Hoose 8

Med’inaa Goday Israa’eeliyaa Eek’aa Goynnussaan Pirddeedda

1 «Malakataa punna! Ayaw gooppe, unttunttu ta c’aak’uwaa aad’d’iidde, ta higgiyaa mentseedda diraw, Med’inaa Godaa asaa bolla morkkii arggantsaadan kuweedda. 2 Unttunttu, ‹Abeet nu S’oossaw, nuuni Israa’eeliyaa Asay neena ereetto› yaagiide taw waassiino. 3 Shin Israa’eeliyaa Asay lo"obaa is’s’eedda diraw, morkkii unttuntta yederssana.

4 «Unttunttu taana oochchennan barew kaatetuwaa kaateyeeddino; taani odenaan de’ishshin, kaappatuwaa doreeddino. Bare d’ayoo gaasuwaa gidiyaa eek’aa misiletuwaa barenttu biraappenne work’k’aappe med’d’eeddino. 5 Samaariyaa asaw, mara malatissiide hintte med’d’eedda eek’aa taani is’s’aad; ta hank’k’uu hintte bolla ees’s’i keseedda. Unttunttu geeshsha gidennaan awude gakkanaw de’anee? 6 Kushiyaa hiillanchchay Israa’eeliyaappe Aa med’d’eeddappe attina, I S’oossaa gidenna. Samaariyaa eek’aa misilii me"erettana.

7 «Unttunttu c’arkkuwaa zeriino; gotiyaa k’oyc’c’iino. Ek’uwan de’iyaa unttunttu katsaw ayfii baawa; hewaa diraw, d’iilii baawa; d’iilii de’inttokka allagatuu maana. 8 Israa’eeliyaa Asay mitetteedda; ha"i unttunttu allaga asatuwaa giddon de’iino; unttunttu me"eedda miishshaadan, patsenna asaa gideeddino. 9 Unttunttu baddo harddiiday barekka yuuyyiyaawaadan yuuyyiidde, Asoore biittaa beeddino; Efireema Asay barena maaddiyaa asaa shaluwaan shammeedda. 10 Taani unttuntta shiishshana. Kare gadiyaa kaatetuunne kaappatuu unttuntta uk’k’unnooppe, unttunttu ellekka gilk’k’ana.

11 «Efireema Asay nagaraa yarshshuwaa yarshshiyaa daro sa’aa kees’s’ee; shin he yarshshuwaa sa’atuu nagaraa ootsiyaa sa’aa gideeddino. 12 Taani unttunttoo ta higgiyan darobaa s’aafaad; shin unttunttu he higgiyaa allagabaadan s’eelleeddino. 13 Unttunttu yarshshanaw dosiino; yarshshuwaa ashuwaakka miino; shin Med’inaa Goday unttunttun nashettibeena. I ha"i unttunttu bayzzuwaa hassayana; k’ay unttunttu nagaraa gishshawukka unttuntta murana; unttunttu Gibs’e biittaa baana. 14 Israa’eeliyaa Asay barena Med’d’eeddawaa dogiide, kaatiyaa golletuwaa kees’s’ee; Yihudaa asaykka gimbbetteedda daro katamatuwaa kees’s’ee. Shin taani he katamatuwaan tamaa yeddana; unttunttu geessotuwaa maana» yaagee.