2 Sammeela 4

Yaabustte Asaa Kushiyaan Hayk’k’eedda

1 Saa’oola na’ay Yaabustte Abaneeri Kebroonan hayk’k’eeddawaa siseedda wode, Aa wozanay yayeedda; Israa’eeliyaa Asay ubbaykka dagammeedda. 2 Saa’oola na’aa Yaabusttew c’uguwaa kaaletsiyaa laa"u kaappatuu de’iino; ittuwaa suntsay Ba’aana; yenkkuwaa suntsay Rekaaba; unttunttu Biiniyaama zariyaa gideedda Ba’erootiyaa Rimoona naanaa. Ba’eroota katamay Biiniyaama baggaadan paydetee; 3 ayaw gooppe, Ba’erootan de’eedda asatuu Gittayma gadiyaa bak’atiide, heedeppe hachche gakkanaw betiyaadan yaan de’eeddino.

4 Saa’oola na’aa Yoonataanaw laa"u gedii sileedda na’ay de’ee; Saa’oolanne Yoonataana worii Iziraa’eeliyaappe gakkeedda wode, I ichcheshu laytsaa na’aa; he na’aa dichchiyaana Aa akkaade bak’ataaddu; shin Aa bak’atanaw dirbbishin, na’ay kunddiide sila kesseedda; he na’aa suntsay Manfibosheeta.✝4:4 2 Sam. 9:3

5 Ba’erootiyaa Rimoona naanay Rekaabinne Ba’aani Yaabustte soo baanaw keseeddino; unttunttu biide seeta gallassi gakkeeddino; I awaappe shemppee. 6 Unttunttu soy geliide zarggaa akkiyaawaa malatiide Yaabustta uluwaan c’addina hayk’k’eedda. Rekaabinne Aa ishaa Ba’aan leelan geleeddino.

7 Unttunttu soy geliyaa wode, Yaabustte k’ol"on arssaan giseeddawaa demmiide, Aa uluwaa c’addiide wod’eeddino; Aa k’ood’iyaappe muuc’eeddino; muuc’eedda huup’iyaa akkiide, Aaraba garaara afiyaa ogiyaa oyk’k’iide, k’ammaa ubbaa hametteeddino. 8 Yaabustte huup’iyaa Kebroonan de’iyaa Daawitew ahiide kaatiyaa, «Neena wod’anaw koyeedda ne morkkiyaa Saa’oola na’aa Yaabustte huup’iyaa hawaa be’a; Saa’oola bollaaninne Aa na’aa bollan kaatiyaa nu godaa haluwaa Med’inaa Goday hachche keseedda» yaageeddino.

9 Shin Ba’erootiyaa Rimoona naanaa Rekaabanne Aa ishaa Ba’aana Daawite hawaadan yaageedda; «Metuwaa ubbaappe taana ashsheeda Med’inaa Goday ero! 10 Itti bitanii taakko yiide, mishiraachchuwaa odiyaawaadan, ‹Saa’ooli hayk’k’eedda› yaagiide taw odina, taani Aa S’ik’ilaagan oyk’k’aade wod’isaad; taani Aa mishiraachchoo immeedda gatii hewaa.✝4:10 2 Sam. 1:1-16 11 Bare son bare arssaan giseedda s’illo bitaniyaa wod’eedda iita asatoo Aa haluwaa kessiyaawe ay keeshshaa iitanddeeshsha! Aa suutsaa taani hinttenttu kushiyaappe ha"i achchana; hinttentta taani biittaa bollappe d’ayssana!» yaageedda.

12 Rekaabanne Ba’aana wod’anaadan Daawite bare olanchchatuwaa azazeedda; olanchchatuu unttuntta wod’eeddino; unttunttu kushiyaanne gediyaa k’ans’s’i diggiide, dalbbantsaa haatsaa matan Kebroone kataman kak’k’eeddino. Yaabustte huup’iyaa akkiide afiide, Abaneera duufuwaan Kebroonan moogeeddino.