1 Med’inaa Goday Aa morkkatuwaa ubbaa kushiyaappenne Saa’oola kushiyaappe ashsheeda gallassi Daawite Med’inaa Godaw ha yetsaa yes’s’eedda.

2 «Med’inaa Goday taw wogga zaallaa;

Taani ollaappe naagettiyaa miis’aa;

I taana ashshiyaawaa.

3 Ta S’oossay taani aakko bak’atiyaa ta wogga zaallaa.

I ta gonddalliyaa;

I taana ashshiyaa wolk’k’aama.

I taani k’osetta attiyaa sa’aa;

I taana makkalanchcha asatuwaappe ashshee.

4 Galatay bessiyaa Med’inaa Godaa taani s’eesay;

I ta morkkatuwaappe taana ashshee.

5 «Hayk’k’uwaa beetay ta heeraan sirimettee;

bashshay di’uwaadan taana muukkeedda.

6 Duufuwaa wodoruu taana k’achchana hanee;

hayk’k’uu p’iriyaadan taana oyk’k’eedda.

7 Taana metuu iissina Med’inaa Godaa s’eesaad;

‹Taana maadda› gaade ta S’oossaw waassaad.

I bare Geeshsha Golliyaan ta kooshshaa siseedda;

taani waasseedda waasuu Aa haytsaan wod’d’eedda.

8 «S’oossay hank’k’etteedda diraw,

Biittay yiik’k’iyiik’k’iide k’aas’s’eedda;

deretuwaa s’ap’uu gaji gaji kokkoreedda.

9 Aa siid’iyaappe hank’k’uwaa c’uway c’uwatteedda;

Aa doonaappe miyaa tamaa lac’uunne s’uuggiyaa bonk’k’uu kesseedda.

10 Saluwaa I p’alk’k’iide, duge wod’d’eedda.

He wode Aa gediyaappe garssanna med’eedda shaarii de’ee.

11 K’efiyaana de’iyaa kiitanchchatuwaan,

kiruubetuwaan uttiide paalleedda;

c’arkkuwaa k’efiyaa bollan beetteedda.

12 Barena d’uman kammeedda;

Aa dunkkaanii iraanna med’eedda shaariyaa.

13 Aa sintsan de’iyaa wolk’k’aama poo’uwaappe

tamaa lac’uu kesseedda.

14 «K’ay Med’inaa Goday guguntsaadan saluwaappe guummeedda.

Ubbaappe D’ok’k’iyaa S’oossay bare kooshshaa sisseedda.

15 Bare wonddaafiyaa Adaa yeddiide,

bare morkkatuwaa laaleedda.

Walk’k’antsaa poo’uwaa kiittiide,

unttuntta yedersseedda.

16 Med’inaa Goday seereedda wodenne,

hank’k’ettiide peenuuk’eedda wode,

Abbaa haatsay giseedda biittay betteedda.

K’ay sa’aa baasuukka k’onc’c’eedda.

17 «S’oossay bollappe kushiyaa duge yeddiide, taana oyk’k’eedda;

c’iimma haatsaappe taana keseedda.

18 I taana ta wolk’k’aama morkkiyaappenne

taana is’s’iyaawanttuppe ashsheeda;

ayaw gooppe, unttunttu taw loytsi daro wolk’k’aama.

19 Ta waayiyaa gallassi,

unttunttu ta bolla denddeeddino;

Shin Med’inaa Goday taana zemppissiyaawaa.

20 I taana aako sa’aa keseedda;

taanan nashetteedda diraw, taana ashsheeda.

21 «Ta s’illotetsaadan Med’inaa Goday taw c’iggeedda;

Ta kushiyaa geeshshatetsaadan I taw zaareedda.

22 Taani Med’inaa Godaa ogiyaa kaalaad;

taani ta S’oossaa aggaade wora babeykke.

23 Taani Aa higgiyaa ubbaa naagaad;

Aa wogaa poliyaawaa aggabeykke.

24 Taani Aa sintsan suure de’aad;

taani taana nagaraappe naagaad.

25 Hewaa diraw, Med’inaa Goday taw

ta s’illotetsaadaaninne ta geeshshatetsaadan zaareedda.

26 «Abeet S’oossaw, ammanettiyaawanttoo neeni ammanettiyaawaa;

suuretoo neenikka suure.

27 Geeshshatoo neenikka geeshsha;

shin geellatoo neeni c’inc’c’a.

28 Barentta zik’k’issiyaawantta ashshaasa;

shin barentta d’ok’k’issiyaawantta zik’k’issanaw neeni unttuntta s’eellaasa.

29 Abeet Med’inaa Godaw, ta s’omppii neena;

Med’inaa Goday poo’issina, ta d’umay kichchee.

30 Ne maaduwaan taani ta morkke olanchchatuu bolla woraajjay;

ta S’oossan taani unttuntta miis’aa s’eeraana guppa aad’d’ay.

31 S’oossaa ogii suure.

Med’inaa Godaa k’aalay ammanettiyaawaa.

Aakko bak’atiyaa ubbatoo I gonddalle.

32 Med’inaa Godaappe attina, hara s’oossi baawa;

Nu S’oossaappe attina,

hara wogga zaalli baawa.

33 Taw wolk’k’aa immiyaawenne

ta ogiyaa saro ootsiyaawe

S’oossaattee.

34 I ta gediyaa

gen"iyaa gediyaadan minisee.✝

Taana d’ok’k’a gishuwaan sarotetsaan wotsee.

35 I ta kushiyaa olaa meezeyee;

Hewaa diraw, taani ta k’esiyaan,

nahaasiyaa giyaa birataa wonddaafiyaan dafaade dukkay.

36 «Taana ashshiyaa ne gonddalliyaa

neeni taw immaadda;

Ne lo"o okkay taana gitayee.

37 Taani hamettiyaa sa’aa aassaasa;

hewaa diraw, ta gedii halis’s’ibeena.

38 Ta morkkatuwaa taani yederssaade mentsereetsaad;

Taani unttuntta d’ayssennan de’aadde guyye simmabeykke.

39 Taani unttuntta laa’entso denddennaadan shoc’aad;

unttunttu ta gediyaan kunddeeddino.

40 Olaw taana wolk’k’aa danc’c’issaadda;

taananna gaaddatiyaawantta taw gulbbatissaadda.

41 Ta morkkatuwaa ta sintsaappe guyye bak’atissaada;

taana is’s’iyaawantta taani d’ayssaad.

42 Barentta maaddiyaawaa koyeeddino;

shin ooninne unttuntta ashshibeenna.

Med’inaa Godaakka unttunttu s’eeseeddino;

shin I unttunttoo koyyibeenna.

43 Taani unttuntta baanaadan liik’issaad;

ogiyaan de’iyaa urk’k’aadankka unttuntta dirs’s’ereetsaade yed’d’aad.

44 «Ta asaa makkalaappe taana ashshaada.

Kawutetsatuwaa bolla suntsaade, taana naagaadda;

taani erenna Asay taw moodetteedda.

45 Allaga gade asaykka ta sintsan gulbbatee.

Unttunttu ta waariyaa sisiide,

taw azazettiino.

46 Unttunttu wozanaa kahaa bayiino.

Barenttu naagettiyaa miis’aappe kokkoriidde yiino.

47 «Med’inaa Goday de’ee! S’oossay,

ta wogga zaallay galatetto.

S’oossay, taana ashshiyaa zaallay,

d’ok’k’u d’ok’k’u go.

48 I ta haluwaa kessiyaa S’oossaa;

kawutetsatuwaa taappe garssanna wotsiyaawaa.

49 Ta morkkatuwaappe taana kessi akkiyaawaa.

Abeet S’oossaw, neeni taananna gaaddatiyaawanttu bollan

taana d’ok’k’u d’ok’k’u ootsaasa.

Makkalanchcha asatuwaappe neeni taana ashshaasa.

50 Hewaa diraw, taani

Med’inaa Godaa kawutetsatuwaa giddon galatana;✝

taani ne suntsaakka sabbana.

51 «S’oossay bare kaatiyaw

s’oonuwaa bollan s’oonuwaa immee.

Bare okkeeddawoo, Daawitewunne Aa zeretsaw,

aggena siik’uwaa med’inaw besse»

yaagiide yes’s’eedda.