Hoose 6

Asay S’oossaakko Simmowaa Malatisseedda

1 Israa’eeliyaa Asay hawaadan yaagee; «Haayite! Ane Med’inaa Godaakko simmoytte. I nuuna mentsereetseedda, shin I nuuna patsana; I nuuna madutseedda, shin I nu madutsaa k’achchanawaa. 2 Laa"u gallassaappe guyyiyaan, I nuuna patsana; heezzentso gallassi nuuni Aa sintsan de’ana mala, I nuuna dentsana. 3 Med’inaa Godaa ane eroytte; Aa erana mala, minisiide ane Aa kaalloytte. Away mokkiyaawe tuma gidiyaawaadan, ikka tumu beettana. Bad’d’eesaa iraadan, biittaa aliyaa balgguwaa iraadan, I nuukko yaana» yaagee.

4 S’oossay hawaadan yaagee; «Efireema asaw, taani hinttena waatooshsha! Yihudaa asaw, taani hinttena waatooshsha! Ayaw gooppe, hintte siik’uu wontta shaariyaa mala; ellekka d’ayiyaa guura ketterssaa mala. 5 Hewaa diraw, taani timbbitiyaa odiyaawanttu baggana hinttena k’ans’s’ereetsaad; ta doonaappe keseedda k’aalan taani hinttena wod’aad. Ta pirddaykka hintte bolla walk’k’antsaadan walk’k’ammana. 6 Ayaw gooppe, taani aggena siik’uwaa koyayippe attina, yarshshuwaa koyikke; S’oossaa eriyaawaa koyayippe attina, s’uuggiyaa yarshshuwaa koyikke.✝6:6 Mat. 9:13; 12:7

7 «Shin unttunttu Addaamewaadan, c’aak’uwaa koleeddinno; yan taw ammanettennan is’s’eeddino. 8 Gala’aade katamay iita oosuwaa ootsiyaa asatuu de’iyaa katamaa; he katamay asaa suutsan bayi utteedda. 9 Panggatuu asaa wod’anaw k’osetti uttiide naagiyaawaadan, k’eesetuwaa c’itaykka hewaadan naagee; Sekeema katamaa afiyaa ogiyaan asaa wod’ee. Ee, unttunttu yeellayiyaa kobabaa ootsiino. 10 Taani Israa’eeliyaa asan dagantsiyaabaa be’aad. Efireema giddon sharmus’atetsay de’ee; Israa’eelikka tuneedda.

11 «Yihudaa biittaa asatoo, hinttenakka murana gallassaa taani keera wotsaad.