Kiitteeddawanttu Oosuwaa 16

10 Sas’aa I be’eeddawaappe guyyiyaan, nuuni ellekka Mak’idooniyaa baanaw koyyeeddo; ayaw gooppe, wonggalaa mishiraachchuwaa yaan de’iyaa asaw odanaw, S’oossay nuuna s’eeseeddawaa nuw malateedda.

Liidiyaa Pilip’p’isiyoosan Kiristtoosa Ammanaaddu

11 Hewaa diraw, S’iro’aadappe denddiide, sitti giide markkabiyaan Saamootiraak’e beeddo; wonttetsa gallassi Naap’p’ule beeddo. 12 Hewaappe Pilip’p’isiyoosa beeddo; Pilip’p’isiyoosi Mak’idooniyaa biittaw huup’e katamaa; k’ay Roome Asay de’iyaa katamaa; nuuni he katamaan amareeda gallassaa utteeddo.

13 Sambbata gallassi, katamaappe gas’aan shaafaa doonaan Ayihudatuu S’oossaa woossiyaa sa’ay de’iyaawaa akeekiide beeddo; hewaan uttiide shiik’eedda mac’c’a asaw k’aalaa odeeddo.

14 Itti Liidiyaa geetettewunna, Tiyaas’iroona katamaappe yaade S’oossaa ammanewunna, zo’o mayuwaa zal"iyaa mishiratta, nuuni odiyaawaa sisaaddu; P’awuloosi odiyaawaakka iza sisana mala S’oossay I wozanaa dooyeedda. 15 Liidiyaa bare soy asaana ittippe s’ammak’etteeddawaappe guyyiyaan nuuna, «Hinttenttu taana Godaa tumatetsaan ammanaw giide k’oppooppe, ta soyin de’ishshite» gaade woossaaddu; minisaade shoobbaaddu.

P’awuloosinne Sillaase K’ashetteeddino

16 Nuuni S’oossaa woossiyaasaa biishshin, iita ayyaanay izi bolla ak’ina kaayiyaa itti k’ooma naatta nuunanna gakettaaddu; he naatta kaayaade daro miishshaa bare godatoo demmaaddu. 17 Gakettaade P’awuloosanne nuuna kaalaadde, «Hawanttu hinttenttoo attana ogiyaa odiyaawanttu, Ubbaappe Bolla S’oossaa ayiletuwaa» gaade kooshshaa d’ok’k’u ootsaade haasayaw.