Haage 2

Goday Bare Asaw Immeedda Mintsetsuwaanne Anjjuwaa Hidootaa

1 He laytsan laappuntsa aginaan laatamanne ittentsa gallassan Med’inaa Godaa k’aalay timbbitiyaa odiyaa Haage baggana hawaadan yaagiid yeedda; 2 «Salaatiyaala na’aa, Yihudaa mooddiyaa Zarubaabeelaw, Iyos’edeek’a na’aa, k’eesiyaa ubbatuu kaappuwaa Iyyaasuwunne hara asaw hawaadan yaagaade oda; 3 ‹Ha Geeshsha Golliyaa bonchchuu kase ayaa malentto be’eedda asaappe atteedawe hintte giddon de’ii? Hachche hintte Aa s’eelliyaa wode, waan utteeddee? Hintte ayifiyaan I baynnawaa malatee gidennee?✝2:3 Izr. 3:12

4 « ‹Zarubaabeelaa, ha"i minna! Taani Med’inaa Goday hawaa oday. Iyos’edeek’a na’aw, k’eesiyaa ubbatuu kaappoo Iyyaasuu, neenikka minna! Biittan de’iyaa asaa ubbaw, hinttekka minnite! Minniide ootsite; ayaw gooppe, taani hinttenana de’ay. Taani Ubbaappe Wolk’k’aama Med’inaa Goday hawaa oday. 5 Hintte Gibs’eppe kesiyaa wode, taani hinttenana c’aak’k’eteedda c’aak’uwaadan, ta Ayyaanay hinttenana de’iyaa diraw yayyoppite!✝2:5 Kes. 29:45-46

6 « ‹K’aykka taani Ubbaappe Wolk’k’aama Med’inaa Goday hawaa oday. Taani mata wodiyaan itti gede gujjaade, salotuwaanne sa’aa, abbaanne mela biittaakka k’aatsana.✝2:6 Ibr. 12:26 7 Kawutetsatuwaa ubbaakka k’aatsana; kawutetsatuwaa ubbaan de’iyaa duretay haa yaanaadan ootsana. Taani Ubbaappe Wolk’k’aama Med’inaa Goday ha Geeshsha Golliyaa bonchchuwaan kuntsana. 8 Biray tawaa; work’k’aykka tawaa. 9 Koyirowaa bonchchuwaappe ha laa"entso Geeshsha Golliyaa bonchchuu darana; taani Ubbaappe Wolk’k’aama Med’inaa Goday ha sa’aan sarotetsaakka immana› yaagaade oda» yaageedda Med’inaa Goday.

10 Daariyoose kaateteedda laa"entso laytsan, udduppuntsa aginaan laatamanne oyddentso gallassan Med’inaa Godaa k’aalay timbbitiyaa odiyaa Haage baggana hawaadan yaagiid yeedda; 11 «Ubbaappe Wolk’k’aama Med’inaa Goday hawaadan yaagee; ‹Higgii waagintto eranaw ane k’eesetuwaa hawaa oochcha: 12 Itti uray yarshshoo geeshshi wotseedda ashuwaa bare afilaa s’eeran s’aas’i akkiide afishshin, he afilaa s’eeray ukitsaa, woy wos’iyaa, woy woyniyaa eessaanne zayitiyaa, woy hara ayaa k’ommo k’umanne bochchooppe, he bosheteedda k’umay tumu geeshsha gidanaw danddayii?› yaaga» yaageedda.

K’eesetuu, «Gidanaw danddayenna» yaagiide zaareeddino.

13 Haggii k’aykka, «Anhaa bochchiide tuneedda itti uray hawanttuppe itti k’ommo k’umaanne bochchooppe, he k’umay tumu tunanee?» yaagiide oochcheedda.✝2:13 Pay. 19:11-22

K’eesatuu, «Ee tunana» yaagiide zaareeddino.

14 Yaatina, Haggii zaaretsiide, «Med’inaa Goday hawaadan yaagee; ‹Ha asaynne ha kawutetsay ta sintsan hewaakka mala; unttunttu ootsiyaa oosuunne unttunttu shiishshiyaa yarshshuu ubbaykka hewaakka mala tuna› yaagee» yaageedda.

S’oossay Bare Asaa Anjjana

15 S’oossay, «Hachcheppe doommiide, hintte bollan gakkeeddawaaa akeekite! Med’inaa Godaa Geeshsha Golliyaa gimbbetuwaa doommanaappe kase, 16 hintte laa"u kunttaale katsaa akkana giide, katsaa wotsosaa beeddita; shin itti kunttaale s’alalaa demmeeddita. K’ay itti s’eetu liitiro woyniyaa eessaa akkanaw woyniyaa gum"iyaa ollaakko beeddita; shin hintte mes’s’i oytamu liitiro s’alalaa woyniyaa eessaa demmeeddita. 17 Taani hintte kushii ootseedda oosuwaa ubbaa bollan melissiyaa c’arkkuwaa, katsaa harggiyaanne shachchaa yeddaade d’ayissaad. Shin hintte ha ubbankka taakko simmibeykkita» yaagee Med’inaa Goday.

18 «Hachche gallassaappe, ha udduppuntsa agenaan laatamanne oyddentsa gallassaappe doommiide, ane akeekite; k’ay Med’inaa Godaa Geeshsha Golliyaa baasuu baasetteedda gallassaappe doommiide k’oppite. 19 Ha"i zeretsaw haniyaa katsay hintte yeesiyaan d’ayooppe, k’ay woyniyaa turay, balasiyaa geetettiyaa mitsaa, roomaaniyaa geetettiyaa mitsaanne wogaraa zayitiyaa mitsaykka hachche gakkanaw ayfiyaa ayifana d’ayooppe, hachcheppe doommaade taani hinttena anjjana» yaagee.

S’oossay Zarubaabeelaw Immeedda Hidootaa

20 He agenaan laatamanne oyddentso gallassan Med’inaa Godaa k’aalay laa"entsuwaa Haagekko hawaadan yaagiid yeedda; 21 «Yihudaa mooddiyaa Zarubaabeelaw hawaadan yaagaade oda; ‹Taani salotuwaanne sa’aa k’aatsana; 22 kawutetsatuwaa araatatuwaa aatsa yeggana; unttunttu wolk’k’aa d’ayissana. Paraa gaaretuwaa unttunttu laaggiyaawanttunna aatsa yeggana; paratuunne paraa asatuukka ubbay barenttu giddon hayk’k’ettana. 23 Ta k’oomaw, Salaatiyaala na’aw Zerubaabeelaa, taani Ubbaappe Wolk’k’aama Med’inaa Goday neena he gallassi akkaade ta maatafaa migiduwaa mala ootsana. Ayaw gooppe, taani neena dooraaddi› yaagaade oda» yaagee Ubbaappe Wolk’k’aama Med’inaa Goday.