Amoos'a 2

Moo’aaba

1 Med’inaa Goday hawaadan yaagee; «Moo’aaba gadiyaa Asay zaari zaariide ootseedda nagaraa diraw, taani unttuntta murenan aggikke. Ayaw gooppe, unttunttu Eedooma gadiyaa kaatiyaa mek’etsaa bidintsaa kesana gakkanaw s’uuggeeddino.✝2:1-3 Isa. 15:1—16:14; 25:10-12; Erm. 48:1-47; Hiz. 25:8-11; Sof. 2:8-11 2 Hewaa diraw, taani Moo’aaba gadiyaan tamaa yeddana; he tamay K’iriyoota katamaa geessotuwaa maana. Moo’aaba gadiyaa Asay shabbirssaa giddon, olaa waasuwaa gidduwaaninne malakataa punuwaa giddon hayk’k’i wurana. 3 Taani Moo’aaba gadiyaa mooddiyaawaa d’ayissana; k’ay kaappatuwaa ubbaakka aanana ittippe wod’ana» yaagee Med’inaa Goday.

4 Med’inaa Goday hawaadan yaagee; «Yihudaa gadiyaa Asay zaari zaariide ootseedda nagaraa diraw, taani unttuntta murenan aggikke. Ayaw gooppe, unttunttu Med’inaa Godaa higgiyaa is’s’eeddino; Aa azazuwaakka naagibeykkino. Unttunttu aawotuu kaalleedda worddo s’oossatuu unttunttakka baletseeddino. 5 Hewaa diraw, taani Yihudaa gadiyaa bolla tamaa yeddana; he tamay Yerusaalame geessotuwaa maana» yaagee.

Israa’eeliyaa Bollan S’oossay Pirddiyaa Pirddaa

6 Med’inaa Goday hawaadan yaagee; «Israa’eeliyaa Asay zaari zaariide ootseedda nagaraa diraw, taani unttuntta murenan aggikke. Ayaw gooppe, unttunttu miishshaa akkana diraw, s’illuwaa zal"iino; k’ay c’aammaa ac’uwaa akkana gishshawukka hiyyeesaa zal"iino. 7 Mank’k’otuwaa gadiyaa baanan kunddissiidde, unttunttu huup’iyaa yed’d’iino; naak’etteeddawanttu pirddaakka geellayiino. K’ay aawunne na’ay laa"u itti mishirato woshumiyaawaan ta geeshsha suntsaa loytsi tunissiino. 8 Unttunttu asaappe ac’oo oyk’k’eedda mayuwaa yarshshiyaa sa’aan ubbaa matan hiis’s’iide, aan gisiino; k’ay asaappe mak’k’ac’o ootsiide akkeedda woyniyaa eessaa barenttu S’oossaa golliyaan ushiino.

9 «Gidooppenne, zigaadan aduk’k’iide, wolaadan minneedda Amoore gadiyaa asatuwaa unttunttu sintsaappe d’ayisseeddawe taana. Taani unttunttoo bolla ayifiyaanakka garssa s’ap’uwaanakka ubbaa d’ayissaad.✝2:9 Zar. 3:8-11 10 Taani hinttena Gibs’e gadiyaappe kessaade, bazzuwaan oytamu laytsaa kaaletsaad; k’ay Amooretuu biittaakka hinttenttoo laata ootsaade immaad.

11 «Hintte attuma naanatu giddoppe timbbitiyaa odiyaawantta, hintte yalaga asaa giddoppekka barena S’oossaw dummayeedda Naaziraawetuwaa dentsaad. Hinttenoo, Israa’eeliyaa asatoo, hawe tuma gidennee? Hawaa taani S’oossay odaad.✝2:11 Pay. 6:1-8 12 Shin hintte he Naaziraawetuwaa c’aak’uwaa kolissiide, woyniyaa eessaa ushsheeddita; timbbitiyaa odiyaawanttakka, ‹Timbbitiyaa odoppite› yaagiide azazeeddita.

13 «Be’ite, katsaa darissiide c’aaneedda gaarii me"iyaawaadan, taani hinttena mentsana. 14 Pala wos’s’iyaawe bak’atiide kessi akkena; minoo wolk’k’ay is’s’ana; olanchchaykka bare shemppuwaa ashshenna. 15 Wonddaafiyaan dukkiyaawe bare sa’aan ek’k’anaw danddayenna; gediyaa eesukka kessi akkena; paraawukka bare shemppuwaa ashshenna. 16 He gallassi haray atto olanchchatuwaa giddon loytsi s’alanchcha giyaawanttukka kallo s’iira bak’atana» yaagee Med’inaa Goday.