arssaan gisisaaddu. Yaataade Aa bolla ifitsaa gorddaade baaddu.

22 Hewaappe guyyiyaan, bare asinaa s’eesaade, «Taani S’oossaa asaakko ellekka baade yaana mala, k’oomatuwaappe ittuwaanne haretuwaappe ittuwaanne taw yedda» yaagaaddu.

23 I, «Hachche aginaa s’eeruwaa gallassaa woy Sambbata gidennabaa, ayee neena aakko afiyaawe?» yaageedda.

Aa, «Ayaynne baawa» yaagaaddu. 24 Hewaappe guyyiyaan, hariyaa kooraade, bare k’oomaw, «Hariyaa laagga! Taani new odana gakkanaw, loddan laaggoppa» yaagaaddu. 25 Mishirata hewaappe denddaade, K’armmeloosa Deriyan de’iyaa S’oossaa asaakko baaddu.

Elssaa’i mishirata yiyaano haakuwaan be’iide, bare k’oomaa Giyaazaw, «Be’a, Shuneema kataman de’iyaa mishirata yaw. 26 O mokkanaw wos’s’a baade, ‹Neeni saree? Ne asinay saree? Ne na’ay saree?› yaagaadde oochcha» yaageedda.

Mishirata, «Nuuni ubbaykka sara» yaagaaddu.

27 Mishirata deriyaa bollan de’iyaa Med’ina Godaa asaakko gakkeedda wode, hokkaade Aa gediyaa oyk’k’aaddu.

Giyaazi mishiratto digganaw shiik’eedda; shin S’oossaa bitanii Aa, «Agga! Aa wolk’k’aama metuwaan de’aw; shin Med’inaa Goday taappe hewaa gentseedda. I metuwaa taw odibeenna» yaageedda.

28 Hewaappe guyyiyaan mishirata, «Ta godaw, neeni taw na’aa immanaadan taani neena oochchaadditaa? Taani neena, ‹Taana c’oo mela k’aak’k’ayoppa› yaagabeykkita?» yaagaaddu.

29 Elssaa’i Giyaaza, «Ne adussa mayuwaa ne sak’k’iyaan sirk’k’a; yaataade ta gatimaa akkaade elleella, ogiyaan oonananne gakkettooppe, sarotoppa; ooninne neena sarotooppe, zaaraadde sarotoppa. Ta gatimaa na’aa deemuwaan wotsa» yaageedda.

30 Shin na’aa daaya, «Med’ina Goday ero! Ne shemppu ero! Taani neena yeggaade biikke» yaagaaddu. Elssaa’i denddiide, izo kaalleedda. 31 Giyaazi unttuttuppe sintsatiide biide gatimaa na’aa deemuwaan wotseedda; shin kooshshay woy shemppu baawa. Yaatina Giyaazi Elssaa’ena gaketanaw simmi yiide, «Na’ay beegottibeena» yaagiide odeedda.

32 Elssaa’i soo geliide, he na’aa anhay Aa arssaan giseeddawaa be’eedda. 33 Bare bollanne na’aa bollanne kariyaa gorddiide, Med’ina Godaa woosseedda. 34 Hewaappe guyyiyaan, na’aa anhaa bolla kesiide, bare doonaa Aa doonaan, bare ayfiyaa Aa ayfiyaan, bare kushetuwaakka Aa kushetuwaan gatsi wotsiide giseedda. Na’aa bollay ho"eedda.✝4:34-35 1 Kat. 17:21 35 Elssaa’i denddiide, soo giddon yaanne haanne simeretteedda. Laa"entsuwaakka simmiide, na’aa bolla c’ogottiide giseedda. Yaatina na’ay laappu gede hed’d’isheeddawaappe guyyiyaan s’eelleedda.

36 Yaatina Elssaa’i Giyaaza s’eesiide, «Ane ha Shuneematto s’eesa» yaageedda. Giyaazi izo s’eeseedda. Iza yeedda wode, Elssaa’i izo, «Ne na’aa akka» yaageedda. 37 Hewaappe guyyiyaan, mishirata Elssaa’a gediyaan kunddaade, biittan gufannaaddu. Yaataade bare na’aa akkaade kare kesaaddu.